Psalms 93 - Quichua Imbabura 2016

Mandaj Diosmi mandana ushaita charin

1Mandaj Diosmi mandajun.

Paica, ninan ushaihuanmi mandajun.

Mandaj Diosca ninan ushaitami charin.

Paillatami, cai pachatapash ama cuyurichun charijun.

2Callarimandapachami, cai pachataca mandajungui.

Canga causaitami causajungui.

3Mandaj Dioslla,

jatun yacucunami jatarirca.

Jatun yacucunaca manllanayaitami huacanajurca.

Jatun yacucunaca ninandami cuyurinajurca.

4Jahua pacha Mandaj Dioslla,

Canmi ninan ushaita charingui.

Jatun yacucuna culun nishpa jatarishcatapash,

mama cucha ninanda jatarishcatapash, yali ushaitami charingui.

5Mandaj Dioslla,

Can mandashca Shimicunataca pactachinapachami.

Cambaj huasica jucha illajpachami.

Mandaj Dioslla,

causaita causaicamanmi causajungui.