ÉXODO 22 - Quichua Imbabura 2016

Shuhuashca cashpa tigrachinamanda

1Maijan cashpapash, huagrata cashpa, llamata cashpapash shuhuashpa, cungata cuchushpa huañuchishpa, na cashpaca jatushca cashpaca, chai huagramandaca picha huagratami tigrachinga. Shinallata llamamandapash, chuscu llamatami tigrachinga.

2Maijanda cashpapash, huasi pircata utujushpa shuhuajujta japishpa, macashpa huañuchishpaca, huañuchij runaca, ima llaquitapash na japingachu.

3Ashtahuangarin, punlla shuhuajujta japishpa huañuchishpaca, chai huañuchij runaca llaquichi tucungapachami.

Shuhuajushpa japi tucun runaca, mashna cajpipash tucuitallami tigrachinga. Tigrachingapa imatapash na charishpaca, paimi jatui tucunga.

4Huagrata cashpa, burruta cashpa, llamata cashpapash, shuhuashcata causajta charijushpa japi tucushpaca, ishcaitami tigrachinga.

5Maijan cashpapash, shujpaj jihua pambapi, shujpaj uva chagrapi, paipaj animalcunata micuchishpaca, paipaj ashtahuan ali jihua pambata, paipaj ashtahuan ali uva chagratami tigrachinga.

6Maijan cashpapash, cashacunata rupachingapa ninata japichijpi, grano tandachishcacuna, nara cuchushca granocuna, chagra pambacuna rupajpica, ninata japichij runami, chai rupashcamandaca tigrachinga.

7Maijan cashpapash, culquita cashpa, imapash juyaillacunata cashpapash mingajpimi, chai runapaj huasimanda shuhuanga. Chai shuhua runa japi tucushpaca, chaupita mirachishpami tigrachinga.

8Shuhua runa na japi tucujpica, mingai tucun runami juezcunapajman apai tucunga. Chaipimi, chaicunata paillata apashcata, na apashcatapash tapuchijpi villajunga.

9Tucui imata cashpapash: Huagrata, burruta, llamata, churajunata cashpapash chingashcata tarishpaca: “Caica ñucapajmi” nirinajungami. Shina nirinajujpica, paicunataca, Diospaj ñaupajmanmi pushanga. Chaipica, maijan llullajujta japijpimi, chaupita mirachishpa tigrachina tucunga.

10Maijan cashpapash, burruta, huagrata, llamata, ima animaltapashmi, maijanmambash minganga. Shina mingajpimi, chai animalca huañunga, na cashpaca chugringa, na cashpaca pipash na ricujtami shuhuanga.

11Shina tucujpimi mingai tucun runaca: “Can mingashcataca, imatapash na tacarishcanichu” nishpa, Mandaj Diospaj ñaupajpi juramentunga. Shina juramentujpimi chai animalta charijpash crijpi, mingai tucun runaca na tigrachina canga.

12Ashtahuangarin, mingai tucun runa ricujta shuhuashca cajpica, chai animalta charijman tigrachinapachami.

13Sacha animal apashca cajpica, chai huañushca animalpajta imatallapash ricuchishpami, chai animalmandaca imatapash na tigrachinga.

14Ashtahuangarin maijan cashpapash, shujpaj burruta mañashpa charijujpi, chai burruta charij illajpi chugrichishpa, na cashpaca huañuchishca cashpaca, chai animalmandaca tigrachingami.

15Ashtahuangarin, burruta charij chaipillata cashca cajpica, na tigrachingachu. Culquipaj mañachishca cajpica, chai culquitallami japinga.

Shujcunahuan ali causachun mandashcamanda

16Jarihuan nara tacarishca, cazarangapa pihuambash nara ari nirishca cuitsata umachishpa, maijambash paihuan puñushpaca, mashna culquita cuna cashcata ayllucunaman cushpami, chai cuitsahuanga cazaranga.

17Cuitsapaj taita cazarachingapa na munajpica, jarihuan nara tacarishca cuitsamanda mashna culquita cuna cashcashnami cunga.

18Bruja huarmitaca, causachun na saquinachu cangui.

19Maijan cashpapash, animalhuan pacta puñushpa causashpaca huañungapachami.

20Mandaj Diosmanllami animalcunataca carashpa huañuchina. Rurashcalla dioscunamanra animalcunata carashpa causajushpaca, huañuchi tucungapachami.

21Shuj llactamanda runataca, ama umachishpa ninanda llaquichinguichu. Cangunapash, Egipto llactapica, shuj llactamanda rishpami causarcanguichi.

22Sapalla huarmitapash, taita mama illaj huahuacunatapash, na llaquichishpa charinachu canguichi.

23Paicunata can llaquichijujpi Ñucata caparishpa mañanajujpica, paicuna caparinajujtaca uyashapachami.

24Shina uyashpaca, Ñucapash ninanda fiñarishpami, cangunataca espadahuan huañuchisha. Shinamandami, cangunapaj huarmicunapash sapalla tucunajunga, cangunapaj huahuacunapash, taita mama illajmi saquirinajunga.

25Israelpuramanda, imagutapash na charij runaguman culquita mañachishpaca, ama mirachishpa japij runashnaca ruranguichu. Mama culquimanda mirachishpapash ama japinguichu.

26Culquita mañachishcamanda, churajunata japishpaca, nara indi huashajujpillatami tigrachina cangui.

27Paica, chai churajunagutallami, pai jahualla quilparingapaca charin. Paica, ¿imatashi churajushpa puñunga? Pai Ñucata caparishpa mañajujpica uyashami. Ñucami llaquij Dios cani.

28Jueztaca ama na alicachishpa rimanguichu. Cambaj llactapi mandajtapash, ama na alicachishpa rimanguichu.

29Punda cozechashca granocunatapash, uvacunata cutajpi punda llujshishcatapash, Ñucamanrami apamuna canguichi. Punda huacharishca churitaca, Ñucamanmi apamuna cangui.

30Shinallatami, cambaj huagracunamanda, cambaj llamacunamanda, punda huacharishcataca, canchis punllacaman paipaj mamahuan saquishpa, pusaj punllapica Ñucamanmi apamuna cangui.

31Chashna tucuita pactachishpami, Ñucapajlla shicanyachishca canguichi. Sacha animalcuna huañuchishca aichatapash na micunachu canguichi. Chai aichacunataca, alcucunamanmi carana canguichi.