ISAÍAS 26 - Quichua Imbabura 2016

Mandaj Diospaj maquipi causajushpa candashcamanda

1Chai punllacunami, Judá llactapica cashna candanajunga:

“Jatun pircahuan jarcashca pueblotami charinchi.

Taita Diosmi ñucanchitaca, ishcai pircahuan muyushcashna, huacaichirca.

2Diosta cazushpa, ali cashcatalla rurajcuna yaicuchun, pungucunata pascaichi.

3Mandaj Dioslla, Canda na cungashpa causajcunamanga,

Canmi ali causaiguta carangui.

Paicunaca, Candallami yariashpa causanajun.

4Mandaj Diostaca, tucui causaipi yariajlla causaichiyari.

Mandaj Jatun Diosca, causaita causaicamanmi ushaita cunga.

5Paimi, jariyashpa causajcunataca urmachirca.

Jatumbi churai tucushca pueblotapash, ninandami pingai tucurca.

Paicunataca, ñutu alpapi shitashpami, pingaichirca.

6Chaitaca, llaquilla causajcuna, huajchacunami,

cutin cutin sarushpa purinajunga” nishpami candanajunga.

7Ali cashcatalla ruraj runapaj causaipica, imata juchachinapash na tiyanllu.

Taita Diosca, ali cashcatalla ruraj cashpami, chashna causajcunataca ricujungui.

8Mandaj Dioslla, ñucanchica, Candallami shuyanajushcanchi.

Cambaj shutita na cungashpa causangapami, ninandapacha munapanchi.

9Tutapash Candallami, tucui shunguhuan yariajurcani.

Ñuca causaicamanga, tutamandata jatarishpami Candaca mañajusha.

Cai pachata Can llaquichijpimi, cai pachapi causajcunaca ali cashcatalla rurashpa causanata yachajunajunga.

10Na alita ruraj runaca, paita juyashpa na llaquichijpica,

ali cashcatalla rurashpa causanataca na yachajungachu.

Aliguta rurajcunapaj llactapi causajushpapash, alita ruranataca na yachajungachu.

Mandaj Dios mandana ushaita charijtapash, na rijsingachu.

11Mandaj Dioslla, Cambaj maquita chutashcalla shuyajujpipash, paicunaca na ricunllu.

Can agllashcacunata ricushpa, paicunashna cangapa munajcunaca, ninandami pingai tucunajunga.

Canda fiñajcunataca, ninami tucuchinga.

12Mandaj Dioslla, ali causaitaca, Canmi ñucanchiman carangui.

Tucui imatalla ñucanchi rurachumbash, Canmi yanaparcangui.

13Ñucanchita Mandaj Dioslla, shuj runacunarami Cambaj randi ñucanchitaca mandashpa charin.

Shina cajpipash, Candallami, yariashpa causashun.

14Paicuna huañushpaca, ña na cutinga tigramungachu.

Huañushca jipaca, cutinga na causaringachu.

Paicunataca ninanda llaquichishpami, ama yarinajuchun tucuchircangui.

15Mandaj Dioslla, Can agllashca gentecunataca ashtahuanmi mirachircangui.

Ashtahuanmi paicunataca mirachircangui.

Shinamandami, ninanda alicachi tucurcangui.

Tucui cai pachapimi jundachircangui.

16Mandaj Dioslla, jatun llaquihuan cashpami, Candaca mascanajurca.

Can llaquichijpica, ninandapachami mañanajurca.

17Vijsayu huarmita, unguna nanai japijpi nanachishpaca, ¡aij! nishpami ninanda caparin.

Mandaj Dioslla, ñucanchica chashnallatami, Cambaj ñaupajpica cashcanchi.

18Ñucanchica, vijsayu tucushpa, unguna nanai japinshnami carcanchi.

Ashtahuangarin, ima alitapash na tarirircachu.

Cai llacta quishpirichunga, ima alitapash na rurai usharircachu.

Cai pachapi causajcunataca, shujtallapash na apamui usharircachu.

19Canda catishpa huañushcacunaca, cutin causangami.

Huañushcacunaca, cutin causaringami.

¡Ñutu alpa ucupi samajcunalla, rijcharishpa candaichiyari!

Huañushcacunaca, paramuhuan muyucuna viñajshnami, alpamanda llujshinajunga.

Cai pachaca, huañushcacunata tigrachimungami.

20Ñuca llactapi causajcunalla, cangunaca ucuman yaicushpa, punguta vicharichi.

Dios fiñarishcata yalichingacaman, ashaguta pacajuichi.

21Mandaj Diosca, cai pachapi causajcuna, Paita fiñashpa, na alita rurashcamandami,

Pai mandashpa tiyajushcamanda jatarishpa llaquichinga.

Alpapash, paipaj jahuapi huañuchishpa yahuarta jichashcataca ricuchingami.

Alpaca paipaj jahuapi huañuchishcataca, na pacashpami ricuchinga.