1Shinallata shuj punllapashmi angelcunaca, Mandaj Diospaj ñaupajpi ricuringapa shamurca. Paicunapurapica, Satanaspashmi Mandaj Diospaj ñaupajpi ricuringapa shamurca.
2Shina shamujpimi Mandaj Diosca, Satanastaca:
“¿Maimandata shamungui?” nirca.
Shina tapujpimi Satanasca, Mandaj Diostaca:
“Alpa pachata muyushpa, chaipi purishpami shamuni” nirca.
3Shina nijpimi Mandaj Diosca, Satanastaca cashna nirca:
“Ñucapajta ruraj Job runataca, ima pandatapash na ruraj, aligutalla ruraj, Ñucatapash manllaj, ima na alitapash na ruraj runa cajtaca, ¿nachu ricurcangui? Alpa pachapica, paishnaca pipash na tiyanllu. Paitaca, ima na alitapash na rurajpitami, llaquichingapa cuhuai nijurcangui. Shina cajpipash paica, ima pandatapash nara ruranllu” nircami.
4Shina nijpimi Satanasca, Mandaj Diostaca cashna nirca:
“Runacunaca, paipaj cuerpopi na llaquichijpica, ali catinajunllami. Paipaj causaimandaca, tucui imatapash cungallami.
5Ashtahuangarin cunanda paipaj tullupipash, aichapipash ungüita cachamujpica, ¿nachu Candaca, Cambaj ñaupajpillata na alicachishpa, na ali shimicunata rimanga?” nircami.
6Shina nijpimi Mandaj Diosca, Satanastaca:
“Paica cambaj maquipimi. Shina cajpipash, paipaj causaitalla ama quichungui” nirca.
7Shina nijpi Mandaj Diospaj ñaupajmanda Satanás llujshishpami, Job runataca chaqui pundamanda, umacaman, millai carachahuan llaquichirca.
8Shinamandami Job runaca, uchufapi tiyarishpa, callana faquihuan aspirijurca.
9Chaita ricushpami paipaj huarmica:
“¿Cunangamanllu Diosta cazujunguilla? Taita Diostapash na alicachishpa, huañushpachari ali canguiman” nirca.
10Shina nijpimi Job runaca, cashna nirca:
“Canga, juizu illaj huarmishnami rimajungui. ¿Taita Diosmandaca, alitallachu japina canchi? ¿Nachu ima llaquicunatapash, chasquinalla canchi?” nirca.
Chai tucui llaquicunata apajushpapash, Job runaca paipaj shimihuanga na juchata rurarcachu.
11Job runapaj ali cumba quimsa runacunaca, shujca Temán llactamanda Elifaz runami carca. Caishujca, Súah llactamanda Bildad shutimi carca. Chaishujca, Naamat llactamanda Zofar shutimi carca. Job runaca chai tucui llaquitami apajun nijta uyashpami, paicunapaj llactacunamanda shamunajurca. Paicunapash llaquirishpami, Job runata cushichingapa, quimsandi tandanajushpa shamungapa rimarishca carca.
12Chai runacunaca carumanda ricushpa, na rijsinalla tiyajujta ricushpami, ninanda caparishpa huacanajurca. Shinallata paicunapaj jahualla churajunatapash liquishpami, quimsandillata umapi alpata churarinajurca.
13Chashna jatun nanaihuan tiyajujta ricushpami, maijambash na imata rimashpa, canchis punlla, canchis tutacaman paihuan tiyanajurca.
Who We AreWhat We EelieveWhat We Do
2025 by iamachristian.org,Inc All rights reserved.
