ISAÍAS 65 - Quichua Imbabura 2016

Na cazujcunata llaquichinatami villajun

1“Ñucata na mascajcunahuanmi, tuparircani.

Ñucata na mascajcunarami tarihuarca.

Ñucata na mañaj gentecunatami: ‘Caipimi cani, caipimi cani’ nircani.

2Ñucata na cazuj gentecunatami maquita chutashpa, tucui punlla cayarcani.

Paicunaca, paicunapaj munashcata rurashpami na alita causanajun.

3Chai gentecunaca, na alita rurashpami, Ñucataca fiñachishpalla causanajun.

Paicunaca, rurashcalla dioscunaman animalcunata cushpami, quirucuna shayanajuj pushtucunapi huañuchinajurca.

Ladrillohuan altarta rurashcapimi, inciensota cushnichinajurca.

4Huañushcacunata pambashca utujucunapimi pacajushpa pacarinajurca.

Cuchi aichatami micunajurca.

Paicunapaj mangacunapica, na micunachu nishpa mandashcacunatami yanunajurca.

5Paicunaca: ‘Ama ñucapajman quimirimuichu,

canda yali Diospajlla shicanyachishcami cani’ ninajunmi.

Chashna nijcunaca, tucui punlla nina rupashpa cushnijunshnami, Ñucataca fiñachinajun.

6Chai na alita rurashcataca, tucuitami ricujuni.

Chaimandami na upalla saquishpa, paicunaman imata cuna cashcatallata cusha.

7Canguna na alita rurashcamandapash,

cangunapaj taitacuna na alita rurashcamandapash tandachishpami, llaquichigrini.

Paicunaca urcucunapi, lomacunapi, inciensota cushpa cushnichishpami,

Ñucataca ninanda fiñachinajurca.

Chaimandami, imata punda rurashcatapash ali ricushpa llaquichisha” ninmi Mandaj Diosca.

8Mandaj Diosca, cashnatapashmi nin:

“Maijambash, ninanda fucushca uva malquimanda tarishpaca:

‘Chaica, ñucapajca bendicionmi, na yanga shitanachu cani’ ningami.

Shinallatami, Ñucapajta rurajcunataca ninanda juyashpa, na tucuilla tucuchisha.

9Jacobpaj miraicunataca, na tucuilla tucuchishachu.

Judapaj miraicunaca, Ñuca carashca urcucunapimi causanajunga.

Ñuca agllashcacunami, llactataca paicunapaj cachun japinajunga.

Ñucapajta rurajcunami, chaipica causanajunga.

10Sarón shuti pambami, paicunapaj llamacunata michina pamba tucunga.

Acor shuti pugru pambaca, paicunapaj huagra corralmi tucunga.

Chai pambacunami, Ñucata mascajcunapaj canga.

11Ashtahuangarin, Mandaj Dios Ñucata saquishpami,

Ñucapajlla urcutapash jichushpa saquircanguichi.

Shina cashpami cangunaca: ‘Charijyanata caraj’ rurashcalla diosman micunata caranguichi.

‘Ali causaita caraj’ rurashcalla diosmanmi, vinota carashpa talinguichi.

12Chaimandami cangunataca, espadahuan huañuchi tucuchun saquigrini.

Tucuicunami, cungata fitijpi huañunguichi.

Cangunaca, Ñuca cayajpipash, na uyashpami causarcanguichi.

Ñuca rimajpipash, na uyangapa munashpami causarcanguichi.

Ashtahuangarin, Ñuca ñaupajpica, na alitalla rurashpami causarcanguichi.

Shina rurashpami, Ñuca na munashcatara rurashpa causarcanguichi” ninmi.

13Chaimandami Mandaj Jatun Diosca, cashna nin:

“Ñucapajta rurajcunaca, micunata charingami.

Ashtahuangarin na cazujcunaca yarjaihuanmi causanga.

Ñucapajta rurajcunaca, yacuta charingami.

Ashtahuangarin cangunaca, yacunayachishpami causanguichi.

Ñucapajta rurajcunaca cushijungami,

ashtahuangarin cangunaca, pingaichi tucunguichimi.

14Ñucapajta rurajcunaca, tucui shunguhuan ninanda cushijushpami candanajunga.

Ashtahuangarin cangunaca, ninan llaquihuanmi caparinguichi.

Cangunaca, ninan llaquihuan cashpami, caparishpa huacanguichi.

15Ñuca agllashcacunaca, cangunata ninanda na alicachishpami causanajunga.

Mandaj Jatun Dios Ñucami, cangunataca huañuchisha.

Ashtahuangarin Ñucapajta rurajcunataca, mushuj shutitami churasha.

16Maijambash cai pachapi, bendiciangapa munashpaca,

Diospaj Shutipimi bendiciana canga.

Maijambash cai pachapi juramentushpaca, na llullaj Taita Diospaj ñaupajpimi juramentunga.

Punda imashna llaquichishcatapash, napacha yaringapami cungasha.

Jahua pachapash, cai pachapash mushujmi canga

17Ñucami jahua pachatapash, cai pachatapash mushujta rurasha.

Punda ima tucushcataca, cungashpami, yaritapash na yarisha.

18Ashtahuangarin mushujta Ñuca rurashcapimi,

causaita causaicaman cushijushpa causanguichi.

Ñucami Jerusalenmanbash, chaipi causajcunamambash ninan cushijuita apamusha.

19Ñucapash, Jerusalenbi causaj, Ñuca agllashca gentecunahuanmi ninanda cushijusha.

Jerusalenbica, ima llaquimanda huacaipash na ashtahuan uyaringachu.

Llaquihuan caparinapash, na tiyangachu.

20Chaipica huahuallata huañujca illangami.

Rucucunapash, huañuna punlla chayajpimi huañunga.

Patsaj huatata charij runa huañushpaca, huambrara huañushcami ricuringa.

Patsaj huatata nara charishpallata huañushpaca, juchayu cashcatami ricuchinga.

21Huasicunata shayachishpami, chaipi causanajunga.

Uva chagrata tarpushpami, chaipi fucushcata micushpa causanajunga.

22Shujcunara causanajuchunga, na huasichinajungachu.

Shujcunara micuchumbash, na tarpunajungachu.

Ñuca agllashcacunaca, shinlli quirucunashna unaitami causanajunga.

Ñuca agllashcacunaca, paicunapaj maquihuan imatapash rurashpami cushijushpa causanajunga.

23Imatapash na yanga rurashpa causangachu.

Paicunapaj huahuacunapash, na ñapash huañungachu.

Paicunaca, Mandaj Dios bendiciashcamandami,

paicunapaj miraicunapash chashnallata alipacha causanajunga.

24Paicuna nara mañajpillatami Ñucaca tigrachisha.

Paicuna nara rimashpa tucuchijpillatami, Ñucaca ña uyasha.

25Atujca, maltun jari llamahuanmi, pacta micushpa purijunga.

Leonbash, huagrashnami jihuata micunga.

Culebrapash alpatami micunga.

Ñucapajlla shicanyachishca lomapica,

pipash na alitaca napacha ruranajungachu” ninmi Mandaj Diosca.