2 CRÓNICAS 26 - Quichua Imbabura 2016

Uzías shuti runa mandajushcamanda(2 Rey. 14:21-22; 15:1-7)

1Judá llactapi causaj gentecunaca, Uzías shuti runatami, paipaj taita Amasiaspaj randi jatun mandaj cachun churanajurca. Uzías shuti runaca, chunga sucta huatata charishpami mandai callarirca.

2Jatun mandaj Amasías huañushpa paipaj ñaupa taitacunahuan tandanajushca jipami Uzías runaca, Elot shuti pueblota shayachishpa, Judá llactapajllata causachun tigrachirca.

3Uzías runaca, chunga sucta huatata charishpa mandai callarishpami, Jerusalenbica picha chunga ishcai huatata mandajurca. Paipaj mamaca, Jerusalenmanda Jecolías shutimi carca.

4Uzías runaca, Mandaj Diospaj ñaupajpica, paipaj taita Amasías runa tucui alicunata rurashpa causashcashnami alitalla rurajurca.

5Taita Dios muscuipishna ricuchishcata ali yachaj Zacarías runa causajui punllacunapica, Taita Diostallami mascashpa causajurca. Chai punllacunapica, Mandaj Diosllatami, paitaca tucuipi alipi llujchirca.

6Uzías runaca, filisteocunahuan macanajungapa llujshishpami, Gat, Jabnia, Asdod shuti pueblo muyundi jatun pircacunata urmachirca. Chai jipaca, Asdod shuti pueblota cutin shayachishpami, filisteocunapaj llactapipash pueblocunata shayachirca.

7Filisteocunahuan, Gur-baal shuti pueblopi causaj arabecunahuan, Amón llacta gentecunahuan macanajuipipash, Taita Diosmi mishachirca.

8Amón llacta gentecunaca, imapash caranacunatami Uzías shuti runaman caranajurca. Uzías runa ninan ushaita charijtaca, Egipto llacta mujungamanmi yachanajurca. Judá llactapi causajcunaca, ninan shinllicunami tucushca carca.

9Jerusalenbica, pirca tigranapi tiyaj punguman chayanapipash, pugru pambaman llujshina punguman chayanapipash, pirca tigranacunapipashmi, Uzías runaca torrecunata shayachirca. Chaicunataca shinllitapachami rurarca.

10Chaquishca pambapipashmi, torrecunata shayachirca. Paica, jichushca pambacunapipash, yacu tiyaj pambacunapipash, ashtaca animalcunata charishpami, yacuta alichina ashtaca jatun utujucunata allachirca. Paica, pambacunapi tarpuna munaita charishpami, urcucunapipash, ali fucuj pambacunapipash, uva chagracunata, shuj chagracunata, ashtacatapacha charirca.

11Uzías shuti runaca, macanajunata ali yachaj ashtaca runacunatapashmi charirca. Chai runacunaca, jatun mandajpaj quilcaj Jeiel shuti, Maasías shuti mandajpash, jatun mandajllata churashca mandajpuramanda, Hananías shuti runapash, shuticunata quilcashcashnami shican shican llujshinajurca.

12Huasi ucupuracunata mandajcunaca, ninan shinlli, imatapash na manllaj ishcai huaranga sucta patsaj mandajcunami carca.

13Chai mandajcunaca, macanajunata ali yachaj, 307.500 ninan shinlli runacunatami mandanajurca. Paicunami, jatun mandajta yanapashpa, paicunata fiñajcunahuan macanajurca.

14Uzías runaca, chai tucui runacunapajmi, macanajuipi jarcarinacunata, tucsishpa huañuchina jirrucunata, umapi churajuna jirrucunata, jirru churajunacunata, arcocunata, rumita shitana huaracacunata rurachirca.

15Jerusalenbipash, imatalla ruranata ali yachajcuna, mushujta rurashca jatun macanajunacunatami rurachirca. Chaicunataca, torrecunapi, pata jahuacunapi churangapami, chashna rurachirca. Chaicunahuan flechacunata, jatun rumicunata shitangapami rurachirca. Uziastaca, ninan ushaita charichun Dios bendiciajpimi, caru llactapi causajcunapash yachanajurca.

16Ashtahuangarin Uzías runaca, ninan ushaita ña charishpaca, paipaj shungupi jariyashpami llaquipi urmarca. Paita Mandaj Taita Diosta na cazushpami, altarpi inciensota cushnichingapa, Mandaj Diospaj huasi ucuman yaicurca.

17Sacerdote Azariaspashmi, paita catishpa yaicurca. Paihuanga, Mandaj Diospajta ruraj pusaj chunga ninan shinlli sacerdotecunapashmi yaicunajurca.

18Paicunami, jatun mandaj Uziasta fiñashpa, cashna ninajurca: “Jatun mandaj Uzías runalla, caitaca na can ruranachu cangui. Mandaj Diosmanga, Aaronbaj mirai sacerdotecunallami inciensota cushnichi ushan. Diospajlla ucumanda llujshilla. Canga yachashpatami, na cazushpa, Mandaj Taita Diospaj ñaupajpica, na alitapacha rurajungui” ninajurcami.

19Paica inciensota cushnichingapa chaririyaj shayajushpami, sacerdotecunahuan ninandapacha fiñarirca. Shina fiñarishca, Mandaj Diospaj huasipi shayajujpimi, paipaj frentepica sacerdotecuna ricujta, lepra ungüi llujshirca. Paica, inciensota cushnichina altarman chayanapimi shayajurca.

20Paipaj frentepi lepra ungüi ñapash llujshishcataca, sacerdotecunata mandaj Azariaspash, caishuj sacerdotecunapashmi ricunajurca. Chaimandami chai ucumandaca, ucha llujchinajurca. Uzías runata, Mandaj Dios llaquichijpimi, Azarías runaca ucha llujshijurca.

21Chashnami jatun mandaj Uziasca, pai huañungacaman chai lepra ungüihuan causajurca. Paica, lepra ungüihuan cashpami, Mandaj Diospaj huasimanda anchuchi tucushpa, shuj huasipi shican causajurca. Mandashpa tiyajuna huasipica, Jotam shuti paipaj churimi, Judá llactapi causanajuj gentecunata mandashpa tiyajurca.

22Punda punllacuna, jipa punllacuna, Uzías runa ashtahuan imatalla rurashcataca, Amoz shuti runapaj churi, profeta Isaiasmi quilcashca.

23Uzías runa huañushpa, paipaj ñaupa taitacunahuan tandanajugrijpica, paipaj taitacunata pambashcapimi pambarca. “Paica, lepra ungüihuanmi” nishpami, chashna pambarca. Paipaj randica, Jotam shuti paipaj churimi mandajurca.