1Mandaj Diosca, cashnami nihuarca: “Judá llactata jatun mandajpaj huasiman urai rishpa, cai shimicunata villagri.
2Chaipica, cashna ningui: ‘Davidpaj jatun tiyarinapi tiyarishpa, Judá llactata mandajuj jatun mandajlla. Cambash, cambajta rurajcunapash, cai pungucunata yaicunajuj gentecunapash, Mandaj Dios rimashcata uyaichi.
3Mandaj Diosca, cashnami nin: Aliguta ricushpa, ali cashcatalla rurashpa mandaichi. Llaquichi tucun runataca, llaquichij runapaj maquimanda cacharichinguichi. Shuj llactamanda shamujtapash, taita mama illaj huahuatapash, sapalla mamatapash, na umashpa shuhuanachu canguichi. Caipica, alitalla ruraj runataca, napacha huañuchinachu canguichi.
4Ñuca mandashca shimicunata pactachishpa causajpica, David mandashpa tiyajushcapi tiyarishpa mandajcunaca, carretacunapi, caballocunapi tiyarishpami cai huasiman yaicumunajunga. Paicunapash, paipajta rurajcunapash, cai pueblopi causajcunapashmi yaicumunajunga.
5Ashtahuangarin cai shimicunata na uyajpica: Cai huasitaca, jichushcatami saquisha nishpa, ñucamandallata juramentushcataca pactachishapachami’ ninmi Mandaj Diosca” nijurcami.
6Mandaj Diosca, Judá llactata jatun mandajpaj huasi ucupurataca, cashnami nin:
“Canga ñucapaca, Galaad shuti urcushnami cangui.
Líbano shuti jatun urcu pundashnami cangui.
Shina cajpipash, chulunlla pushtumanmi tigrachigrini,
pipash na causaj pueblocunatashnami saquigrini.
7Canda llaquichinajuchunga, llaquichishpa tucuchij runacunatami cachamugrini.
Paicunami, can ashtahuan alicachishca cedro quirucunataca, cuchushpa rupachinajunga.
8Ashtaca gentecunami, cai pueblotaca yalinajunga.
Paicunaca, tucuicunami: ‘Cai jatun pueblotaca, ¿imashpashi Mandaj Diosca, cashna llaquichirca?’ ninajunga.
9Shina nijpica, cashna nishpami tigrachinajunga:
‘Caipi causajcunami, paicunata Mandaj Dioshuan ari ninajushcata na pactachirca.
Paicunaca, rurashcalla dioscunata ninanda alicachishpami catinajurca’ ninajungami” ninmi.
10Jatun mandaj huañushcamandaca, na huacanachu canguichi.
Llaquiritallapash na llaquirinachu canguichi.
Ashtahuangarin shuj llactaman prezu apai tucushcacunamandami, ninanda llaquirishpa huacana canguichi.
Paimi, cutinga napacha tigramunga.
Pai huacharishca llactatapash, cutinga na ricungachu.
11Josías runapaj churi, Judá llactata mandaj Salum shuti runaca, paipaj taita Josías huañujpimi, paipaj randi mandajurca. Mandaj Diosca, cai llactamanda apai tucun Salum shuti runamandaca, cashnami nin: “Paica, caimanga na cutin tigramungachu.
12Ashtahuangarin pai prezu apai tucushca llactapimi huañunga. Chaimandami cai llactataca, cutinga na ricunga.
13Na alita rurashpa huasichij runaca, ¡aij imachari tucunga!
Paica, paipaj huasita huasichijcunamanga imatapash na cushpami, huasita ruranajuchun mandashca.
14Paica, cashnami nijun: ‘Jatun huasita huasichishpami, ucucunatapash juyaillaguta rurachigrini.
Ventanacunata rurachishpami, cedro caspicunahuan juyaillaguta rurachigrini.
Chai jipaca, juyaillagu cachunmi, pucahuan quilpagrini’ nijunmi.
15¿Cedro caspicunahuan huasita rurachishpaca, mandajushallami yanguichu?
Cambaj taitapash, ¿Nachu, ali micushpa, ali ufiashpa causajurca?
¿Nachu aliguta ricushpa mandashpaca, tucuipi ali causajurca?
16Paica, huajchacunatapash, imagupash illajcunatapash llaquishpami mandajurca.
Chaimandami, paica ali causaita charirca.
Ñucata cazushpa causashpaca, ¿Nachu ali causaita charinga?” ninmi Mandaj Diosca.
17“Ashtahuangarin cambaj shungupica, ninanda charijyanata munashpallami causajungui.
Shinallata, alitalla rurashpa causaj runata huañuchishpa, tucuicunata llaquichishpa causanatallami yarijungui” ninmi.
18Shinamandami Josías runapaj churi, Judá llactata jatun mandaj Joacim runamandaca, Mandaj Diosca cashna nin:
“Pai huañujpica: ‘¡Aij ñuca huauquigulla, aij ñuca turigulla!’ nishpaca, na pipash huacangachu.
‘¡Aij ñuca taitalla! ¡Aij, ñuca jatun mandajlla!’ nishpapash, na llaquiringachu.
19Aisashpa apashpami, Jerusalén pungucunamandaca canllaman shitanajunga.
Burru huañushcata shitana utujupimi pambanajunga” ninmi.
20“Cunanga, Líbano shuti urcuman vichai rishpa, Basán shuti urcuman llujshishpa caita chaita, ninanda caparingui.
Shina caparijpipash, pipash na uyangachu.
Canda ninanda alicachijcunapash tucurircami.
21Ñucaca, can tucuita charishpa causajujpillatami rimarcani.
Ashtahuangarin canga, napacha uyangapa munarcanguichu.
Canga, chashnami chaira viñaimandapacha, Ñuca rimashcataca napacha uyanayachishpa causarcangui.
22Cambaj tucui mandajcunataca, huaira shamushpami apanga.
Canda alicachijcunapash, prezumi apai tucunajunga.
Shina cajpimi, can tucui na alita rurashpa causashcamandaca, ninanda pingai tucungui.
Tucui na alita can rurashcamandami, ninan llaquihuan causangui.
23Líbano urcumanda cedro caspicunahuan huasichishca huasipimi, cushijushca causarcangui.
Cunanga ¡Huahuata ungugrijuj huarmitashna, jatun nanai japijpimi, ninanda caparijungui!” ninmi.
24Mandaj Dios Ñucaca: “Juda llactata mandaj Joacim runapaj churi, Conías shuti runa, Ñuca maquipi surtija cajpipash, llujchishpami shitaiman.
25Canda huañuchingapa munashpa, ninanda manllachishpa charij runacunapaj maquipimi churagrini. Babilonia llactata jatun mandaj Nabucodonosor runapaj maquipi, caldeo runacunapaj maquipipachami, candaca churagrini.
26Candapash, cambaj mamatapash, canguna na rigsishca llactaman prezu apachunmi saquisha. Cangunaca chaipimi huañunguichi.
27Shina cashpami paicunaca, paicuna juyashca llactaman tigramungapa munashpapash napacha tigramui ushanga” ninmi.
28Cai Conías shuti runachu, ¿pipash na munashca, faquirishca alpa mangashna?
¿Pipash na munashca platoshnachu?
¿Imamandata paipash, paipaj miraicunapash, na rijsishca llactaman llujchishpa cachai tucurca?
29¡Cai llactapi causajcunalla, Mandaj Diospaj Shimita uyaichiyari!
30Mandaj Diosca, cashnami nin: “Cai runa imashna tucunata quilcaichi.
Paica, paipaj tucui causaipica shuj huahuatallapash na charingachu.
Paica, imata rurajushpapash na ali causai ushangachu.
Paipaj miraicunaca, David mandashpa tiyajushca tiyarinapica, na tiyaringachu.
Judá llactatapash, na mandangachu” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
