NEHEMÍAS 4 - Quichua Imbabura 2016

Fiñajcuna ama llaquichinajuchun ricurianajushcamanda

1Jerusalén muyundi jatun pircata ñucanchi alichinajujta Sanbalat shuti runa yachashpami, ninandapacha fiñarishpa, Judá llactapi causajcunataca na alicachishpa asijurca.

2Paica, paipaj cumbacunapaj ñaupajpipash, Samaria llacta macanajuj runacunapaj ñaupajpipashmi, cashna nirca: “Judá llactapi causanajuj, cai yanga runacunaca, ¿imatata ruranajun? ¿Diosman animalcunata cushpa cutin rupachinajuchunga saquishunllu? ¿Chai jatun pircata alichinataca, shuj punllapillachu tucuchinga? ¿Rupashpa tucurishca chai mundun rumicunataca, cutinllu alichi ushanga?” nircami.

3Shinallata, Amón llactamanda Tobías shuti runapash, Sanbalat shuti runahuan cashpami, cashna nirca: “Paicuna shayachishca rumi pircashcataca, shuj atuj shayarishpallatami urmachinga” nirca.

4“Ñucanchi Taita Dioslla, ñucanchita fiñaj runacuna ninanda na alicachishpa rimajtaca uyapailla. Chai rimashcacunaca, paicunapaj jahuapillata urmachun. Paicunataca, fiñajcunapash shuj llactaman prezu apashpa llaquichinajuchun saquipanguilla.

5Paicuna na alita rurashcataca, ama cungapanguichu. Paicunapaj juchatapash ama anchuchipanguichu. Paicunaca, pircata shayachijcunatami fiñarca” nishpami mañarcani.

6Muyundi jatun pircata shayachishpaca, tucuilla pircatami chaupicaman shayachishpa tucuchircanchi. Tucui gentecuna chaita rurana munaita charijpimi, chashna rurarcanchi.

7Shina cajpipash: Jerusalén muyundi jatun pircacunataca tucuillata alichijujta, pata utujucunatapash quilpajujtami Sanbalat shuti, Tobías shuti runacuna, árabe gentecuna, Amón llacta gentecuna, Asdod shuti pueblopi causajcuna yachaj chayarca. Shinamandami paicunaca, ñucanchitaca ninandapacha fiñarca.

8Shina fiñashpami, tucuicuna shujllashnalla parlarishpa, Jerusalenda llaquichingapa shamunata yarinajurca.

9Chaimandami, ñucanchi Taita Diosta mañashpa, tutandi punllandi ricunajuchun runacunata churarcanchi.

10Judá llactapi causajcunaca, cashnami ninajurca: “Cai pircacunata alichingapa imatalla yalichijcunami, ninanda shaijushca. Ashtaca pircacuna urmashca cajpimi, jatun pircata alichitaca na ushagrinchi” ninajurcami.

11Ñucanchita fiñajcunaca, cashnami ninajurca: “Paicunataca, paicuna imata ruranajujta saquichingapa, pipash na ricujta, pipash na yachajta yaicushpa huañuchishunchi” ninajurcami.

12Ashtahuangarin paicunapurapillata causanajuj Judá llactamanda runacuna shamushpami, cutin cutin cashna villanajurca: “Cangunataca, caimanda chaimandami llaquichingapa shamunga” ninajurcami.

13Shina villajpimi ñucaca, tucui huasi ucupuracuna imashna cashcashna pushashpa, jatun pircata nara jahuacaman pircashca huashapi, maipilla utujucuna tiyashcapi, espadacunahuan, tucsina jirrucunahuan, arcocunahuan ricushpa shayanajuchun churarcani.

14Chai jipaca, jatarishpa tucuita ricushpami, alicachi tucushcacunatapash, mandajcunatapash, tucui caishuj gentecunatapash cashna nircani: “Paicunapaj ñaupajpica, na manllanachu canguichi. Ashtahuangarin tucui ushaita charij, jatun Diostallami yarina canguichi. Cangunapaj huauquicunamanda, huahuacunamanda, ushicunamanda, huarmicunamanda, huasicunamandami macanajuna canguichi” nircanimi.

15Ñucanchita fiñajcunaca, paicuna llaquichigrijujta ñucanchi yachashcatapash, paicuna yarinajushcata Taita Dios yangapi churashcatapashmi yacharca. Chaimandami ñucanchica, jatun pircata alichingapaca, imata rurana cashcamanllata tucuicuna tigrarcanchi.

16Chai punllamandapachami, ñucapajta rurajcunamanda shuj chaupica, jatun pircata alichinajurca. Shuj chaupica tucsina jirrucunahuan, jarcarinacunahuan, arcocunahuan, jirru churajunacunata churajushcami shayanajurca. Paicunataca, Judá shuti runapaj huasi ucupuracunata mandajcunami ricunajurca.

17Jatun pircata rurajcunapash, imatalla yalichijcunapash, rumita aparijcunapash, espadacunataca na saquishpami tucuita ruranajurca.

18Tucuicunami paicunapaj cinturaspi espadata huatarishcacuna, pircataca shayachinajurca. Trompetata huacachij runapash, ñucahuanmi shayajurca.

19Alicachi tucushca runacunatapash, mandajcunatapash, tucui caishuj gentecunatapash, cashnami nircani: “Cai runacunaca, ashtacapacha cashcamandami, tucuicunallata carupi carupi canchi.

20Canguna maipi cashpapash, trompetata huacachij uyarijpica, tucuicuna shujlla pushtupi tandanajunguichi. Ñucanchi Taita Diosmi, ñucanchimandaca macanajunga” nircanimi.

21Ñucanchica, tucuicunami pircata shayachinajurcanchi. Shina cajpimi, chaupi genteca, tutamandamanda, chishi tutayangacaman, tucsishpa huañuchina jirrucunata chaririyaj shayanajurca.

22Shinallata chaipi imatalla rurajcunataca, tucuicunatami cashna nircani: “Tucuicunami cangunapajta rurajcunandi, cai Jerusalenbillata saquirina canguichi. Tutacunaca ricushpa, punllacunaca pircata alichishpami catina canguichi” nircanimi.

23Chaimandami ñucapash, ñuca huauquicunapash, chairalla viñaicunapash, tucuita ricujcunapash, churajunataca tutallapash na llujchircanchi. Armangapallami churajunataca llujchircanchi.