ISAÍAS 54 - Quichua Imbabura 2016

Mandaj Diosca, Israel gentecunataca causaita causaicaman juyashcamanda

1Huahuata na chari ushaj huarmilla, cushijunami cangui.

Shuj huahuatallapash na charij huarmilla, jatun cushijuihuan caparishpa candaichilla.

Jichui tucushca huarmirami, cusayuj huarmitapash yali ashtahuan huahuacunata charigrin” ninmi Mandaj Diosca.

2Cambaj causana huasitaca, ashtahuanmi mirachina cangui.

Can causana ucucunatapash, ashtahuanmi mirachina cangui.

Huasita shayachina pushtucunatapash, na manllashpami mirachina cangui.

3Cambaj miraicunaca, ninanda mirashpami, caiman chaiman jundanga.

Paicunami, ashtaca llactacunata japishpa, pueblocunapipash causanajunga.

4Ama manllaichu, candaca pipash na llaquichingachu.

Ama pingai tucuichu, candaca pipash na alicachishpa rimangachu.

Ashtahuangarin, chairalla viñai huarmi cashpa pingai tucushcatapash cunganguimi.

Sapalla cashpa llaquichi tucushcatapash, na ashtahuan yaringuichu.

5Canman causaita caraj Diosmi, cambaj cusashna canga.

Paica, tucuita Mandaj Diosmi.

Canda Quishpichijca, Israelcunapaj jucha illaj Diosmi.

Paitaca, tucui cai pachapi causajcunami, Taita Dios cajtaca yachanga.

6Candaca, cusa jichujpi, ninan llaquilla causajuj huarmitashnami, Mandaj Diosca cayarca.

Chairalla viñai huarmi cajpillata, cusa jichushca huarmitashnami, cambaj Taita Diosca cashna nijurca:

7“Huaquin punllatallami, candaca jichurcani.

Ashtahuangarin, ninandapacha llaquishpami, candaca cutin pushamugrini.

8Ñucaca, ashata fiñarishca cashpami, canda ama ricungapa, asha punllacunata anchurircani.

Shina cashpapash, causaita causaicaman llaquishpami, candaca juyasha.

Canda Quishpichij Mandaj Dios Ñucami, chashna nini.

9Noé shuti runa causajui punllacunapica:

‘Cai pachataca, napacha cutinga yacuhuan chingachishachu’ nishpami juramenturcani.

Chashnallatami canhuambash: ‘Cutinga na fiñarishachu. Cutinga candaca, na rimashachu’ nishpa juramentuni.

10Urcucunapash, lomacunapash cuyuringami.

Shina cajpipash, candaca ninanda llaquishpa juyajushallami.

Canman ali causaita carashapacha nishcatapash, napacha yangapi churashachu.

Canda llaquij, Mandaj Dios Ñucami chashna nini.

11Candaca, ninan huairahuan, tamiahuan tucuchijpimi llaquihuan causangui.

Shina cajpipash Ñucami candaca, ucuman callari rumicunata churashpa,

carbunclo rumicunahuan, zafiro rumicunahuan, cutin shayachisha.

12Cambaj ventanacunataca, juyailla rumicunahuanmi rurasha.

Cambaj pungucunatapash, carbunclo rumicunahuanmi rurasha.

Cambaj muyundi tucuilla jatun pircatapash, juyailla rumicunahuanmi shayachisha.

13Cambaj huahuacunataca, Mandaj Dios Ñucami yachachisha.

Cambaj churicunaca, ashtahuan ali causaigutami charinga.

14Imatapash alitalla rurashpami, juyailla churajushcashna cangui.

Canga, llaquichijcunamandaca, pacajpimi na manllashpa causangui.

Pipash na candaca, llaquichingapa shamungachu.

15Canda llaquichingapa shamujcunaca, na Ñuca cachajpi shamungachu.

Canda llaquichingapa shamujcunataca, canmi mishashpa llaquichingui.

16Ninapi jirruta rupajyachishpa, imamambash tigrachij runataca, Ñucami churarcani.

Chaimandami, paica tucui imatapash ruranlla.

Ñucallatami, llaquichishpa tucuchij runataca churarcani.

17Alipacha macanajungapa shayarishpapash, candaca na mishangachu.

Canda yangata juchachijcunataca, canmi llaquipi churangui.

Mandaj Dios Ñucapajta rurajcunaca, chashnami cushi causaita charinga.

Paicunataca, Ñucami quishpichisha” nijurcami Mandaj Diosca.