1 PEDRO 4 - Quichua Imbabura 2016

Taita Dios juyashcataca, aliguta ricushpami pactachina canchi

1Cristoca, ñucanchimandami Paipaj cuerpopi llaquita aparca. Shinallatami cangunapash, chai yuyaita charishpa, llaquicunataca apanalla canguichi. Maijambash, paipaj cuerpopi llaquita apajushpaca, juchata ruranataca ña saquishcami cana.

2Cai pachapi causaicamanga, na alita rurajcunapaj munaicunataca na catishpami, Taita Diospaj munaita rurashpa causana canguichi.

3Na crijcuna, na alicunata rurashpa causashcashna causanataca ñami saquina canguichi. Paicunaca: Na ali munaicunata rurashpa, aicha munaicunata rurashpa, machashpa ima munashcata rurashpa, shinallata, millanayai dioscunata mañashpami causanajurca.

4Chai gentecunaca, paicunahuan pacta ima na alitapash na ruranajujpimi, cangunataca na alicachishpa rimanajun.

5Ashtahuangarin, paicunapashmi, causajcunatapash, huañushcacunatapash, imatalla rurashcata tapuchishpa llaquichingapa shuyajuj, Diospaj ñaupajpi tucui ima rurashcata ricuchigrinata charin.

6Shinamandami huañushcacunamambash, quishpirinamandaca ña villashca cashca. Paicunataca, cuerpopica, runacuna llaquichishca cachun, ashtahuangarin, espiritupica, Taita Dios munashcashna causagrichunmi, chashna villashca cashca.

7Ashtahuangarin, tucui ima tiyashcapash, tucuilla tucurina punllami ña chayamujun. Shinamandami, aliguta yariashpa, rijchariajshna, Diosta mañashpa causana canguichi.

8Tucuimanda yalica, caishujhuan, chaishujhuan ninanda juyarishpami causana canguichi. Chai juyaimi, tucui juchacunataca anchuchinga.

9Na huasha parlarishpami, caishuj chaishuj mingachirina canguichi.

10Taita Dios, cangunata ninanda juyashpa, ima alicunatapash rurana ushaita carajpimi, aliguta ricushpa, shujcunaman ima alitapash rurashpa causana canguichi.

11Pipash alipacha rimai ushaj cashpaca, Taita Diospaj Shimi nishcatalla villachun ninimi. Maijan cashpapash, shujcunaman alita ruraj cashpaca, Taita Dios caramujun ushaihuan rurachun ninimi. Taita Diosca, Jesucristomandami, tucuipi ninandapacha alicachi tucunata charin. Taita Diosca, causaita causaicamanmi ninan ushaihuan, tucuita mandajunga. Chashna cachun.

Crijcuna cashpami, llaquita apanajunchi

12Juyashca crijcuna, ninan llaquicuna japimujpica, “cashnapacha jatun llaquicunataca na apashcanichu” nishpaca, na manllarinachu canguichi.

13Ashtahuangarin, chashna llaquicunata apanajushpaca, Cristo llaquita apashcashna apanajushpami, ninanda cushijuna canguichi. Ninan ushaihuan, punchapamba ricurimui punllapica, cangunapash ninandami cushijunguichi.

14Cristomanda, na alicachi tucunajushpaca, ninandami cushijuna canguichi. Cangunapaj shungupica, Diospaj Espiritumi ninan ushaihuan causajun. (Cangunata rimashpaca, chai Espiritutami na ali shimicunata rimanajun. Ashtahuangarin cangunaca, chai Espiritutami ninanda alicachinajunguichi).

15Shina cashcamandami cangunaca, huañuchishpa, shuhuashpa, na alita rurashpa, shujcunapaj causaipi satirishpa causaj gentecunashnaca, na llaquita apana canguichi.

16Maijan cashpapash, Cristota crishcamanda llaquita apajushpaca, na pingai tucushpami, Taita Diostaca ninanda alicachinguichi.

17Tucuita tapuchishpa llaquichina punllacunapica, Taita Diospaj huahuacunamandami callaringa. Cunan, ñucanchihuan chashna callarishpaca, quishpirinamanda villajujta na cazujcunatacarin, ¿imashnashi llaquichinga?

18“Alitalla rurajcunapash, ashamandallami quishpiringa.

Diosta na manllaj, juchayu gentecunacarin, ¿imashi tucunga?” nijunmi.

19Shina cashcamanda, Taita Dios munashcashna maijambash llaquita apajushpaca, cangunata ruraj, tucuita pactachij Diospaj maquipimi, cangunapaj almataca mingashpa, aliguta rurashpa causana canguichi.