GÁLATAS 5 - Quichua Imbabura 2016

Dios cacharichishca cajpimi, shinlli catina canguichi

1Cristo cacharichishca cajpimi, shinllipacha catina canguichi. Cutinga na gañanshna causanachu canguichi.

2Uyahuaichi, Pablomi cangunataca cashna nini: Circuncisionda rurashpaca, Cristo cangunamanda huañushcatami yangapi churanguichi.

3Caitapashmi nijuni: circuncisionda rurarishpaca, mandashca shimicunapi ima nijujtapash pactachinapachami canguichi.

4Mandashca shimicunata pactachijpimi, alitalla rurashcatashna chasquinga ninajushpaca, Cristomandami shicanyaringuichi. Diospaj ninan juyaimandapashmi anchurishcanguichi.

5Ñucanchica, Diospaj Espiritumandami alitalla rurashcatashna chasquinata crishpa, cushijushpa shuyanajunchi.

6Cristo Jesushuan cashpaca, circuncisionda rurashcapash, na rurashcapash, imapash na canllu. Ashtahuangarin, Jesusta crishpa, tucuicunahuan juyarishpa causanami ashtahuan ali.

7Cangunaca, alimi catinajurcanguichi. Na llullashpa villajuj Shimita ama cazuchunga, ¿cangunataca pita pandachircayari?

8Chashna pandarina yuyaicunataca, cangunata cayaj Diosca, na cushcangachu.

9Ashalla levadurapash, tucuilla masanatami punguichinga.

10Ñucaca, Apunchi Jesusta crij cashpami, cangunaca na pandaringachu yajuni. Ashtahuangarin, cangunata pandachijcunaca, maijan cashpapash, ninandapachami llaquichi tucunga.

11Juyashca crijcuna, “circuncisionda ruranami canguichi” nishpa villajushpaca, na catiriyashpa llaquichi tucuimanllu. Shinallata, Cristota cruzpi chacatashcata villajushpapash, pitapash na fiñachinmanllu.

12Circuncisionda ruranami canguichi nishpa pandachijcunaca, ¡paicunallata tucuilla cuchurishpachari ali canman!

13Juyashca crijcuna, ama huatashcashna causachunmi cangunataca agllarca. Shina cashpami aichapaj munaitaca na rurana canguichi. Ashtahuangarin, caishujhuan chaishujhuan, juyarishpami alita rurashpa causana canguichi.

14Shina cajpimi: “Canllata imashnami juyaringui, shinallata shujcunatapash juyana cangui” nijun. Chaita rurashpallami, mandashca shimicunataca tucuita pactachinajunchi.

15Ashtahuangarin, caishujmanda, chaishujmanda ninanda fiñanajushpa macanajushpara, pactarallapash cangunapura tucuringuichiman.

Aichapaj munaita ruranapash, Espiritupaj munaita ruranapash

16Caitapashmi nini: Diospaj Espíritu munashcashna causashpami, aichapaj munaitaca na rurana canguichi.

17Aichapaj munashcatalla rurashpaca, Diospaj Espiritutami llaquichin. Shinallata, Diospaj Espíritu munashcata rurashpaca, aicha munashcatami na pactachinga. Canguna munashcatalla ama rurachunmi, na ali munaicunahuan Diospaj Espirituhuan fiñarishpa shicanyarinajun.

18Ashtahuangarin, Diospaj Espíritu yarichijpi causanajujpimi, mandashca shimicunaca cangunataca na ashtahuan mandanga.

19Aichapaj munaitalla rurashpa causajcunaca, shutillami, chaicunaca: Huainayanajun, mapa munaitallami ruranajun, aicha munai mishajpimi causanajun.

20Rurashcalla dioscunatami mañanajun, brujurishpami causanajun, randimanda na ricunayachirishpami causanajun, fiñanajushpallami causanajun. Imata cashpapash ñucapajlla cashcanman yashpami ricunajun, fiñarishpa na ali tucushpami causanajun, caishuj chaishuj fiñajushpami purinajun, nimamanda na ali tucushpami causanajun, panda yuyaicunata ali nishpami shicanyarinajun.

21Shujcuna imata charishcata munashpami ricunajun, huañuchinajunmi, machanajunmi, na alitalla rurana munaihuanmi causanajun. Tucui chai na alicunata rurashpami causanajun. Cangunaman ña villashca cashpapash, cutinmi shinllita tacurishpa yarichini. Chashna na alitalla rurashpa causajcunaca, Taita Dios mandajuj llactamanga napacha yaicungachu.

22Ashtahuangarin, Diospaj Espiritupaj munaipi causana, caicunatami cun: Juyarishpa causanata, cushijushpa causanata, llaqui illaj causanata, na ñapash fiñarishpa causanata, shujcunaman alita rurana munaita, alita rurashpa imagutapash carashpa causanata, aliguta crishpa causanatami cun.

23Na jariyashpa causanata, na ali munaicunatapash mishashpa causanatami cun. Cashna causajcunataca, ima mandashca shimicunapash na llaquichingachu.

24Ashtahuangarin, Cristota chasquishcacunaca, causaipi tucui na ali munaicunataca tucuitami chacatashpa tucuchircanchi.

25Diospaj Espiritupi causajushpaca, Diospaj Espirituhuanllata purishunchi.

26Na yanga jariyashpami caishujmanda, chaishujmanda na fiñanajushpa causana canguichi. Shinallata, imata shujcuna charishcatapash, na caishujmanda chaishujmanda ñucapaj cashcanman yanachu canguichi.