1¿Canga, sacha chivocuna mashna quillapi huachajta yachanguichu?
Na cashpaca, ¿tarugacuna huachanajujta ricushcanguichu?
2¿Tarugacuna mashna quillata chichu cajta yupashcanguichu?
¿Ima quillapi huachanatapash yachanguichu?
3Paicuna siririshpa huachajpi, huahuacuna ña llujshijpica,
nanaitapash na ashtahuan charinchu.
4Paicunapaj huahuacunaca, jihuata micushpami shinlliyashpa catin.
Paicuna mamapajmanda rishpaca, cutinga na tigranllu.
5¿Pita, sacha burrutaca, cacharishca purichun churashca?
¿Pita, huatashcata cacharishpa saquishca?
6Ñucami chai animaltaca, chulunlla pushtupi causachun churarcani.
Imapash na fucuj pambacunapi causachunmi saquircani.
7Paica, pueblopi causanajuj ashtaca gentecunatapash, na cazunllu.
Shuj runa huashata caparishpa catijujpipash, na uyanllu.
8Paica, urcucunapi tiyaj jihuacunatami mascashpa micun.
Jihualla cachunmi, micungapa mascashpa purin.
9¿Búfalo huagraca, can ima nishcata rurangapa munangachu?
Na cashpaca, ¿cambaj corralpi causangapa munangachu?
10¿Búfalo huagrataca, yugushpa huatai ushanguimanllu?
¿Chai búfalo huagrahuan pambacunata yapui ushanguimanllu?
11Pai ninan shinlli cajpilla, ¿pailla imatapash rurachun saquinguimanllu?
¿Can imatalla ruranataca, pai rurachun saquinguimanllu?
12¿Granocunata pai tandachishpa,
trillana pambaman apamuchun saquinguimanllu?
13Pavo realmambash, ¿canllu juyailla alascunata curcangui?
Avestruz animalmambash, ¿canllu alascunata, plumacunata curcangui?
14Paica, lulungunataca alpapi huachashpami jichushpa saquin.
Chaicunaca alpapi cunujyashpami tugyan.
15Sarushpa faquinatapash,
sacha animalcuna sarushpa ñutunatapash na yarishpa saquinllami.
16Paipaj huahuacunataca, na pai huachashcashnami jichushpa saquin.
Pai huachashcapash, yangallata canataca na manllanllu.
17Paicunamanga, Taita Dios Ñucallatami, ali yachanataca na curcani.
Ali yuyaitapash, Ñucallatami na curcani.
18Pai viñashpa ña calpai callarishpaca,
caballotapash, caballopi tiyarishpa calpajujtapashmi mishashpa calpan.
19Caballomambash, ¿canllu ushaita curcangui?
Paipaj cungapi tiyaj milmatapash, ¿canllu churarcangui?
20¿Paitaca, langosta jurutashna manllachinguimanchu?
Paipaj singahuanga, shinllitami fucujun.
21Ninan shinlli cashpami, alpacunatapash aspishpa cushijun.
Paica, ima huañuchinahuan cajpipash, tuparingallami.
22Manllachingapa munajpipash, na manllarinllu.
Espadata ricuchijpipash, na manllashpa huashaman rinllu.
23Paipaj muyundipi flechacuna uyarijpipash,
huañuchina jirru, uchilla jirrucuna uyarijpipash na manllanllu.
24Paica ninanda fiñarishpami, alpata aspijun.
Trompetata huacachijpipash, na casilla shayarinllu.
25Ashtahuangarin, trompeta huacajpica, na manllashpami shinlli shayarin.
Paica macanajui tiyajtapash, carumandami mutijishpa yachan.
Macanajuj runacunata mandajcuna caparijtapash, caparishpa villajtapash uyanllami.
26¿Can mandajpichu, angaca jahuata jatarishpa rin?
Shinallata ¿can mandajpichu, alasta chutashpa jatarishpa uraman rin?
27Jatun angaca, ¿can mandajpichu huahuata charingapa alichirin?
Shinallata, ¿can mandajpichu jahua jahuacunapi tazinda ruran?
28Paica, jaca rumi chaupipimi causan.
Jaca rumi pundapi, jatun rumi umapimi, huasita ruran.
29Chai jahuamandami, maipi micuna tiyajta ricun.
Carumandami, paipaj ñavica ali ricujun.
30Paipaj huahuacunaca, yahuartami ufian.
Huañushcacuna maipi sirijujpipash, ñapashmi chaipi ricurin” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
