2 REYES 7 - Quichua Imbabura 2016

1Shinamandami Eliseoca, cashna nirca:

“Mandaj Dios rimashcata uyaichi. Mandaj Diosca cashnami nirca: ‘Cayapaca, canchis kilo yali ashtahuan ali jacutapash, chunga chuscu kilo chaupi yali cebadatapash, Samaria puebloman yaicunapica, chunga shuj gramota pezaj culquipajllami randinguichi’ ninmi” nirca.

2Shina nijpimi jatun mandajpajta ruraj shuj runaca, Eliseotaca cashna nirca:

“Jahua pacha ventanacunata, Mandaj Dios cunan pascajpipash, chaica na pactangachu” nircami.

Shina nijpimi Eliseoca, cashna nirca:

“Ricui, chaitaca cambaj ñavihuanmi ricungui. Ashtahuangarin chaicunataca, canga na micunguichu” nircami.

3Samaria puebloman yaicunapimi, lepra ungüihuan chuscu runacuna tiyanajurca. Paicunami, caishujmanda chaishujmanda:

“¿Imapata caipica huañungacaman tiyanajugrinchi? ninajurca.

4Cai puebloman yaicushpapash, pueblopi jatun yarjai tiyashcamandaca, chaipipash huañuringallatami. Caipi saquirishpapash, huañuringallatami. Chaipaj randica, Siria llacta gentecunapaj carpacunata shayachishca tiyanajuj pambaman cunanda chimbashunchi. Paicuna ñucanchita na huañuchijpica, causashunchimi, huañuchijpica, huañushunmi” ninajurcami.

5Shina nishpami, ña amsayanhuan, Siria llacta gentecunapaj carpacunaman rinajurca. Chaiman paicuna chayajpica, pipash illashcami carca.

6Mandaj Diosmi, Siria llacta gentecunapaj carpacunapica, macanajuna carretacunata, caballocunata, ashtaca macanajuj runacuna ninanda caparinajujta uyachishca carca. Chaita uyashpami: “Israel llactata jatun mandajmi, ñucanchihuan macanajungapa, heteo runacunata, Egiptopi causajcunata, jatun mandajcunaman culquita cushpa pushamushca yarin” ninajurca.

7Shinamandami paicunaca, amsayanhuan jatarishpa paicunapaj carpacunatapash, caballocunatapash, burrucunatapash saquishpa calpanajurca. Chashnami paicunaca, ama huañungapa tucuita saquishpa pacajushpa calpashca carca.

8Lepra ungüihuan runacunaca, carpacunaman chayashpa, yaicushpami, micunajurca, ufianajurca. Chaimandaca, culquita, curita, churajunacunatapash apashpami, pacangapa rinajurca. Chaimanda cutin tigrashpami, shuj carpaman yaicushpa, chai carpamandapash apashpa pacangapa rinajurca.

9Chai jipami, cashna ninajurca:

“Ñucanchica, na alitamari ruranajunchi. Cunandami caitaca villagrina canchi. Caya pacaringacaman na villagrijpica, ñucanchitaca na alita rurashcamandami llaquichinga. Cunanda jatun mandajpaj huasiman yaicushpa, villagrishunchilla” ninajurcami.

10Chaimandami paicuna shamushpaca, Samaria puebloman yaicunapi ricunajuj runacunaman caparishpa cashna ninajurca:

“Ñucanchimi, Siria llacta gentecunapaj carpacunaman rircanchi. Chaiman chayajpica, pipash illashpami, maijan parlajllapash na uyarirca. Ashtahuangarin caballocuna, burrucunallami huatashca shayanajurca. Carpacunapash, imashna shayachishcami shayanajurca” ninajurcami.

11Shina villajpimi, pungupi ricuj runacunaca, jatun mandajpaj huasi ucupi caparishpa villanajurca.

12Shina villajpimi, jatun mandajca tuta jatarishpa, paipajta rurajcunataca cashna nirca:

“Siria llacta gentecuna ñucanchita imata rurangapa munashcatami villagrini. Paicunaca, ñucanchi yarjachinajujta yachashpami: 'Paicunapaj pueblomanda llujshijpi, paicunataca, causajta japishpa, puebloman yaicushun' nishpami, paicunapaj carpacunamanda llujshishpa, pambapi pacajuriyanajunga” nircami.

13Shina nijpimi shuj runaca, cashna nirca:

“Cunanga, cai pueblopi saquirishca picha caballocunapi tiyachishpa, imashna cajta ricuchun cachashunchi. (Maijan caipi saquirishpapash, chai tucui Israelcuna yarjaimanda ña huañushcashnallatami huañunga)” nircami.

14Shina nijpimi, shuj carretata aisaj ishcai caballocunata apamujpi, jatun mandajca: “Siria llacta gentecunapaj carpacunaman rishpa imashna cajta ali ricugrichi” nishpa cacharca.

15Chashna cachajpimi paicunaca, Jordán yacu manñacaman rishpa, Siria llacta gentecuna muspaita calpashpa saquishca churajunacuna, ashtahuan imalla charishcacuna, ñambi sirinajujta ricurca. Chaimandami, ricungapa rij runacunaca, jatun mandajman villangapa tigramurca.

16Chaita villajpimi gentecunaca, chai pueblomanda llujshishpa, Siria llacta gentecunapaj carpacunapi imalla tiyashcacunata apamungapa rinajurca. Chaimandami Mandaj Dios nishcashnallata, canchis kilo yali ashtahuan ali jacutapash, chunga chuscu kilo chaupi yali cebadatapash, chunga shuj gramota pezaj culquipajlla jatunajurca.

17Jatun mandajca, paipajta ruraj cati mandajtami, pungupi ricushpa shayajuchun churarca. Chaipimi paitaca, gentecuna urmachishpa sarujpi, Taita Diospaj runagu villashcashna huañurca. Chaitaca, jatun mandajhuan urai shamujujpimi, chashna villashca carca.

18Taita Diospaj runaguca, jatun mandajmanmi cashna nishpa villashca carca: “Cayapallatami, Samaria puebloman yaicunapica, canchis kilo yali ashtahuan ali jacutapash, chunga chuscu kilo chaupi yali cebadatapash, chunga shuj gramota pezaj culquipajlla jatunajunga” nishcami carca.

19Taita Diospaj runagu chashna nijpimi, jatun mandajpajta ruraj cati mandajca: “Jahua pacha ventanacunata, Mandaj Dios pascajpipash, na chashna pactangachu” nishca carca. Shina nijpimi Eliseoca, cashna nishpa villashca carca: “Chaitaca, cambaj ñavihuanmi ricungui. Ashtahuangarin canga, na micunguichu” nishcami carca.

20Shina nishcashnami, chai runataca, puebloman yaicuna pungupi ricushpa shayajujpi, gentecuna sarushpa huañuchirca.