APOCALIPSIS 3 - Quichua Imbabura 2016

Sardis pueblopi crijcunamanmi villashca

1Sardis pueblopi tandanajuj crijcunapaj angelman, cashna quilcangui: ‘Ñucami, Taita Diospaj canchis espiritucunata, canchis luzerocunatapash charijushpa, cashna nini: Ñucami, can imatalla rurajujtapash ricujuni. “Causajmi cani” nijushpapash, huañushcashnami cangui.

2Can alita rurajushcataca, nara huañujshna tucurijpillatami, shinlliyachun, ricuriashpa alichina cangui. Can rurajushcacunaca, Taita Diospaj ñaupajpica, narapacha ali cajtami ricujuni.

3Imata yachachishcatapash, aliguta uyashpami, shungupi alichina cangui. Chai yachachishcataca, na ali causajushcamanda llaquirishpami, aliguta pactachina cangui. Can na chaita rurajpica, shuhuashnami, can na yachajta shamusha.

4Ashtahuangarin, Sardis pueblopi causanajuj, huaquingunaca churajunata na mapayachishpami causanajunguichi. Chashna ali cashpami, yuraj churajunata churajushpa, ñucahuan puringuichi.

5Tucui na alicunata mishajca, yuraj churajunatami churachi tucunga. Paipaj shutitaca, causaita causanata villajuj libromandaca, na anchuchishachu. Ñuca Taitamambash, Paipaj angelcunamambash, “caicunaca Ñucapaj huahuacunami” nishpami villasha.

6Maijambash rinrita charijca, tandanajuj crijcunaman Diospaj Espíritu villajujta uyanguichi’ nishpa quilcangui.

Filadelfia pueblopi crijcunamanmi villashca

7Filadelfia pueblopi tandanajuj crijcunapaj angelman, cashna quilcangui: ‘Jucha illaj cashpami, na llullashpa villajuni. Davidpaj pascanahuan Ñuca pascashcataca, pipash na vichai ushangachu. Vichashcatapash, na pascai ushangachu. Ñucami cashna nini:

8Can imata rurajujtapash alimi yachani. Ricui, can villajuchunga, cambaj ñaupajpi punguta pascajshnami saquishcani. Chaitaca, pipash na vichai ushangachu. Na yapa ushaita charishpapash, Ñuca villajushca shimicunataca, aligutami pactachijungui. Ñucataca na rijsinichu nishpaca, na nishcanguichu.

9Ricui, Satanasta yaringapa tandanajujcunatami, cambajman cachamusha. Paicunaca, na judiocuna cashpapash, “judiocunami canchi” nishpami llullanajun. Ricui, Ñuca canda juyajujta yachachunmi, paicunataca, cambaj ñaupajman pushamushpa cungurichisha.

10Ñuca mandashcataca, can aliguta pactachishcamandami, ninan llaquicuna japimuna punllapica, Ñucapash, candaca huacaichisha. Chai llaquicunaca, cai pachapi tucui causajcunata imashna cajta ricungapami chayamunga.

11Ricui,Ñucami ñapash shamusha. Can japina coronata, pipash ama quichui ushachunga, canga aliguta pactachishpa catijunallami cangui.

12Na alicunata mishajtaca, Ñucami, Ñuca Taita Diospaj huasipi pilartashna churana cani. Chaimandaca, cutinga na llujshingachu. Chaipica, Ñuca Taita Diospaj shutita, Ñuca Taita Diospaj pueblopaj shutitapashmi quilcasha. Chai puebloca, mushuj Jerusalenmi canga. Jahua pachapi tiyajuj, Ñuca Taita Diospajmanda uriajumuna, mushuj Jerusalenmi canga. Ñucapaj mushuj shutipashmi chaipica quilcasha.

13Maijambash rinrita charijca, tandanajuj crijcunaman, Diospaj Espíritu villajujta uyanguichi’ nishpa quilcangui.

Laodicea pueblopi crijcunamanmi villashca

14Laodicea pueblopi tandanajuj crijcunapaj angelman, cashna quilcangui: ‘Ricui, Ñuca ricushcatami, chashnapacha cajta, na llullashpa villajuni. Taita Diosca callaripica Ñucahuanmi, ima tiyachumbash tucuita churarca. Paica cashnami nin:

15Can imata rurajujtapash alimi yachani. Canga chiripash, rupapash na canguichu. ¡Canga chiri cashpa, na cashpaca rupaj cashpachari ali canguiman!

16Na chiri cashpa, na rupaj cashpa, cunujllalla cashcamandami, candaca shungu tigrachisha.

17Canga, “ñucallatami ninanda charijyashcani, na imapash illanichu” nijunguimi. Canga, llaquilla causaj, llaquinayai, imagutapash na charij, ñausa, lluchulla cashcataca na yachashpami causajungui.

18Chaimandami candaca: “Ninanda charijyangapa munashpaca, ninapi rupachishca juyailla Ñuca curita randihuai” nishpa aliguta yarichijuni. Ama pinganayai, lluchulla cangapaca, “yuraj churajunata Ñucata randishpa churajui” nishpami aliguta yarichijuni. Shinallata, ali ricungapaca, “colirio jambita cambaj ñavipi churaringui” ninimi.

19Ñuca juyashca huahuacunataca, tucuicunatami ali causachun, astishpa charini. Cunanga, Ñucatalla juyashpa, na alita rurashcamanda ninanda llaquirishpami, Ñucapajman tigrarina cangui.

20Ricui, Ñucami punguta huajtachijshna, “mingachihuai” nishpa cayajuni. Pipash Ñuca rimajujta uyashpa punguta pascajpica, paipajman shamushpa, paihuanmi micusha. Paipash Ñucahuanmi micujunga.

21Na alicunata mishajtaca, Ñuca mandashpa tiyarinapi Ñucahuan tiyajuchunmi churasha. Ñucapash na alicunata mishashpami, Ñuca Taitahuan, Pai mandashpa tiyarinapi tiyajuni.

22Maijambash rinrita charijca, tandanajuj crijcunaman, Diospaj Espíritu villajujta uyanguichi’ nishpa quilcangui” nihuarcami.