ZACARÍAS 7 - Quichua Imbabura 2016

Na micushpa mañashcata, Dios na chasquishcamanda

1Chuscu huata, iscun quillata, jatun mandaj Darío ña mandajujpi, Quisleu shuti quillapaj chuscu punllapimi Mandaj Diosca, Zacariasman villamurca.

2Chai punllacunami, Bet-el shuti pueblopi causajcunaca, Sarezer shuti runatapash, Regem-melec shuti runatapash, paicunata yanapaj runacunandi, Mandaj Diosta mañachun cachashca carca.

3Shinallata, tucuita Mandaj Diospaj huasipi causaj sacerdotecunata, profetacunata tapuchumbashmi, Bet-el shuti pueblopi causajcunaca cachashca carca, paicunataca: “¿Picha quilla chayajpica, huacanachu canchi? ¿Punda huatacuna rurashcashnallata, na micushpa mañashpa catinachu canchi?” nishpa tapuchunmi cachashca carca.

4Chaimandami tucuita Mandaj Diosca, cashna nihuarca:

5“Cai llactapi tucui causajcunata, sacerdotecunataca cashna ningui:

‘Cangunaca, cai canchis chunga huatapica,

picha quillapi, canchis quillapimi, huatan huatan,

na micushpa, huacashpa mañashpa causarcanguichi.

Shina rurashpaca, ¿Ñucata yarishpachu chashna mañarcanguichi?

6Micushpapash, ufiashpapash,

¿nachu cangunapajllata micurcanguichi, ufiarcanguichi?’

7¿Nachu cai shimicunataca, Mandaj Diosca, ñaupaj profetacunahuan ña villarca?

Jerusalenbi causajcunapash, chai pueblo muyundicunapi causajcunapash,

Neguev shuti, Sefela shuti pambacunapi causajcunapash,

aliguta causanajujpillatami, ¿nachu chashna villarca? ningui” nihuarcami.

Diosta na cazushcamandami, prezu apai tucushca

8Mandaj Diosca, Zacariasmanga cashnatapashmi nirca:

9“Tucuita Mandaj Diosca, cashnami nin:

‘Ima llaqui tiyajpipash, aliguta ricushpami alichina canguichi.

Tucuicunallata cangunapaj huauquicunataca, juyashpa, llaquishpami causana canguichi.

10Sapalla mamatapash, taita mama illaj huahuatapash,

caru llactamanda shamushca runatapash,

imaguta na charijtapash, na llaquichishpa charinachu canguichi.

Cangunapaj huauquicunataca, napacha llaquichinachu canguichi’ ninmi” nishpami villarca.

11Shina nijpipash na uyangapa munashpami, huashaman tigrarishpa, rinritapash taparishpa rinajurca.

12Paicunapaj shunguca, diamante rumishna shinlli tucushpami, tucuita Mandaj Dios, Paipaj Espirituhuan, ñaupaj profetacunaman mandashcatapash, Pai ima nishcatapash na uyanajurca. Chaimandami tucuita Mandaj Diosca, paicunataca ninandapacha fiñarirca.

13Tucuita Mandaj Diosca: “Ñuca cayajpipash, paicunaca na uyarcachu. Chashnallatami, paicuna caparishpa mañanajujpipash na uyarcani” ninmi

14Tucuita Mandaj Diosca, ashtahuambash cashnami nijun: “Shinamandami paicunataca, jatun acapanahuajshna na rijsishca llactacunaman llujchishpa cacharcani. Shina cajpimi, paicunapaj llactaca jichushca saquirijpi, pipash chaitaca na rinajurca. Paicuna munashca llactataca, pipash na munashca jichushca pambami tucurca” ninmi.