JEREMÍAS 52 - Quichua Imbabura 2016

Sedequías runa mandajushcamanda(2 Rey. 24:18-20; 2 Crón. 36:11-16)

1Sedequías shuti runaca, ishcai chunga shuj huatata charishpa, mandai callarishpami, chunga shuj huatata, Jerusalenbi mandajurca. Paipaj mamaca, Libna shuti pueblomanda Jeremiaspaj ushi Hamutal shutimi carca.

2Paipaj ñaupa taita Joacim shuti runa tucui na alita rurashcashnami, paipash Mandaj Diospaj ñaupajpica, na alita rurajurca.

3Shinamandami Mandaj Diosca, Jerusalenbi causajcunahuan, Judá llactapi causajcunahuan ninandapacha fiñarishpa, paipaj ñaupajmanda llujchishpa cacharca. Shinallata, Sedequías runaca, Babilonia llactata jatun mandajta na cazungapa munashpami jatarirca.

Jerusalenda llaquichishcatami villajun(2 Rey. 24:20—25:7; Jer. 39:1-7)

4Sedequías shuti runa, iscun huatata mandajujpi, chai huatapaj chunga quilla, chunga punllapimi, Babilonia llactata jatun mandaj Nabucodonosor runaca, paipaj macanajuj runacunandi Jerusalenbi causajcunahuan macanajungapa shamushpa, chaupipi churarca. Shina rurashpami, chai pueblo muyundipi torrecunata shayachirca.

5Chai pueblotaca, jatun mandaj Sedequías chunga shuj huatata mandangacamanmi, chaupipi churashca carca.

6Chai huatapaj chuscu quilla iscun punllapica, ima micunapash illajpimi, chai pueblopica, ashtahuan yarjai tiyarca.

7Shinamandami, chai pueblopaj jatun pircata utujushpa, macanajunata ali yachaj tucuilla runacuna tuta llujshishpa, rinajurca. Paicunaca, Caldeo runacuna chai pueblo muyundipi cajpitami, jatun mandajpaj huertapi shayajuj ishcai pircapaj punguta llujshishpa rinajurca. Arabá shuti pambaman rina ñandami paicunaca rinajurca.

8Shinamandami Caldeo runacunaca, jatun mandajta catishpa, Jericó pueblo pambapi japigrirca. Macanajuj tucui paipaj runacunaca, caita chaitami pacajushpa rishca carca.

9Jatun mandaj Sedequías runata japishpaca, Babilonia llactata jatun mandajpajmanmi, Hamat shuti pushtupi, Ribla shuti puebloman apamunajurca. Chaipimi, imashna llaquichinatapash mandarca.

10Babilonia llactata jatun mandajca, Sedequías runapaj churicunataca, paipaj ñaupajpillatami cungata fitishpa huañuchirca. Shinallata, Juda llactata cati mandajcunatapash, Ribla pueblopillatami cungata fitishpa huañuchirca.

11Ashtahuangarin Babilonia llactata jatun mandajca, Sedequías runataca ñavita surcuchishpami, cadenacunahuan huatashpa, Babiloniaman prezu aparca. Chai llactapimi, huañuna punlla chayangacaman, prezuna huasipi churarca.

Judá llactapi causajcunata prezu apashcamanda(2 Rey. 25:8-21; 2 Crón. 36:17-21; Jer. 39:8-10)

12Babilonia llactata jatun mandaj Nabucodonosor runaca, chunga iscun huatatami mandajurca. Chai huatapaj picha quilla, chunga punllapimi, Nabucodonosor runapajta ruraj Nabuzaradán shuti runaca, Jerusalenman shamurca. Paica, ricushpa shayaj runacunata mandajmi carca.

13Paica, Mandaj Diospaj huasitapash, mandashpa tiyajuna huasitapash, Jerusalenbi tucui huasicunatapash, tucui jatun huasicunatapashmi rupachirca.

14Chai mandaj runahuan shamuj caldeo macanajuj runacunaca, Jerusalén muyundi jatun pircatami urmachinajurca.

15Macanajuj runacunata mandaj Nabuzaradán shuti runaca, Jerusalenbi causanajuj huajchacunatapash, chai pueblomanda na llujshishca tucui gentecunatapashmi apachun mandarca. Babilonia llactata jatun mandajpajman yalijcunatapash, chai pueblopi puchushca tucuilla gentecunatapashmi, apachun mandarca.

16Chapaj runacunata mandaj Nabuzaradán runaca, Judá llactapi causaj huajchacunatapash, pambacunapi uvacunata tarpushpa causachunmi saquirca.

17Caldeo runacunaca, Mandaj Diospaj huasimanda bronce pilarcunata, yacuta apana carretacunata, Mandaj Diospaj huasipi tiyaj yacuta churashca jatun bronce pailatapashmi faquinajurca. Tucui broncecunatami Babiloniaman apanajurca.

18Shinallata calderocunata, palacunata, pavizata anchuchinacunata, cucharongunata, Diospajta rurangapa imatalla broncemanda rurashca tiyashcatami apanajurca.

19Inciensota cushnichinacunata, jatun tastacunata, copacunata, mangacunata, candelerocunata, platocunata, uchilla tastacunatapashmi apanajurca. Curita rurashcataca curipurallata, culquita rurashcataca culquipurallata tandachishpami apanajurca. Chapashpa shayanajuj runacunata mandajca, tucuitami aparca.

20Ishcai jatun pilarcacunata, yacuta churana jatun pailata, baza ucupi shayanajuj ishcai huagrata broncehuan rurashcacunata, Mandaj Diospaj huasipi tiyachunmi, Salomonga rurachishca carca. Tucui chaicunaca, na pezai ushanallami carca.

21Chai jatun pilarcunaca, ishcandillatami pusaj metrotashna charirca. Chaipica, racuta caupushca picha metro chaupishna puchahuan pillushcami carca. Chai bronce pilarca, canchis centímetro racu muyushcami carca. Chai chaupipica, utujumi carca.

22Chai pilar jahuacunapi capitelcunaca broncehuan rurashcami carca. Chaicunaca, ishcai metroshna jatunmi carca. Chai jahuapica, linllicunata, granadacunata, bronceta rurashpa muyuchishcami carca. Chaishuj pilarpash, chashnallata granadacunata churashcami carca.

23Chaipica, iscun chunga sucta granadacunata cati cati churashpa huarcushcami carca. Shinallata tucuilla uma muyundipica, patsaj granadacunatami churashca carca.

24Chapashpa shayaj runacunata mandajca, Seraías shuti mandaj sacerdotetapash, cati mandaj Sofonías shuti sacerdotetapash, Diospaj huasi patiopi ricushpa shayaj, quimsa runacunatapashmi aparca.

25Jerusalén pueblomandaca, macanajuj runacunata mandajtapash, jatun mandajman ali yuyaita cuj canchis mandajcunatapashmi aparca. chai llactamanda macanajuj runacunapaj shuticunata quilcashpa charijuj mandajtapashmi aparca. Shinallata, Judá llactamanda sucta chunga mandajcunatapashmi, chai pueblopi cajpi aparca.

26Tucui paicunatami, ricushpa shayanajuj runacunata mandaj Nabuzaradán runaca, Babilonia llactata jatun mandajpajman, Ribla shuti puebloman aparca.

27Babilonia llactata jatun mandajca, Hamat shuti llactapi tiyaj Ribla pueblopimi chai gentecunataca huañuchirca.

Chashnami, Judá llactapi causajcunaca, paicunapaj llactamanda prezu apai tucurca.

28Nabucodonosor runaca, Judá llactamandaca, tucui caicunatami prezu aparca: Pai mandajui canchis huatapica, quimsa huaranga ishcai chunga quimsa runacunatami aparca.

29Nabucodonosor runallatami, pai mandajui chunga pusaj huatapica, pusaj patsaj quimsa chunga ishcai runacunata, Jerusalenmandaca prezu aparca.

30Nabucodonosor runa mandajui ishcai chunga quimsa huatapica, macanajuj runacunata mandaj Nabuzaradán runami, canchis patsaj chuscu chunga pichata, Judá llactamanda runacunata prezu aparca. Tucuimandaca, chuscu huaranga sucta patsaj runacunatami prezu aparca.

Joaquín runata prezumanda llujchishpami, Babilonia llactapi alicachinajushca(2 Rey. 25:27-30)

31Judá llactata jatun mandaj Joaquín runaca, quimsa chunga canchis huatapaj, chunga ishcai quillapi, ishcai chunga picha punllata prezu causajujpimi, Evil-merodac shuti runaca, Babilonia llactataca, shuj huatata ña mandajurca. Chai huatapimi, Joaquín runataca prezumanda llujchishpa, jatumbi churarca.

32Paihuanga aliguta parlashpami, Babilonia llactapi jatun mandajcuna tiyanajushcatapash, ashtahuan yalipi churarca.

33Shinallata, prezuna huasipi tiyajushpa churajushcataca surcuchishpami, shuj churajunata churachirca. Joaquín runaca, paipaj tucui causaipimi, jatun mandajhuan micushpa causajurca.

34Babilonia llactata jatun mandajca, punllandimi paimanga ali micunata caran carca. Paica, huañungacamanmi chashna causajurca.