1 SAMUEL 24 - Quichua Imbabura 2016

Davidca, Saulta na huañuchishcamanda

1Filisteocunata mishashpa Saúl tigramujpica: “Davidca, En-gadi shuti jichushca pambapimi purijun” nishpami villanajurca.

2Shina nijpimi Saulca, tucui Israelcunamanda, quimsa huaranga runacunata agllashpa, Davidtapash, paita catijcunatapash, sacha chivocuna causaj, jaca rumicuna tiyaj jahuacunapi mascagrirca.

3Shina mascajushpami Saulca, llamacuna shayanajuj pushtuman chayarca. Chaipimi Saulca, shuj jatun jaca utujuman ishpangapa yaicurca. Davidpash, paita catij runacunandimi, chaipillata, ashtahuan ucu juchuman pacajushca carca.

4Chaipimi Davidta catij runacunaca: “Mandaj Diosmi, canda fiñaj runataca, cambaj maquipi, can munashcata rurachun churashca. Chaitami can rurachun pactachishca” ninajurcami. Shina nijpimi Davidca, upalla jatarishpa, Saulpaj jahualla churajushca pundata fitirca.

5Saulpaj jahualla churajushca pundata fitishca jipami Davidca ninanda manllarirca.

6Chaimandami paita catijcunataca, cashna nijurca: “Mandaj Dios agllashpa churashca, ñucata mandajta huañuchinamandaca, Mandaj Diosllata jarcahuachun. Paica, Mandaj Dios agllashpa churashcami” nijurcami.

7Shina shinllita rimashpami Davidca, paita catijcunataca, Saulta ama huañuchinajuchun jarcarca. Chai jipaca Saulca, chai utujumanda llujshishpa rircallami.

8Davidpash chai utujumanda llujshishpaca: “¡Jatun mandaj, Jatun mandaj!” nishpami caparirca. Shina caparijpi, Saúl tigrarishpa ricujpimi Davidca, cungurishpa alpaman chayajta cumurirca.

9Chaipimi Davidca, Saultaca cashna nirca: “Ricui: ‘Davidca, candaca huañuchingapami munajun’ nij runacunataca, ¿imashpata cazungui?

10Mandaj Diosllata, ñuca maquipi churashcatapash canllata ña ricunguimi. Shinallata: ‘Paitaca huañuchilla’ ninajujpipash, cashnami nircani: ‘Ñucata mandajca, Mandaj Dios agllashpa churashcami. Shina cashcamanda, na huañuchingapa munashpami, candaca quishpichircani.

11Ñuca taitalla. Ricui, cambaj jahualla churajushca pundata fitishcataca, ñucami charijuni. Cambaj jahualla churajushca pundata fitishpapash, candaca na huañuchircanichu. Cunanga, canda na umachishpa, na fiñashpa ima juchata na rurashcatapash ña yachanguimi. Ashtahuangarin, canmari ñucataca, huañuchingapa purijungui’ nircanimi.

12Shinallata candapash, ñucatapash Mandaj Diosllata ricuchun. Ñucata, can llaquichishcamandaca, Mandaj Diosllata candapash llaquichishca cachun. Ashtahuangarin ñuca maquihuanga, na candaca llaquichishachu.

13Ñaupa taitacunapaj yarichij shimicunapica: ‘Diosta na manllajcunami, ima na alitapash ruran’ nijunmi. Ashtahuangarin, candaca na llaquichishachu.

14Israelcunata jatun mandajca, ¿pitata catishpa llujshimurcangui? ¿Pitata catiriyajungui? ¿Huañushca alcuta, na cashpaca shuj piquitachu catiriyajungui?

15Chaitaca, Mandaj Diosllata, candapash, ñucatapash ricushpa llaquichijuchun. Imata rurashcatapash, paillata ali ricushpa, ñucata mitsashpa, cambaj maquimanda quishpichijuchun” nijurcami.

16Chashna nishpa David tucuchinhuanmi, Saulca: “¿Nachu ñuca huahua Davidllata, cashna nijuhuangui?” nishpa ninanda huacarca.

17Saulca, Davidtaca, cashnami nijurca: “Canga, ñucatapash yali, ali cashcatapacha rurajmari cangui. Canda na alita rurashpa, ñuca llaquichijujpipash, canga alitallami rurashcangui.

18Cunambashmi, canga ñucahuan alita rurashpa ricuchihuashcangui. Mandaj Dios, cambaj maquipi churajpipash, na huañuchishpami quishpichihuashcangui.

19¿Maijan runashi, paita fiñajhuan tuparishpaca, na huañuchishpa saquinman? Cunan punlla ñucata quishpichishcamandaca, Mandaj Diosllata canmanga imatapash aliguta rurachun.

20Cunanga, can mandaj tucunatapash, Israelcunata mandashpa, alipacha shinlli canatapash, alimi yachani.

21Cunanga, ñuca huañushca jipaca: 'Cambaj miraicunatapash, cambaj taitapaj mirai ayllucunatapash na tucuchishachu' nishpa, Mandaj Diospaj shutipi juramentuhuai” nijurcami.

22Shina nijpimi Davidca, Saulpaj ñaupajpi juramenturca. Chai jipaca Saulca, paipaj huasiman rircallami. Shinallata Davidpash, paita catijcunandimi, pacajungapa rurashca pushtuman vichai rinajurca.