JUECES 20 - Quichua Imbabura 2016

Benjamín aylluhuan macanajushcamanda

1Tucui Israelcunami, Dan shuti pueblomandaca, Beerseba pueblocaman, Galaad llactapi tucui causajcunandi, Mandaj Diospaj ñaupajpi shujllashnalla tucushpa, Mizpa shuti pueblopi tandanajurca.

2Taita Dios agllashca gentecunapaj tandanajuipica, tucui Israel ayllucunata mandajcunapashmi, tandanajushca carca. Chaipica, espadahuan macanajunata ali yachaj, chuscu patsaj huaranga runacunami tandanajushca carca.

3Benjamín ayllupaj miraicunaca, Israelcuna Mizpa shuti puebloman vichai rishcatami yacharca.

Israelcunami levita runataca: “Imashpata cai jatun na alitaca rurashcayari. Chaita yachangapami munanchi” ninajurca.

4Shina ninajujpimi, chai huañushca huarmipaj cusa levita runaca, cashna nijurca: “Benjamín ayllupaj llacta, Gabaa shuti pueblopi pacaringapami, ñuca huarmindi rircani.

5Chai Gabaa shuti pueblopi causajcunaca, ñucata llaquichingapa munashpami ña tutayajpica, ñucata huañuchina yuyaihuan, ñucanchi tiyajuj huasi muyundipi shayanajurca. Paicuna alita rurashpa llaquichijpimi, ñuca huarmica huañurca.

6Chaimandami, huañushca ñuca huarmitaca, asha asha fitishpa, Israelcuna causanajuj tucui llactacunaman cacharcani. Israel llactapi na alita rurashpa huañuchishcamandami, chashna cacharcani.

7Ricuichi, tucui cangunami, Israel ayllucuna canguichi. Shina cashcamanda, imata rurana cashpapash, aliguta yarichilla” nijurcami.

8Shina nijpimi, tucuicuna shujllashnalla yarishpa jatarishpa, cashna ninajurca: “Ñucanchipuramandaca, maijambash na paipaj carpaman ringachu. Maijanllapash na paipaj huasiman tigrangachu.

9Ashtahuangarin cunanga, Gabaa pueblopi causajcunahuan macanajungapaca cashnami rurashun: Pipaj urmajta ricungapa rurashpami, macanajungapa vichai rishunchi.

10Israel ayllupuramandaca, patsajmanda chungata, huarangamandaca patsajta, chunga huarangamandaca, shuj huaranga runacunata agllashpa, gentecunaman micunata apamuchun cachashunchi. Caishujcunaca, Benjamín llactapi tiyaj Gabaa shuti pueblopi causajcunapajman rishpa, ñucanchi Israelpuracunapi, tucui na alicunata rurashcashnallata paicunatapash llaquichishunchi” ninajurcami.

11Shina nishpaca, tucui Israelcunami Gabaa pueblopi causajcunahuan macanajungapa, shujllashnalla yarishpa huatarishcashna tandanajurca.

12Chaimandami Israel ayllucunaca, Benjamín ayllu runacuna causanajuj tucui llactapi, cashna nichun cacharca: “Cangunapuramandaca, ¿imashpata cashna na alita rurarcanguichi?

13Shina cashcamanda cunanga, cai Gabaa pueblopi causanajuj na alita ruraj runacunata huañuchingapa llujchimuichi. Shina rurashpami, chai jatun na alitaca cai Israel llactamanda tucuchishun” nichunmi cacharca.

Ashtahuangarin Benjamín ayllu runacunaca, paicunapaj huauqui Israelcuna chashna nishcataca na uyangapa munarcachu.

14Benjamín ayllu runacunaca, Israelcunahuan macanajungapami, Gabaa pueblo muyundipi tiyaj pueblocunamanda tandanajurca.

15Chai punllapica Benjamín ayllu runacunataca, espadahuan macanajunata ali yachaj, ishcai chunga sucta huaranga runacunatami, tucuilla pueblocunamanda yupashca carca. Gabaa shuti pueblopi causanajuj, canchis patsaj agllashca runacunataca, na yupashcachu carca.

16Chai tucui runacunamandaca, imata cashpapash lluqui maquihuanlla ruraj, canchis patsaj runacunatami agllashca carca. Paicunaca, huaracahuan rumita shitanata alipacha yachashpami, shuj ajchapi chayachingapa rumita shitashpapash na pandan carca.

17Benjamín ayllu runacunata na yupajpipash, caishuj Israel ayllu runacunaca, espadahuan macanajunata ali yachaj, chuscu patsaj huaranga runacunami carca.

18Chai jipaca, Taita Diospaj huasiman vichai rishpami, Israelcunaca, Taita Diosta cashna nishpa tapunajurca: “¿Benjamín aylluhuan macanajungapaca, ¿maijan aylluta pundaca vichai rina capanchi?” ninajurcami. Shina nijpimi, Mandaj Diosca: “Judá ayllurami macanajugringa” nirca.

19Shina nijpimi, Israelcunaca tutamandata jatarishpa, Gabaa pueblopi causajcunahuan macanajungapa rinajurca.

20Shinami Israelcunaca, Benjamín aylluhuan macanajungapa llujshirca. Shina llujshishpami Israelcunaca, Gabaa pueblopi macanajungapa alichirinajurca.

21Ashtahuangarin Benjamín ayllu runacuna, Gabaa pueblomanda llujshishpa macanajushpami, ishcai chunga ishcai huaranga Israel runacunata, chai punllapica huañuchirca.

22Shina cajpipash Israel runacunaca, cutinllata shinlli tucushpami, punda punlla macanajungapa alichirishca pambapillata cutin macanajungapa llujshinajurca.

23Israelcuna vichai rishpami, Mandaj Diospaj ñaupajpi tutayangacaman huacashpa, Mandaj Diostaca cashna nishpa tapunajurca: “¿Ñucanchi huauqui Benjamín aylluhuanga, cutinllu macanajugrishun?” ninajurcami. Shina nijpimi, Mandaj Diosca: “Paicunahuan macanajungapa vichai richilla” nirca.

24Shinamandami Israelcunaca, Benjamín aylluhuanga, cayandi punllapash cutin macanajugrirca.

25Chai cayandi punllapash Benjamín ayllu runacunaca, Gabaa shuti pueblomanda llujshishpami, Israelcunahuan macanajurca. Chaipimi, chunga pusaj huaranga Israelcunata huañuchirca. Chai huañuj runacunaca, tucuicunami espadahuan macanajunata ali yachajcuna carca.

26Chaimandami, Israelcunaca, tucui gentecunandi, Taita Diospaj huasiman vichai shamunajurca. Chaipimi, Mandaj Diospaj ñaupajpi tiyarishpa, chai punllapica na micushpa tutayangacaman huacanajurca. Shinallata, animalcunata cushpa tucuillata rupachishpami, Mandaj Dioshuan ali cangapa, ofrendacunata caranajurca.

27Israelcunaca, cutinmi Mandaj Diosta tapunajurca. (Taita Dioshuan ari ninajushpa quilcashcata alichina arcami, chai punllacunaca chaipi carca.

28Chai punllacunapica, Aaronbaj churi Eleazar shuti runapaj churi Finees shuti sacerdotemi, chai arcapica Taita Diospajta rurajurca).

Chaipimi Israelcunaca, Mandaj Diostaca cashna nishpa tapunajurca: “Ñucanchi huauqui Benjamín aylluhuanga, ¿cutinllu macanajugrishun, na cashpaca saquinallachu capanchi?” ninajurcami.

Shina nijpimi, Mandaj Diosca: “Macanajugrichilla, Ñucami cayapaca cangunapaj maquipi churasha” nirca.

29Shina nijpimi Israelcunaca, Gabaa shuti pueblo muyundipi pacalla chapajcunata churarca.

30Ña quimsa punlla tucujpimi Israelcunaca, Benjamín ayllupaj miraicunahuan macanajungapa vichai rirca. Chaipimi paicunaca, Gabaa pueblo chimbapurapi, punda punllacunashna macanajungapa llujshinajurca.

31Benjamín ayllupaj miraicunaca, Israelcunahuan tuparingapa llujshishpami, Gabaa shuti pueblomanda caruyanajurca. Chaipimi Israelcunataca, pundashnallata ñangunapi huañuchi callarirca. Chai ñangunaca, shujca Bet-el shuti puebloman rina ñanmi, caishujca pambacunata yalishpa, Gabaa puebloman rina ñanmi carca. Chaipipash, quimsa chungashna runacunatami huañuchirca.

32Chashna huañuchishpami, Benjamín ayllupaj miraicunaca: “Pundashnallatami, paicunataca mishanajunchi” ninajurca. Ashtahuangarin Israelcunaca, cashnami ninajurca: “Paicunata pueblomanda ashtahuan caruyachingapaca, pacajungapa calpashunchi” ninajurcami.

33Israelcunaca, paicuna tiyanajushca pushtumanda jatarishpami, Baal-tamar shuti pueblomanda macanajungapa llujshinajurca. Gabaa pueblopi tiyaj michina pambacunapi pacalla chapanajuj Israelcunapashmi llujshinajurca.

34Gabaa pueblopi causajcunahuan macanajungapaca, tucui Israelpuramanda agllashca chunga huaranga runacunami shamurca. Chai macanajuica, ashtahuanmi shinlliyajurca. Ashtahuangarin Benjamín ayllu runacunaca, ninan llaqui paicunata japigrijujtaca na yacharcachu.

35Israelcunaca, Mandaj Dios ushaita cujpimi, chai punllapica Benjamín ayllucunataca, ishcai chunga picha huaranga shuj patsaj runacunata huañuchirca. Chaicunaca, espadahuan macanajunata ali yachajcunami carca.

36Benjamín ayllu runacunaca, mishai tucunajushcatami ricunajurca. Gabaa pueblo huashapi pacalla chapanajuj caishuj Israelcunaca, macanajushpa mishangallami yashpami, Benjamín ayllu runacunahuanga, na macanajushpa anchurinajurca.

37Pacalla chapanajuj runacunaca, Gabaa puebloman cungashcapi yaicushpami, chai pueblopi causajcunataca tucuillata espadahuan huañuchirca.

38Pacalla chapanajuj Israelcunahuan, caishuj Israelcunahuanga: “Chai pueblomandaca, cushnita vichai cachashpa ricuchinguichi” nishpami, paicunapura ña parlarishcalla carca.

39Benjamín ayllu runacunaca, Israelcuna tigrashpa calpanajujpimi, Israel runacunataca, catishpa quimsa chungatashna huañuchirca. Shinamandami, cashna ninajurca: “Paicunataca, pundashnami mishanajunchi” ninajurcami.

40Ashtahuangarin pueblomandaca, pilarshna cushni vichai llujshi callarijpimi, Benjamín ayllu runacunaca huashaman tigrarishpa ricunajurca. Chai cushnitaca, jahua pachacaman ninanda vichai rijujtami ricunajurca.

41Chaimandami Israelcunaca, Benjamín ayllu runacunahuan macanajungapa tigrarirca. Ashtahuangarin paicunata ninan llaqui japijujta yachashpami, ninanda manllarinajurca.

42Chaimandami Israelcunapaj ñaupajmanda tigrarishpaca, jichushca pambaman rina ñanda calpanajurca. Ashtahuangarin Israelcunaca, huashata catijcunapash japigrishpa, pueblocunamanda llujshijcunapash tuparishpami, chaupipi churashpa, paicunataca huañuchishpa tucuchirca.

43Chashna muyundi jarcashpami, Benjamín ayllu runacunataca, Menúha shuti pueblomandapacha, indi llujshimujman tiyaj Gabaa shuti pueblo muyundi chimbapuracaman catishpa huañuchishpa tucuchinajurca.

44Benjamín ayllu runacunataca, chunga pusaj huaranga macanajunata ali yachaj runacunatami huañuchirca.

45Cutin tigrashpami, Rimón shuti jaca rumicunapi pacajungapa, jichushca pambata calpanajurca. Paicunatapash, picha huaranga runacunatami ñangunapi huañuchirca. Shinallata, Gidom shuti pueblocaman catishpami, ishcai huaranga runacunata huañuchirca.

46Chai punllapica, Benjamín ayllupuramanda tucui huañushcacunaca, espadahuan macanajunata ali yachaj, ishcai chunga picha huaranga runacunami carca. Paicunaca, tucuicunami macanajunata ali yachajcuna carca.

47Ashtahuangarin Benjamín ayllupuramanda sucta patsaj runacunaca, jichushca pambaman tigrashpami, Rimón shuti jaca rumi ucucunapi pacajunajurca. Chaipimi, chuscu quillacaman causanajurca.

48Israel runacunaca cutin tigrashpami, Benjamín ayllu runacunataca, tucui pueblocunapi causajcunatapash, animalcunatapash, tucui imalla ricurishcata, espadahuan huañuchishpa tucuchinajurca. Shinallata, ricurishca pueblocunatami rupachishpa tucuchinajurca.