2 REYES 16 - Quichua Imbabura 2016

Acaz shuti runa mandajushcamanda(2 Crón. 28:1-27)

1Remalías shuti runapaj churi Peka shuti runaca, chunga canchis huatata Israel llactata ña mandajujpimi, Jotam runapaj churi Acaz shuti runaca, Judá llactata mandai callarirca.

2Acaz runaca, ishcai chunga huatata charishpa mandai callarishpami, chunga sucta huatata Jerusalenbi mandajurca. Paica, Mandaj Taita Diospaj ñaupajpica, ñaupa taita David alita rurashcashnaca na rurarcachu.

3Paica, Israel llactata jatun mandajcuna na alita rurashcashnami rurajurca. Ashtahuangarin, chai llactapi punda causajcuna, na ricunayaita rurashcashnami paipaj churitapash ninapi rupachirca. Mandaj Diosmi chai gentecunata Israelcunapaj ñaupajmanda calpachirca.

4Shinallata, lomacunapi tiyaj altarcunapi, uchilla lomacunapi, fanga junda quiru ucucunapimi, animalcunata huañuchishpa, inciensotapash cushnichijurca.

5Shinamandami, Siria llactata jatun mandaj Rezín shuti runapash, Remalías shuti runapaj churi Israel llactata jatun mandaj Peka shuti runapash, Jerusalenbi causajcunahuan macanajushpa, Acaz runata chaupipi churashpa japingapa vichai shamunajurca. Shina shamushpapash, na japi usharcachu.

6Chai huatallatami, Edom llactata jatun mandajca, Elat shuti pueblota Edom llactapajllata cachun cutin quichurca. Chaimandami Judá llactamanda runacunataca, Elat pueblomanda llujchishpa cacharca. Shina cachashpami, Edom llacta runacunaca, Elat pueblopi cunangaman causanajun.

7Chaimandami Acaz runaca, Asiria llactata jatun mandaj Tiglat-pileser shuti runaman cashna nichun, paipaj randi parlajcunata cacharca: “Cambajta ruraj ñucaca, cambaj churishnallatami cani. Shina cashcamanda, Siria llactata jatun mandajpaj maquimandapash, Israel llactata jatun mandajpaj maquimandapash, yanapangapa vichai shamupai. Paicunami, ñucata llaquichingapa jatarishca” nichunmi cacharca.

8Mandaj Diospaj huasipipash, jatun mandaj mandashpa tiyajuna huasipipash alichishca culquita, curita japishpami Acaz runaca, Asiria llactata jatun mandajman carachun cacharca.

9Chai carashcata japishpami, Asiria llactata jatun mandajca, Damasco pueblopi causajcunahuan macanajungapa vichai rishpa, chai pueblotaca japirca. Chai pueblopi causajcunatapash, Asiria llactata jatun mandajca, Kir shuti pueblomanmi prezu aparca. Shinallata Rezín shuti runatapashmi huañuchirca.

10Chai jipami, jatun mandaj Acaz runaca, Asiria llactata jatun mandaj Tiglat-pileser shuti runata, Damasco pueblopi tuparingapa rirca. Chaiman chayashpami, jatun mandaj Acaz runaca, Damascopi tiyaj altarta, imashna cajta, imashna rurashcata ricushpami, sacerdote Uriasman, chai altar imashna cajta villachun cacharca.

11Sacerdote Uriasmi, altartaca rurarca. Jatun mandaj Acaz, Damasco pueblomanda altar imashna cajta villachun cachamushcashnami rurarca. Chaita rurangacamanmi, jatun mandaj Acaz runaca, Damasco pueblomanda tigramujurca.

12Damasco pueblomanda tigramushca jipami, jatun mandajca chai altarta ricurca. Chai altarman quimirishpami, jatun mandajca chai altar jahuapi animalcunata cushpa huañuchirca.

13Shinallata, animaltapash tucuillata rupachishpa, ashtahuan imatapash carashpami, vinotapash chai jahuapi talirca. Dioshuan ali cangapa carashpa huañuchishca animalcunapaj yahuartapashmi, altarpi tsirapachirca.

14Chai jipami, Mandaj Diospaj ñaupajpi tiyajuj bronce altarta anchuchishpa, mushuj altar janajman churarca. Chai bronce altarca, Diospaj huasihuan, mushuj altarhuan chaupipi churashca carca.

15Chai jipami, jatun mandaj Acaz runaca, sacerdote Uriastaca cashna nirca: “Cai altarpica, tutamanda tucuillata rupachingapa Diosman cushca animaltapash, chishi rupachingapa cushcatapash rupachingui. Tucuillata rupachingapa ñuca cushca animaltapash, ashtahuan imatalla cushcatapash tucuillata rupachingui. Shinallata cai llactapi causaj gentecuna. Diosman tucuillata rupachingapa cushcatapash, ashtahuan imatalla cushcatapash rupachishpa, vinotapash talingui. Shinallata, tucuillata rupachina animalpaj yahuartapash, huañuchishca animalcunapaj yahuartapash, cai altarpica tsirapachingui. Cai bronce altartaca, Diosta ñuca tapungapallami charisha” nircami.

16Sacerdote Uriasca, jatun mandaj Acaz runa imashna mandashcashnami, tucuita rurarca.

17Jatun mandaj Acaz runaca, yacu pilunta vichai charijuj tablacunata cuchushpami, chaicunatapash anchuchirca. Bronceta rurashca huagracunapaj jahuapi churashca jatun yacu piluntapash anchuchishpami, rumicunata churashca jahuapi churarca.

18Shinallata, samana punllacunapi tandanajungapa Diospaj huasipi rurashca corredortapash, jatun mandaj yaicuna ñandapashmi, Mandaj Diospaj huasimandaca anchuchirca. Asiria llactata jatun mandajta manllaimandami chashna rurarca.

19Acaz shuti runa imatalla ashtahuan rurashcacunapash, ¿nachu Judá llactata jatun mandajcuna imatalla rurashcacunata quilcashca libropi tiyajun?

20Jatun mandaj Acaz runa huañushpa, paipaj ñaupaj taitacunahuan tandanajungapa rijpica, Davidpaj pueblopi, paipaj taitacunata pambashcapillatami pambarca. Paipaj randica, paipaj churi Ezequiasmi mandajurca.