1Chai jipami, jahua pachapica shuj pungu pascariyajta ricurcani. Punda uyashca trompeta huacajshna rimajuj shimi uyarimushpaca, cashnami nihuarca: “Caiman vichai shamui. Jipa punllacunapi ima tucunatami canman ricuchigrini” nihuarcami.
2Shina nijpica ñapashmi, Diospaj Espíritu junda carcani. Shina cajpimi, jahua pachapica, mandangapa tiyarinata ñapash ricurcani. Chai mandangapa tiyarinapica, mandashpa tiyajujtami ricurcani.
3Chai mandashpa tiyajujca, jaspe, cornalina juyailla rumicunashna punchapambami ricurijurca. Pai tiyarina muyundipica, shuj cuichimi, punchapamba shitajuj esmeralda rumishna muyushca tiyajurca.
4Mandangapa tiyarina muyundipica, ishcai chunga chuscu tiyarinacunami tiyarca. Chai tiyarinacunapica, ishcai chunga chuscu rucucunami, yuraj churajunacunata churajushca, umapipash, curi coronata churajushca tiyanajurca.
5Mandashpa tiyarinamandaca, punchapamba shitamujpash, culun nijujcunapash, ashtacacuna caparishcapashmi uyarirca. Shinallata, chai mandashpa tiyarina ñaupajpica, canchis lamparacunami ninanda rupanajurca. Chaicunaca, Taita Diospaj canchis espiritucunami carca.
6Mandashpa tiyarina ñaupajpica, mama cuchapash espejoshna, cristalman rijchajmi tiyajurca.
Shinallata, mandangapa tiyarinaman chayanamambash, chai tiyarina muyundipipash, causaita charij chuscupuratami ricurcani. Paicunaca, huashamambash, ñaupamambash, ñavicunalla jundami tiyanajurca.
7Causaita charij chai punda animalca, leonman rijchajmi carca. Shujpaj catica maltun shicushnami carca. Ishcaipaj catica, gente ñavishna ricujujmi carca. Quimsapaj catica, calpajuj jatun angashnami carca.
8Causaita charij, chai chuscu animalcunaca, tucuillami sucta alasta charirca. Chai alascunapica, jahuallapash, ucumambash, ñavicunalla jundami carca. Paicunaca punllapash, tutapash na samashpami cashna ninajurca:
“Jucha illaj, jucha illaj, jucha illaj,
tucui ushaita charij Jatun Taita Dioslla.
Canga, pundapash Canllatami causajurcangui,
cunambash Canllatami causajungui,
jipamambash Canllatami shamungui” ninajurcami.
9Causaita charij chai chuscucunaca, mandangapa tiyarinapi causaita causaicaman tiyajujtami ninanda alicachishpa, jatunyachishpa, “pashi” ninajurca.
10Shina ninajujpimi, chai ishcai chunga chuscu rucucunapash, mandashpa tiyarinapi tiyajujpaj ñaupajpi cungurishpa, causaita causaicaman tiyajujtaca, ninanda alicachinajurca. Shinallata, paicunapaj coronacunatapash llujchishpami, mandangapa tiyarina ñaupajpi churashpa, cashna ninajurca:
11“Jatun Dioslla,
Canmi tucui imatapash churashcangui.
Can munashpa churashcami, tucui ima cashpapash tiyajun.
Chaimandami, Canga, ninan punchapamba tiyajunata,
ninanda alicachi tucunata, ninan ushaihuan mandanata chasquinapacha cangui” ninajurcami.
Who We AreWhat We EelieveWhat We Do
2025 by iamachristian.org,Inc All rights reserved.
