1 REYES 5 - Quichua Imbabura 2016

Salomonhuan, Hiram shuti runahuan tucuita pactachingapa ari ninajushcamanda(2 Crón. 2:1-18)

1Tiro pueblomanda jatun mandaj Hiram shuti runami, Davidhuanga tucui causaipi llaquirishpa causaj carca. Chaimandami Salomonda, paipaj taita Davidpaj randi jatun mandaj cachun churashcata yachashpaca, paipajta ruraj runacunata cachamurca.

2Chaimandami Salomonbash, Hiram shuti runataca cashna nichun cacharca:

3“Ñuca taita Davidca, muyundi llactacunapi causajcunahuan macanajushpami, Mandaj Taita Diospaj shutipi mañana huasita shayachitaca na usharca. Ñuca taitata fiñajcunata, Mandaj Diosllata tucuchingacamanmi, na shayachi usharca. Chaitaca, cambash yachanguimi.

4Cunanga, ñucata Mandaj Diosmi, pihuanbash ama macanajushpa, ali causachun churarca. Chaimandami ñucata fiñajcuna illajpi, imatapash na manllashpa ali causajuni.

5Shina cashpami, ñucata Mandaj Taita Diospaj shutipi mañana huasita shayachingapa yarircani. Mandaj Diosmi, ñuca taita Davidtaca cashna nishca carca: ‘Can mandashpa tiyajushcapica, cambaj churitami cambaj randi churasha. Paimi, Ñuca shutipi mañana huasitaca shayachinga’ nishcami carca.

6Chashna cashcamanda cunanga, Líbano urcupi shayanajuj cedro quirucunata cuchuchun, cambajta ruraj runacunata cachapai. Ñucapajta ruraj runacunatapash, paicunahuan cachapashallami. Paicunamanda, mashna culquita cuhuai nijpipash cushallami. Ñucanchipuramandaca, Sidón llactapi causajcunashna, caspicunata imamambash tigrachishpa ruraitaca na ushanllu. Chaitaca, canllata alimi yachangui” nichunmi cacharca.

7Hiram shuti runaca, Salomón chashna nishpa cachajpimi, ninanda cushijushpa cashna nirca: “Cunanga, Mandaj Diosca ninanda alicachi tucushca cachun. Paimi, jatun llactata mandachunga, alipacha yachajushca churita Davidman carashca” nircami.

8Hiram shuti runaca, Salomonman cashna nichunmi cacharca: “Can ima nichun cachamushcatapash uyarcanimi. Cedro caspicunata, ciprés caspicunata, can imata rurachun nishcataca rurashunllami.

9Chai caspicunataca, ñucapajta rurajcunami Líbano lomamandaca, mama cuchacaman apanga. Chaimandaca, can maiman cachamui nijpipash, yacu jahuapi huambujcunapimi cachamusha. Chaita chasquishpaca, cambash ñuca ayllucunapaj micuna tiyachun cachamungui” nichunmi cacharca.

10Chashnami Hiram shuti runaca, cedro caspicunata, ciprés caspicunataca, Salomón mashna munashcata curca.

11Shinallata Salomonbash, Hiram shuti runamanga, pusaj huaranga pusaj patsaj quintal trigota, quimsa huaranga chuscu patsaj litro ali aceitetami, paipaj ayllucuna micuchun cacharca. Salomonga, tucui huatacunami Hiram shuti runamanga chashna cujurca.

12Mandaj Diosca, Salomonmanmi, alipacha yachaj cachun yuyaita cararca. Salomonhuanga, Hiram shuti runahuan, tucuipi ali causanajushpami, tucuita pactachingapa ari ninajurca.

13Jatun mandaj Salomonga, Israel llactapi causajcunamandaca, quimsa chunga huaranga runacunatami imapash shinlli ruranacunapi yanapachun cacharca.

14Chaicunatami, Líbano llactapi imata rurachunbash, chunga huaranga, chunga huaranga tucui quillacunapi cachajurca. Chaicunaca shuj quillataca, Líbano llactapi ishcai quillataca, paicunapaj huasipimi causanajurca. Paicunataca, imapash shinlli ruraicunapi rurachumbash Adoniram shuti runami mandajurca.

15Salomonga, canchis chunga huaranga imatapash aparij runacunatami charirca. Urcupi rumita llagllashpa juyaillaguta rurajcunatapash, pusaj chunga huaranga runacunatami charirca.

16Salomonga, tucuita ricushpa mandachunga, quimsa huaranga quimsa patsaj runacunatami charirca. Paicunataca na yupashcachu carca.

17Jatun mandajca, Diospaj huasi callaripi churangapaca, ashtahuan jatun, ashtahuan ali, llagllashpa ali rurashca rumicunatami apamuchun cacharca.

18Huasichinata yachaj runacunaca, Salomonbaj runacunapash, Hiram shuti mandajpaj runacunapash, Gebal shuti pueblomanda runacunapashmi carca. Paicunami, caspicunata cuchushpa huasita rurangapapash, rumita juyaillaguta llagllashpa alichinajurca.