1Mandaj Taita Dios rimashca shimicunataca, tucui gentecunamanmi Jeremiasca villarca. Paica, Mandaj Dios tucui imatalla villachun cachashcatami villajurca.
2Chai jipami, Osaiaspaj churi Azariaspash, Carea runapaj churi Johanán runapash, imatapash na cazuj runacunapash Jeremiastaca, cashna ninajurca: “Canga, llullashpallami nijungui. Ñucanchita Mandaj Diosca: ‘Na Egiptopi causagrinachu canguichi’ nigri nishpaca, napacha nishcangachu.
3Ashtahuangarin, Nerías runapaj churi Baruc runami, caldeo runacunapaj maquipi churashpa huañuchingapa, na cashpaca Babilonia llactaman prezu cachangapa, chashna nichun yuyaita cushcanga” ninajurcami.
4Shina nishpami, Carea runapaj churi Johanán runapash, macanajuj runacunata mandajcunapash, tucui gentecunapash, Mandaj Dios rimashcata na cazushpa, Judá llactapillata causangapaca na munanajurca.
5Ashtahuangarin, Carea runapaj churi Johanán runahuan, macanajuj runacunata mandajcunahuanga, Judá llactapi saquirishca gentecunatami tandachinajurca. Paicunaca, caishuj llactacunamanda llujchishpa cachamujpi cutin tigramushpami, Judá llactapillata causanajurca.
6Paicunataca, jaricunata, huarmicunata, huahuacunata, jatun mandajpaj ushicunatapashmi, macanajuj runacunata mandaj Nabuzaradán runa, Ahicam runapaj churi Gedalías runa mandachun saquishca carca. Ahicam runaca, Safán runapaj churimi carca. Profeta Jeremiastapash, Nerías runapaj churi Baruc runatapashmi chaipi saquishca carca.
7Paicunaca, Mandaj Dios rimashcata na cazushpa, Egipto llactaman yaicushpami, Tafnes shuti puebloman chayanajurca.
8Tafnes pueblopi cajpimi Mandaj Diosca, Jeremiastaca cashna nirca:
9“Jatun rumicunata japishpa, Judá llacta runacuna ricujta, Tafnes pueblopi Faraonbaj huasiman yaicuna pungupi, ladrillohuan rurashca ucupi pambai.
10Shina rurashpaca, cashna ningui: Tucuita Mandaj, Israelcunapaj Taita Diosca cashnami nin: ‘Ñucapajta ruraj, Babilonia llactata jatun mandaj Nabucodonosor runatami, caiman cachamugrini. Shina cachamushpami, pai mandangapa tiyarinatapash, pai causana carpatapash, rumicunata pacashca jahuapi churasha.
11Pai shamushpami, Egipto llactataca ninandapacha llaquichishpa tucuchinga. Cai llactapi causajcuna, huañuchi tucunacuna cajpica, huañungami. Prezu apai tucunacunaca, apai tucungami. Espadapi huañunacunaca, espadapimi huañunga.
12Egipto llactapi, rurashcalla dioscunapaj huasicunatapash, rupachishpami tucuchinga. Shinallata, chai llactapi causajcunataca, prezumi apanga. Shinami Egipto llactaca, jahualla churajunata michij runa chafsishcashna, imapash illaj saquiringa. Shina rurajpimi, paica ima llaquipash illaj chaimanda llujshishpa ringa.
13Shinallata, Egipto llactapi tiyaj Bet-semes shuti pueblopi rurashcalla dioscunatapashmi faquinga. Egipto llactapi tiyaj rurashcalla dioscunapaj huasicunataca, rupachishpami tucuchinga’ ninmi ningui” nircami.
Who We AreWhat We EelieveWhat We Do
2025 by iamachristian.org,Inc All rights reserved.
