1Yachachishcata juyaj runaca, ali yachanatapash juyanmi.
Ashtahuangarin, jarcashpa rimashcata na uyaj runaca, imatapash na yachaj runami.
2Ali shunguta charij runaca, Mandaj Dios juyajpimi causanga.
Ashtahuangarin, na ali yuyaita charij runataca, ninan llaquicunami japinga.
3Diosta na manllashpa causashpaca, na shinlli tucui ushangachu.
Ashtahuangarin, alitalla rurajcunami, ali sapiyashcashna, shinlli canga.
4Tucuipi ali huarmiguca, paipaj cusapaj coronagushnami.
Ashtahuangarin, na ali huarmica, paipaj cusataca ungüishnami tucuchin.
5Alitalla rurajcunapaj yuyaipica, alita ruranatallami yarinajun.
Ashtahuangarin, Diosta na manllajcunapaj yuyaipica, umachinatallami yarinajun.
6Diosta na manllajcunaca, pacalla chapashpa huañuchinatallami parlanajun.
Ashtahuangarin, aliguta rurajcunaca, huañuimanda cacharichinatami parlanajun.
7Diosta na manllajcunaca Taita Diosllata chingachijpimi, tucuringa.
Ashtahuangarin, alitalla rurajcunapaj huasi ucupuracunaca, causangallami.
8Runaca, ali yachajushca cashpaca, alicachi tucungami.
Ashtahuangarin, na ali shungu runaca, yangapimi churai tucunga.
9Na alicachi tucushca cashpapash, paipajta rurajcunata charishpaca alimi canga.
Ninanda alicachi tucushca cashpapash, micuna illaj cashpaca, yangallatami canga.
10Alitalla ruraj runaca, paipaj animaltapash aliguta ricushpami charin.
Ashtahuangarin, Diosta na manllaj runaca, imatapash na llaquinllu.
11Alpapi tarpushpa causaj runaca, na munangacamanmi micunga.
Ashtahuangarin, yanga purijcunata catishpa purij runaca, juizu illajmi.
12Diosta na manllaj runacunaca, paicunapaj na ali yuyaihuanmi, linllipishna urmanajun.
Ashtahuangarin, alitalla rurajcunaca, ali fucuj yurashnami causanajun.
13Diosta na manllaj runaca, pai rimashcahuanmi, juchapi urmajun.
Ashtahuangarin, alitalla ruraj runaca, llaquichi tucunamanda quishpiringami.
14Runaca, paipaj shimi rimashcahuanmi, imata cashpapash japinga.
Paipaj maquihuan imata rurashca cashpapash, chashnallatami japinga.
15Shinlli shungu runaca, paipaj yuyaipica, ali ñandami purijuni yajunmi.
Ashtahuangarin, yachachishcata cazuj runami, alipacha yachajushca canga.
16Shinlli shungu runaca, ninanda fiñarishcataca ñapash ricuchinllami.
Ashtahuangarin, na alicachishpa rimajpipash na fiñarij runaca, aligutapacha yarishpami causan.
17Na llullashpa rimaj runaca, alitalla ruranatami parlajun.
Ashtahuangarin, llullashpa villaj runaca, umachinllami.
18Huaquingunaca, espadahuan chugrichinshnami rimanajun.
Ashtahuangarin, alipacha yachajushcacunapaj shimica, jambigushnami.
19Na llullashpa villaj runaca, causaitami causanga.
Ashtahuangarin, llullashpa villajcunaca, ashacamanllami canga.
20Na alicunata yariashpa causajcunapaj shungupica, umachina yuyaillami tiyan.
Ashtahuangarin, alitalla rurangapa yarijcunapaj shungupica, cushijuimi tiyan.
21Alitalla ruraj runataca, ima llaquipash na japingachu.
Ashtahuangarin, Diosta na manllajcunataca, ima llaquicunapash japijungallami.
22Llulla shimicunataca, Mandaj Diosca na ricunayachinllu.
Ashtahuangarin, na llullashpa rimajcunahuanmi cushijun.
23Alipacha yachajushca runaca, pai yachajushcatapash shungupimi alichijun.
Ashtahuangarin, juizu illaj runaca, shinlli shungu cajtami ricuchijun.
24Imatapash ucha rurajcunaca, mandajcunami tucunga.
Ashtahuangarin, imatapash na ucha rurajcunaca, gañan tucushpami causanga.
25Ninan llaquicunami, runapaj shungutaca ninanda llaquichin.
Ashtahuangarin, alita rimashca shimicunaca, cushichinmi.
26Alitalla ruraj runaca, tucuicunatami aliguta pushanga.
Ashtahuangarin, Diosta na manllajcunaca, pandachinllami.
27Imata rurangapapash na munaj runaca, animalta huañuchishpapash na cusangachu.
Ashtahuangarin, imata cashpapash ucha ruraj runaca, juyaillami imagutapash mirachin.
28Alitalla rurashpaca, unai causaitami charinga.
Chashna ali causajcunataca, huañuica na ucha japingachu.
Who We AreWhat We EelieveWhat We Do
2025 by iamachristian.org,Inc All rights reserved.
