1Picha punlla jipami, sacerdotecunata mandaj Ananiasca, huaquin ancianocunata pushashpa, shinallata, alipacha rimanata yachaj Tértulo shuti runatapash pushashpa, mandajpaj ñaupajpi Pablota juchachingapa rinajurca.
2Pablota pushamujpica, Tértulo shuti runami paita juchachishpa cashna nijurca:
“Can aliguta yarishpa tucuita rurajushpami, cai llactataca aligutapacha mandajungui. Shinamandami, cushijushpa, ali causapanchi.
3Ninanda alicachi tucushca Félix, candaca ima punllapash, maipi cashpapash ninanda cushijushpami chasquinajunchi.
4Cunanga, na ashtahuan fiñachingapa munapanichu. Tucuipaj ali cachun ruranata yachajmi capangui. Ñuca mañashcata uyahuailla nipanimi.
5Cai runataca, huañuchij ungüishna cajtami yachapanchi. Shina cashpami, tucui cai pachapi judiopuracunatapash fiñanajuita callarichishpa purijun. Shinallata, Nazaret pueblomanda runa yachachishcata catijcunatapash pushaj cajtami yachapanchi.
6Shinallata, Diospaj huasitapash, yangapi churangapami munajurca. Shinamandami, mandashcapi nijujshna tapuchingapa japircanchi.
7Shina cajpipash, huaranga macanajuj runacunata mandaj Lisias shuti runami, ñucanchi na cacharingapa munajpipash, ninanda fiñashpa quichushpa aparca.
8Shinallata, cai runata juchachijcunatapash cambaj ñaupajmanmi cachamushca. Imamanda ñucanchi paita juchachinajujtapash, canllata tapuchishpa tucuita yachapanguillami” nijurcami.
9Chaipica judiocunapash, tucui imata nishcapash “chashnapachami” ninajurcami.
10Chai mandaj Félix runa, Pablo rimachun maquihuan ricuchijpimi cashna nijurca:
“Ña tauca huatacunata, cai llactapaj juez cajtami candaca yachapani. Chaimandami, ñuca imatapash na alicunata na rurashcataca villagripani.
11Diosta alicachingapa Jerusalenman ñuca vichai rishcapash, chaira chunga ishcai punllallami tucujun, chaitaca yachapanguimi.
12Ñucataca, chaipi pihuan fiñanajujtapash pipash na ricuhuashcachu. Diospaj huasipi, sinagogacunapi, chai pueblopipash, ashtaca gentecunata fiñanajuita jatarichijujtapash pipash na japihuarcachu.
13Caipi ñucata juchachijcunaca, ‘chashnapachami carca’ nitaca napacha ushahuangachu.
14Ashtahuangarin, caitami canman villapani. Paicunaca: ‘Llulla yachachinatami catijun’ ninajujpipash, ñucaca, chai Ñanguta catishpami, ñaupa taitacunapaj Taita Diospajta rurajuni. Mandashca shimipi nijujtapash, profetacuna quilcashca shimicunatapash tucuitami crishpa catijuni.
15Alita rurajcunata, na ali rurajcunatapash, Taita Dios causachinatami cushijushpa shuyajuni. Paicunapash, chaitallatami shuyanajun.
16Shina cashpami, Diospaj ñaupajpi, gentecunapaj ñaupajpipash, pitapash ama fiñachishpa, aliguta causanatalla yarijuni.
17Ashtahuangarin, ashtaca huatacuna jipami, huajchacunaman carashcatapash, ofrendatapash Jerusalenbi saquingapa shamurcani.
18Shina cajpimi, Diospaj ñaupajpi mapa illaj tucushca jipa, Diospaj huasipi purijurcani. Chaipimi, Asia llactamanda huaquin judiocuna japij shamuhuarca. Chaipica, na ashtaca gentecunahuan purijurcanichu, ima na alitapash na rurajurcanichu.
19Paicunami, ima na alita ñuca rurashca cajpica, cambaj ñaupajpi ricuchingapa caiman shamuna carca.
20Mandajpuralla tandanajushcapaj ñaupajpi tapuchishpa, ima na alita rurashcata tarishca cashpaca, paicunallata canman villachunlla.
21Paicunahuan chaipi cashpaca: ‘Huañushcacuna causarinata villashcamandami, cunanga cangunapaj ñaupajpi tapuchi tucujuni’ nishpami shinllita caparishpa rimarcani” nijurcami.
22Pablo chashna nijta uyashca jipami, Félix runaca, crijcuna imashna causanajushcata ali yachashca cashpa:
“Huaranga macanajuj runacunata mandaj Lisias shuti runa shamujpimi, canguna cashna ninajujtaca, aligutapacha yachasha” nishpa saquichirca.
23Shina cashpami, patsaj macanajuj runacunata mandajtaca: “Pablotaca ali ricuriangui, imagutapash rurachun saquinguilla, paita rijsijcuna imagutapash carangapa shamujtaca ama jarcanguichu” nishpa mandarca.
24Huaquin punlla jipami, Félix runaca, judea llactamanda Drusila shuti paipaj huarmindi, prezuna huasiman shamushpa Pablota cayaj cacharca. Jesucristota imashna crinata Pablo villajujpimi, aliguta uyajurca.
25Pabloca:
“Alitalla rurashpami causana, na ali munaicunatapash mishanami, imata rurashcatapash tucuicunamanmi, Taita Diosca shamui punllapi ricuchinga” nishpami yachachijurca.
Shina yachachijujpimi Félix runaca ninanda manllarishpa:
“Cunanga rilla. Cutin uyangapa munashpaca, cayashallami” nirca.
26“Cacharichun culquita cuchun munashpami” mandaj Félix runaca, Pablotaca cutin cutin parlangapa cayajurcalla.
27Ña ishcai huata jipami, mandaj Felixpaj randica, Porcio Festo shuti runa mandai callarirca. Ashtahuangarin, Félix runaca, judiocunapaj ñaupajpi alipi ricuringapami, Pablotaca prezu saquirca.
Who We AreWhat We EelieveWhat We Do
2025 by iamachristian.org,Inc All rights reserved.
