1 TIMOTEO 5 - Quichua Imbabura 2016

Crijcuna imashna causanamanda

1Rucu taitataca, ama yapata rimashpami, cambaj taitatashna yachachina cangui. Jipa viñai huambracunatapash, cambaj huauquitashnami yachachina cangui.

2Paya mamacunatapash, cambaj mamatashnalla yachachina cangui. Shinallata, jipa viñai cuitsacunatapash, ama na alita yarishpa, cambaj panitashnami yachachina cangui.

3Imagupash illaj sapalla mamacunamanmi, imagutapash carana cangui.

4Ashtahuangarin, sapalla mamagupaj huahuacuna, cati miraicuna tiyashpaca, paicunapaj taita mama viñachishcamanda, ima alitapash rurashpa cushichinajuchun ninimi. Chashna causachunmi Taita Diosca munan.

5Sapalla causaj mamaguca, pailla cashpami, tutapash, punllapash Taita Diosta ninanda mañanataca na cungashpa causajun.

6Ashtahuangarin, huaquin sapalla huarmicunaca, paicuna munashcata rurashpa causajushpami, ña huañushcashna causanajun.

7Paicuna ama juchachi tucunajuchunmi, cai shimicunata mandashpa yachachina cangui.

8Maijambash, paipaj ayllupurata na llaquishpa, paipaj huasi ucupurata na juyashpa, ima illajpipash na ricushpaca, napacha crij cashcatami ricuchijun. Chaicunaca, na crijcunatapash ashtahuan yali na alicunami.

9Sapalla huarmita yanapangapaca, shujlla cusahuan causashca, sucta chunga huatacuna yalishcatallami, quilcana canguichi.

10Shinallata, ima ruranapipash, tucuicunapaj ñaupajpi aliguta rurashca, huahuacunatapash aliguta viñachishca, pitapash cushijuihuan mingachishca, Diospajlla causajcunapaj chaquitapash maillachishca, llaquita apajcunatapash cushichishca, ima alicunatapash rurashcami cana ninimi.

11Sapalla chairalla huarmicunapaj shutitaca, na quilcanachu cangui. Paicunaca, na ali munaicuna mishajpimi, Cristota fiñashpa, cutin cazarangapa munanlla.

12Pai crij tucushcata, na cazushpa saquishcamandaca, ninandami llaquichi tucunga.

13Shinallata, huasin huasinmi, imata rurangapapash na munashpa purinajun. Chashna quillacuna cashca jahuapash, shujcunapaj rimaicunapi satirishpa, chaicunata shujcunaman parlagrishpa, napash parlanacunata parlashpami purinajun.

14Shinamandami, sapalla saquirishca chairalla huarmicunataca, cazarashpa, huahuacunata aliguta viñachishpa, huasipipash aliguta causachun mandani. Shina causajpimi, fiñajcunapash na rimai ushanga.

15Huaquin sapalla huarmicunaca, Cristota catinata saquishpami, Satanastara catinajun.

16Maijan crij huauqui cashpapash, crij pani cashpapash, sapalla mamacunata ayllupi charishpaca, paicunami ricunata charin. Chashna rurashpami, tandanajushca crijcunatalla na shuyanga. Ayllucunata na charij sapalla mamacunatami tandajushca crijcunaca ricunata charin.

17Tandanajushca crijcunata ali ricushpa pushaj ancianocunaca, ishcaiman cunatami japinata charin. Ashtahuambachaca, Diospaj shimita villajcunapash, yachachijcunapashmi chashna japinataca charin.

18Dios quilcachishca Shimipica: “Trillaj huagrapaj shimitaca ama huatanguichu” nijunmi. Shinallata: “Imata rurashpapash, pai rurashcamandaca japinapachami” nijunmi.

19Pushaj ancianota, shujlla juchachij tiyajpica na crinallachu cangui. Ashtahuangarin, ishcai cashpa, na cashpaca quimsa tiyajpillami chasquina cangui.

20Juchapilla causajujpica, tucuicunapaj ñaupajpimi, paicunapash manllarichun, shinllitapacha rimana cangui.

21Taita Diospash, Apunchi Jesucristopash, Pai agllashca angelcunapash ricunajujpimi canman mingani. Ama shujtalla agllashpami, caicunataca tucuita ali pactachina cangui.

22Diospajta rurachun pipaj umapi maquita churashpa mañangapaca, aliguta ricunarami cangui. Pai pandarishpa ima na alita rurajpica, canmi llaquirina tucungui. Canga, tucui na alicunamandapash anchurinami cangui.

23Vijsata nanachishpa, cutin cutin huañujujpimi, candaca, ama ashtahuan yacuta ufiashpa, asha vinota ufiangui nini.

24Huaquinguna juchata rurajujtaca, pipash nara llaquichij shamujpillata ricunallami. Huaquimbica na uchalla yachai usharinllu.

25Shinallatami, imata alita rurashcapash ñapash ricurimunlla. Pai ima na alita rurashcapash na pacalla cashpami, ricurimungalla.