Psalms 45 - Quichua Imbabura 2016

Jatun mandaj cazarajujpi candanamandaCandajcunata mandaj candachijuchun, Coré shuti runapaj miraicuna, Lirio sisa taquipi rurashca Salmomi. Juyarinamanda candanami.

1Ñuca shungupi, juyailla shimicunata yarishpami rimajuni.

Jatun mandajmanmi candagrijuni.

Ñuca jalluca, juyaillaguta quilcaj runapaj plumashnami.

2Huañuna aichayuj runacunamandaca, canmi ashtahuan juyaillagu capangui.

Cambaj shimimandaca, uyanayai shimicunami llujshijun.

Chaimandami candaca tucui causaipaj, Taita Diosca bendiciashca.

3Ninan shinlli runalla,

cambaj cinturaspi espadata huataripailla.

Cambaj ninan ushaihuambash,

cambaj mandana ushaihuambash shayaripailla.

4Cambaj ninan ushaihuanmi, jatumbi churai tucupangui.

Na llullaj shimitapash, na jariyana yuyaitapash,

alitalla ruranatapash, caballopi tiyarishpa rijshna apapailla.

Ninan ushaita charij Cambaj maquihuanmi, jatun manllarinacunata rurashpa ricuchinga.

5Cambaj flechacunaca, filu filumi.

Chaicunahuanmi, shuj llacta gentecunataca tucuchingui.

Chaicunallatami, jatun mandajta fiñajcunapaj shungupica yaicunga.

6Taita Dioslla,

Can mandashpa tiyarinaca, causaita causaicamanmi canga.

Mandana vara caspipash, alitalla rurashpa pactachingapami canga.

7Alitalla ruranata juyashpami, na alita ruranataca millanayachishcangui.

Shina cajpimi Taita Diosca, Candaca aceiteta talishpa javirca.

Paica, cambaj Taita Diosmi.

Cambaj cumbacunatapash yalita cushijuchunmi, shina rurarca.

8Mirra, áloe, casia shuti, mishquilla ashnajun yacushnami, cambaj churajunacunaca ashnajun.

Marfilta churashpa rurashca, mandana huasipimi, candaca ninanda cushichinajun.

9Cambaj huasipi ninanda alicachi tucushca huarmipurapica,

jatun mandajcunapaj ushicunami tiyanajun.

Jatun mandaj huarmica, cambaj ali maquimanmi, Ofir llactamanda curita churajushca tiyajun.

10Ricui ñuca ushigulla, caiman quimirishpa uyahuai.

Cambaj llactata, cambaj taitapaj huasi ucupuratapash cungailla.

11Jatun mandajca, can juyaillagu cajpimi munanga.

Paipaj ñaupajpimi cungurina cangui. Paimi canda mandaj.

12Tiro shuti pueblopi causajcunami, caranacunahuan shamunga.

Ninan charij gentecunapash, paicunaman alita rurachunmi, canda mañangapa shamunajunga.

13Jatun mandajpaj ushiguca, punchapamba, juyaillagumi tiyajun.

Paipaj churajunaca, curihuan rurashca churajunami.

14Bordashca churajunacunahuanmi, jatun mandajpaj ñaupajman apai tucunga.

Jarihuan nara tacarishca cuitsacunami, paita catishpa rinajunga.

Paipaj cumba cuitsacunapashmi, paihuan rinajunga.

15Ninan cushijuihuanmi paicunataca pushamunajunga.

Shina pushamushpami, jatun mandaj mandashpa tiyajuj huasiman yaicunajunga.

16Cambaj taitacunapaj randica, cambaj churicunami mandanajunga.

Paicunatami, tucui llactacunapi cati mandajcuna cachun churangui.

17Jipa miraicunami, candaca causaita causaicaman yarinajunga.

Chaimandami llactacunapi causajcunaca, causaita causaicaman alicachinajunga.