APOCALIPSIS 5 - Quichua Imbabura 2016

Llamagumi quilcashpa pillushcata pascashca

1Mandangapa tiyarinapi tiyajujtaca, Paipaj ali maquipi, ñaupamambash huashamambash quilcashca fangata charijujtami ricurcani. Chai pillushca fangataca canchiscamanmi sellashca carca.

2Shinallata, ushaita charij shuj ángel caparishpaca: ¿Pita, chai sellashcacunata anchuchishpa, chai pillushca fangacunata pascangapa ushaita charinga? nijurcami.

3Ashtahuangarin, chai pillushca fangata pascangapapash, ricungapapash, jahua pachapi, cai pachapi, alpa ucupi tiyajcunapash, pipash na tiyarcachu.

4Chai pillushca fangata pascashpa, chaipi ima nijujta quilca catingapapash pipash illajpimi, ninandapacha huacajurcani.

5Shina huacajujpimi, chai rucucunamanda shujca, cashna nihuarca: “Ama huacaichu. Davidmanda mirai, Judá ayllupuramanda Leonmi, tucui na alitapash mishashca cashpa, canchis sellashcacunata anchuchishpa, pillushca fangacunatapash pascangapa ushaita charin” nihuarcami.

6Shina nijpi ricushpaca, mandangapa tiyarinatapash, causaita charij chuscupuratapash, ishcai chunga chuscu rucucunatapashmi ricurcani. Chai chaupipica: Diosman carajpi ninanda llaquichi tucushpa, huañushca Llamaman rijchajtami ricurcani. Chai Llamaca, canchis cachuta, canchis ñavitami charirca. Chaicunaca, Taita Diospaj canchis espiritucunata, cai pachaman cachamushcami carca.

7Chai Llamagu shamushpami, mandangapa tiyarinapi tiyajujpaj, ali maquimanda, chai quilcashpa pillushcataca japirca.

8Chai quilcashpa pillushca fangata japijpica, causaita charij chuscupuratapash, ishcai chunga chuscu rucucunapashmi, chai Llamagupaj ñaupajpi cungurirca. Chaicunami, arpacunatapash, inciensota jundachishca curi copacunatapash charinajurca. Chai inciensoca, Diospajlla causajcuna, Diosta mañashcami chashna ricurijurca.

9Paicunaca shuj mushujtami, cashna nishpa candanajurca:

“Canllamari, quilcashpa pillushca fangatapash japishpa,

sellashcacunatapash pascaita ushangui.

Can huañuchi tucushpami, Cambaj yahuarhuan ñucanchitaca,

tucui ayllupuramanda, shuj shuj shimicunata rimajcunamanda,

tucui cai pachapi causajcunamanda,

Taita Diospaj causachun randishpa quishpichircangui.

10Ñucanchitaca, Taita Diospajta ruraj jatun mandajcuna,

sacerdotecuna cachun churashcamandami,

cai pachapica mandanajushun” ninajurcami.

11Chai jipaca, causaita charijcunapaj ñaupajpi, rucucunapaj ñaupajpi, mandangapa tiyarina muyundipi, ashtaca angelcuna rimanajujtami uyarcani. Chai angelcunaca, na yupai ushanalla ashtaca, ashtacapachami carca.

12Paicunaca, ninandapacha caparishpami cashna ninajurca:

“Diosman carashpa huañuchi tucushca Llamaguca,

ninan ushaitapash, charij canatapash,

alipacha yachanatapash, ninan shinlli canatapash,

ninanda alicachi tucunatapash,

‘ninan ushaitami charingui’ ni tucunatapash, alicachi tucunatapashmi charin” ninajurcami.

13Shinallata, jahua pachapi tucui churashcacunapash, cai pachapi causajcunapash, alpa ucupi causajcunapash, mama cuchapi causajcunapash, cashna ninajujtami uyarcani:

“Mandangapa tiyarinapi tiyajujpash,

Llamagupash, causaita causaicaman,

alicachi tucushca, ninanda alicachi tucushca,

jatunyachi tucushca, ‘ninan ushaitapashmi charingui’ ni tucushca cachun” ninajurcami.

14Shina ninajujpimi, causaita charij chuscupuracunaca: “Chashna cachun” ninajurca.

Shinallata, ishcai chunga chuscu rucucunapash, causaita causaicaman Causajujtami, alpaman chayajta urai cumurishpa, ninanda alicachinajurca.