1Chai punllacunami Ezequías runaca, ungushca huañunalla sirijurca. Shinamandami Amoz shuti runapaj churi, Profeta Isaiasca, paipajman shamushpa cashna nirca:
“Mandaj Diosca, cashnami nin: ‘Cambaj huasi ucupurataca, imata cashpapash uchalla ningui. Canga na causanguichu, huañugringuimi’ ninmi” nircami.
2Shina nijpimi Ezequiasca, pircaman tigrarishpa, Mandaj Diosta cashna nishpa mañarca:
3“Mandaj Dioslla, Candaca ninandapachami mañapani. Cambaj ñaupajpi na llullashpa, tucui shunguhuan Canda cazushpa causashcataca yaripailla. Shinallata, imata cashpapash Cambaj ali canatalla rurashpa causashcatapash yaripailla” nishpami Ezequías runaca, ninandapacha huacajurca.
4Chaimandami Mandaj Diosca, Isaiastaca cashna nirca:
5“Mandaj Ezequiaspajman tigrashpa, cashna nigri: Cambaj ñaupa taita Davidta Mandaj Diosca, cashnami nin: ‘Can mañajujtaca uyarcanimi, cambaj viquitapash ricurcanimi. Cunanga, chunga picha huatacunata ashtahuan causashpa catigringuirami.
6Shinallata, candapash, cai pueblopi causajcunatapashmi, Asiria llactata jatun mandajpaj maquimanda cacharichishpa quishpichisha’ nircami.
7Mandaj Diosca, Pai nishcata pactachingapaca, cashnata rurashpami ricuchinga. Chaita pactachingapami, Mandaj Diosca cashna nijun:
8‘Acaz shuti runa, pachacunata ricungapa rurashcapi, indi llandushpa ñaupajman ringapa randica, chungacamanmi huashaman tigranga’ ninmi nigri” nircami. Chashna nijpimi, indica chungacaman huashaman tigrarca.
9Judá llactata jatun mandaj Ezequías, huañunalla cashpa, ali tucushcata villashpaca, cai shimicunatami chashna quilcarca:
10Ñucaca cashnami yajurcani: “Nara rucuyashpallatami, Seolman rigrini. Rucuyangacaman causanataca, quichui tucushcanimi” yajurcanimi.
11Cashnatapashmi yajurcani: “Ñucaca, Mandaj Diostaca na ashtahuan ricushachu. Cai pachapica, Mandaj Diostaca na ashtahuan ricushachu. Gentecunataca, cai pachapica na ashtahuan ricushachu.
12Ñuca causajushca huasipash, llama michijpaj chugllashnami shujman anchuchi tucugrin. Ahuaj runa, ahuashcata fitinshnami, ñuca causaitaca chai ungüihuanga fiti tucugrini. Punlla cashpa, tuta cashpapash ña huañugrinimi” yajurcanimi.
13Tucui tutami huacashpa caparijurcanilla. Shuj león micushpa tucuchijujpishnami, nanaihuan caparijurcani. Punllapash, tutapashmi ninan llaquita apajurcani.
14Grulla shuti, golondrina shuti alasyu animalcunashnami huacajurcani. Palomashnami llaquirishpa vichai ricushpa huacajurcani. Mandaj Dioslla, jatun llaquita apajushpami, shinllichihuai nijupani.
15Paillata chashna llaquichisha nishcata pactachijushcataca, ¿imatata nina cani? Ñuca causaipi chashna jatun llaquihuan cashcamandaca, ninan llaquihuan causanatallami charini.
16Jatun Dioslla, gentecunaca chashna llaquicunata ricushpami causana canchi. Chashna llaquicunata apashpami, ñucanchi causaipica yachajushpa catishun. Chai jipaca, ali causaitami charishun.
17Aliguta causajujpimi, jatun llaqui japihuarca. Shina cajpipash Can juyashpami, utujupi ismushpa tucurinamandaca quishpichihuarcangui. Ñuca juchacunataca, anchuchishpa shitajshnami, chashna quishpichihuarcangui.
18Seolman rishcacunaca, Candaca na ashtahuan jatunyachi ushangachu. Huañushcacunapash, candaca na ashtahuan alicachi ushangachu. Pambana utujuman huañushpa rijcunapash, Can na llullashpa pactachinacunataca, napacha shuyai ushangachu.
19Maijan cashpapash causajushpallami, imashna ñuca alicachijuni, chashnallata alicachi ushanga. Causashpallami taitaca, na llullashpa Can pactachinatapash, paipaj huahuacunaman villanga.
20Mandaj Diosmi, ñucataca quishpichihuanga. Shina cashcamandaca tucui ñucanchi causaipi, Mandaj Diospaj huasipica, punllandi Paiman candanajushunchilla nishpami quilcarca.
21Isaiasca cashnami nirca: “Masashca higota japishpa, nanachijuj pushtupi churaichi. Chashna rurajpica ali tucungallami” nishcami carca.
22Shinallata Ezequiaspashmi, Isaiastaca: “Mandaj Diospaj huasiman vichai rinataca, ¿imata ricushpashi yachasha?” nishca carca.
Who We AreWhat We EelieveWhat We Do
2025 by iamachristian.org,Inc All rights reserved.
