MARCOS 3 - Quichua Imbabura 2016

Maqui chaquishca runatami, Jesusca alichishca(Mat. 12:9-14; Luc. 6:6-11)

1Cutinmi Jesusca sinagogaman yaicurca. Chaipica, shuj maqui chaquishca shuj runami tiyajurca.

2Samana punllapi chai runata alichijpica juchachishpa llaquichingapami, ninanda ricurianajurca.

3Shina cajpimi, maqui chaquishca chai runataca:

“Jatarishpa, cai chaupiman shamui” nirca.

4Chaipimi paicunataca cashna nirca:

“Mandashcapi nijunshnallata samana punlla cajpipash, ¿alita ruranachu ali, na cashpaca na alita ruranachu ali? ¿Causaita caranachu ali, na cashpaca causaita quichunachu ali?” nishpami tapurca.

Ashtahuangarin, paicunaca upalla carcallami.

5Shina cajpimi, fiñarishpa muyundi tucuillata ricurca. Paicuna shinlli shungu cajta ricushpami, ninanda llaquirishpa, chai huañujuj runataca:

“Maquita chutai” nirca.

Shina nijpi chai runa maquita chutajpica, ñapash ali tucurcallami.

6Fariseocuna chaimanda llujshishpami Herodesta catijcunahuan tandanajushpa, Jesusta imashna huañuchinatapash parlarinajurca.

Ashtaca gentecuna, cucha manñapi cashcamanda

7Ashtahuangarin cucha manñamanmi Jesusca, Paipaj yachajujcunandi rirca. Paitaca, Galilea llactamandapash, Judea llactamandapash ashtaca gentecunami catishpa rinajurca.

8Jerusalenmandapash, Idumea llactamandapash, Jordán jatun yacu chimbamandapash, Tiro, Sidón pueblo muyundimandapashmi shamunajurca. “Ninan alicunatami rurajun” nijta uyashpami, ashtaca gentecuna Paipajman shamunajurca.

9Gentecuna ninanda jundamushpa ama llapichunmi, Paipaj yachajujcunataca canoapi ña rinalla shuyanajuchun cacharca.

10Huañunajuj gentecunataca, ashtacacunatami alichishca carca. Shinamandami, millai ungüihuan huañunajuj gentecunaca, Jesusta tacaringapa munashpa tangaripi jundamurca.

11Mapata rurachij ayacunaca, Jesusta ricushpami, Paipaj ñaupajpi cungurishpa cashna nishpa caparinajurca:

“Canga, Taita Diospaj Churimari cangui” ninajurcami.

12Ashtahuangarin, maijan cashcata shuj gentecuna ama yachachunmi, chai ayacunataca jarcashpa rimarca.

Chunga ishcai apostolcunata Jesús agllashcamanda(Mat. 10:1-4; Luc. 6:12-16)

13Chai jipami Jesusca, urcuman vichai ringapa, Pai agllashcacunatalla cayajpi, paicunaca Jesuspajman shamunajurca.

14Chaipimi chunga ishcaicunata, Paihuan pacta purichun, Paimanda villachun cachangapa agllarca.

15Shinallata, huañujujcunata alichingapa, ayacunata llujchishpa cachangapa ushaita charichumbashmi agllarca.

16Simón runataca, Pedro nishpami shutichirca.

17Zebedeo runapaj churi Jacobotapash, Jacobopaj huauqui Juandapashmi agllarca. Paicunapaj, cati shutitaca Boanerges shutitami churarca. Boanerges nishpaca, rayushna culun nijujpaj churicuna nijunmi.

18Shinallata Andresta, Felipeta, Bartolometa, Mateota, Tomasta, Alfeopaj churi Jacobota, Tadeota, cananistapuramanda Simondapashmi agllarca.

19Shinallata, Jesusta japichij Judas Iscariotetapashmi agllarca. Paicunami huasiman shamunajurca.

Diospaj Espiritutami, na ali shimicunata rimashca(Mat. 12:22-32; Luc. 11:14-23; 12:10)

20Cutinmi ashtaca gentecuna jundamurca. Shina cajpimi paicunaca, tandata micuitallapash na ushanajurca.

21Jesustaca: “Juizumi tucurishca yarin” ninajujta uyashpami, Paipaj ayllucunaca pushangapa shamurca.

22Ashtahuangarin, Jerusalenmanda shamushca mandashca Shimita yachachijcunaca:

“Cai runaca, Beelzebupaj ushaitami charin. Shinamandami, ayacunata mandajpaj ushaihuan ayacunata llujchishpa cachajun” ninajurcami.

23Shina ninajujpimi Jesusca, paicunata cayashpaca, yarichishpa yachachinacunahuan cashna nishpa rimarca:

“¿Imashnata Satanasca, Satanastallata llujchishpa cachaitaca ushangayari?

24Mandajuj llactapurallata fiñanajushpa shicanyarijpica, chai mandajuj llactaca tucuringami.

25Shinallata, huasipi causajpurallata fiñanajujpica, chai huasipi causajcunaca tucuringami.

26Shinallata, Satanaspash paicunapura fiñanajushpa shicanyarishpaca, pai mandashpa causanaca tucurishpa chingangami.

27Shuj ninan shinlli runapaj huasiman shuhuangapa yaicushpa, chai runata nara huatashpaca, imata shuhuaitapash na ushanllu. Paita huatashpallami, ima charishcatapash tucuilla shuhuai ushanga.

28Na llullashpami, cangunataca cashna nini: Runacuna ima juchata rurashcatapash, ima na ali shimicunata rimashcatapash, perdonangami.

29Ashtahuangarin, jucha illaj Diospaj Espirituta na ali shimicunata rimajtaca, napacha perdonangachu. Chashnacunaca, causaita causaicaman llaquichi tucushpami tiyajun” nijurcami.

30Paicunaca Jesustaca: “Mapata rurachij aya jundashca runami” nishcamandami chashna nirca.

Jesuspaj mamapash, huauquicunapash(Mat. 12:46-50; Luc. 8:19-21)

31Chai jipami Jesuspaj mamapash, Paipaj huauquicunapash shamurca. Paicunaca, canllamandallami cayachun cacharca.

32Jesuspaj muyundipi tiyanajuj gentecunami, cashna ninajurca:

“Cambaj mamapash, huauquicunapash, canda mascangapa shamushcami, canllapimi shayanajun” ninajurcami.

33Shina nijpimi Jesusca:

“¿Pita Ñuca mama? ¿Pita Ñuca huauquicuna canga?” nishpa tapurca.

34Jesusca, Paipaj muyundipi tiyanajuj gentecunata ricushpami cashna nirca:

“Caicunami Ñuca mama, caicunami Ñuca huauquicuna.

35Taita Dios munashcata pactachijcunallami, Ñuca huauqui, Ñuca pani, Ñuca mama” nircami.