2 REYES 8 - Quichua Imbabura 2016

Sunem pueblomanda huarmimanmi, pai imatalla charishcacunata tigrachishca

1Sunen pueblomanda huarmipaj churitami, Eliseoca causachishca carca. Chai huarmitami, Eliseoca cashna nirca: “Mandaj Diosmi, canchis huatacunata yarjai punllacunata tiyachun, cai llactaman cachamushca. Shina cashcamanda, cambash, cambaj huasi ucupurapash, caimanda rishpa maipi munashcapi causagrilla” nircami.

2Chaimandami chai huarmica, Taita Diospaj runagu nishcashna, paipaj huasi ucupuracunandi rishpa, filisteocunapaj llactapi canchis huatacaman causagrirca.

3Ña canchis huata yalijpimi chai huarmica, filisteocunapaj llactamanda tigramushpa, Israel llactata jatun mandajtaca, paipaj huasita, paipaj alpacunata tigrachihuai ningapa rirca.

4Israel llactata jatun mandajca, Eliseopajta ruraj Giezi shuti Diospaj runatami: “Eliseo imata juyailla rurashcacunata parlahuai nipanimi” nishca carca.

5Chashna nijpi, shuj huarmipaj huahuata causachishcata jatun mandajman, Giezi shuti runa villajujpimi, chai huahuapaj mamaca chayamushca carca. Chai huarmica: “Ñuca huasita, ñuca alpacunata tigrachihuai nipanimi” ningapami, jatun mandajpajman shamushca carca. Chai huarmi chayamujpimi Giezi shuti runaca:

“Ñucata jatun mandajlla. Cai huarmitamari parlajurcani. Cai huarmipaj churitamari, Eliseoca causachirca” nishca carca.

6Jatun mandaj tapuchijpimi, chai huarmipash tucuita villashca carca. Shina cajpimi, jatun mandajca, paipajta ruraj shuj runataca: “Imatalla cai huarmi charishcatapash, cai llactamanda llujshishca punllamanda, cunangaman, paipaj alpacunapi fucushcatapash, tucuillata tigrachilla, nigri” nishpa cacharca.

Siria llactata, Hazael runa mandajushcamanda

7Chai jipami Eliseoca, Damasco puebloman rirca. Chaipica, Siria llactata jatun mandaj Ben-adad shuti runami huañujushca carca. Paimanmi:

“Taita Diospaj runagumi, caiman shamushca” nishpa villanajurca.

8Shina villajpimi jatun mandajca, Hazael shuti runataca cashna nirca:

“Ima caranatapash apashpa, Taita Diospaj runaguta tuparingapa rilla. Paitaca: ‘¿Cai ungüimandaca ali tucunachu cani imashi?’ nijunmi nishpa, Mandaj Diosta tapupai ningui” nircami.

9Shina nijpimi Hazael runaca, Damasco pueblopi imalla ashtahuan ali tiyashcacunata, chuscu chunga camellopi apachishpa, Eliseota tuparingapa rirca. Ña chaiman chayashpaca, paipaj ñaupajpi shayarishpami cashna nirca:

“Siria llactata jatun mandajca, Ben-adad cambaj churishnallatami. Paimi: ‘¿Cai ungüimandaca, ali tucunachu capani imashi?’ nishpa tapuchun cachamun” nircami.

10Shina nijpimi Eliseoca:

“Ari, chai ungüimandaca ali tucunguimi, shina cashpapash, can huañunaca ñami chayamujun ninmi Mandaj Diosca” nigri nirca.

11Shina nishpallami, Taita Diospaj runagu, Hazael runata ricujujpillata, paica manllarirca. Chashna ricujushpami, Taita Diospaj runaguca huacai callarirca.

12Shinamandami Hazael runaca:

“Ñucata mandajlla, ¿imashpata huacapangui?” nishpa tapujpi, Eliseoca cashna nirca:

“Israelcunata, can ninanda llaquichinatami yachani. Canga, paicunapaj torrecunatapash rupachishpa, chairalla viñaicunatapash espadahuan chugrichishpa, huahuacunatapash pircapi huajtashpa, vijsayu huarmicunatapash vijsata liquishpa huañuchinatami yachani” nirca.

13Shina nijpimi Hazael runaca:

“Cambajta ruraj ñucaca, yangalla runami cani. ¿Imashnata chashna jatun llaquicunataca rurashayari?” nirca.

Shina nijpimi Eliseoca:

“Can, Siria llactata jatun mandaj tucunatami, Mandaj Diosca villahuarca” nirca.

14Shina nijpica, Hazael runaca rircallami. Chaimanda rishpa, paita mandaj runapajman chayajpimi jatun mandajca:

“Eliseoca, ¿ima nircata?” nishpa tapurca.

Shina tapujpimi paica:

“Chai ungüimandaca ali tucunguimi ninmi” nirca.

15Chai cayandi punllami, Hazael runaca, shuj finduta yacupi satishpa, Ben-adad runapaj shimita quilpashpa, paitaca huañuchirca. Paipaj randica, Hazael runami mandai callarirca.

Judá llactata, Joram shuti runa mandajushcamanda(2 Crón. 21:1-20)

16Acab shuti runapaj churi Joram shuti runaca, picha huatata Israel llactata ña mandajujpimi, Judá llactata jatun mandaj Josafat runapaj churi Joram shuti runaca, Judá llactata mandai callarirca.

17Paica, quimsa chunga ishcai huatata charishpami, mandai callarirca. Pusaj huatatami Jerusalenbi mandajurca.

18Paica, Israel llactata jatun mandajcuna imashna causashcashnami, Acab runapaj huasi ucupurashnallata, na alita rurajurca. Paipaj huarmica, Acab runapaj ushimi carca. Chaimandami Mandaj Diospaj ñaupajpica, chashna na alita rurajurca.

19Shina cajpipash Mandaj Diosca, Paipajta ruraj Davidta juyaimandallami, Judá llactataca na tucuchingapa munarca. Paica, Davidmambash, paipaj miraicunamambash: “Micha rupajujshna cachunmi, cambaj miraicuna mandachunga, causaita causaicaman cusha” nishcami carca.

20Joram shuti runa mandajui huatacunapimi, Edom llactapi causajcunaca, Judá llacta mandajujtaca na cazushpa, paicunata mandachunga shuj jatun mandajta churanajurca.

21Chaimandami Joram shuti runaca, tucuilla carretacunata mandajcunandi, Zair shuti puebloman rirca. Edom llacta runacunaca, macanajungapa muyundi shayanajujpimi, paica tuta jatarishpa, carretacunandi rishpa macanajugrirca. Shinanamandami, Edom llacta runacunaca, paicunapaj carpacunaman pacajushpa calpanajurca.

22Shina cashpapash, Edom llactapi causajcunaca, Judá llacta mandashpa charijushcamandaca cacharirishpami, cunangamanmi chashna causanajun. Shinallata, Libna shuti pueblopi causajcunapash, na cazushpami jatarirca.

23Joram shuti runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna imashna causashcata villajuj libropi quilcashca tiyajun?

24Joram shuti runa huañujpica, paipaj taitacunata pambashcapillatami, Davidpaj pueblopi pambarca. Paipaj randica, Ocozías shuti paipaj churimi mandajurca.

Judá llactata, Ocozías shuti runa mandajushcamanda(2 Crón. 22:1-6)

25Acab shuti runapaj churi Joram shuti runaca, chunga ishcai huatata Israel llactata mandajujpimi, Judá llactata jatun mandaj Joram shuti runapaj churi Ocozías shuti runaca Judá llactata mandai callarirca.

26Ocozías runaca, ishcai chunga ishcai huatata charishpami, Jerusalenbica shuj huatata mandajurca. Paipaj mamaca, Israel llactata jatun mandaj Omri shuti runapaj ushi, Atalía shutimi carca.

27Ocozías runapash, Acab runapaj huasi ucupuracuna causashcashnami causajurca. Paica, Acab runapaj masha cashpami, Mandaj Diospaj ñaupajpica, Acab runapaj huasi ucupurashnallata na alita rurajurca.

28Ocozías runaca, Acab runapaj churi Joram shuti runahuan tandanajushpami, Siria llactata jatun mandaj Hazael runahuan macanajungapa, Galaad llactapi tiyaj Ramot shuti puebloman rirca. Chai macanajuipimi Siria llacta runacunaca, Joram shuti runata chugrichirca.

29Jatun mandaj Joram shuti runaca, Siria llacta runacunahuan macanajuipi chugrichishcata jambiringapami, Jezreel puebloman tigrarca. Paitaca, Siria llactata jatun mandaj Hazael runahuan macanajungapa rijpimi, Ramot shuti pueblo chimbapurapi chugrichishca carca. Acab runapaj churi Joram shuti runaca, ña huañunalla cajpimi, Judá llactata jatun mandaj Joram shuti runapaj churi Ocozías runaca, Jezreel pueblopi ricungapa urai rirca.