Psalms 63 - Quichua Imbabura 2016

Taita Dioslla cushijuita caraj cashcamanda(2 Sam. 15:23,28)Judá llacta jichushca pambapi cashpa, David rurashca Salmomi.

1Taita Dioslla,

Canga ñuca Taita Diosmi cangui.

Tutamandatami Candaca mascasha.

Ñucaca, yacunayachijshnami Candaca mascapani.

Ñuca tucui causaipica,

Candallami shuyashpa causajupani.

Yacupash illaj, chaquishca alpashnami capani.

2Cambaj punchapamba, ninan ushaita ricungapami munapani.

Cambajlla huasipi ricushcashnallata, ricungapami munapani.

3Cambaj ninan juyaica, ñuca causaitapash ashtahuan yalimi.

Ñuca shimica, Candallami alicachinga.

4Ñuca causaipica, chashnami Canda alicachisha.

Cambaj shutipimi, ñuca maquitaca vichai churasha.

5Ñucaca, ali micunata micushcashnami cushijushca cani.

Ñucaca, ninanda cushijushpami, Candaca alicachisha.

6Ñuca puñungapa sirijushpapash, Candami yarijupani.

Tutapi na puñui ushashpapash, Candami yarijupani.

7Canmi, ñucata yanapahuashcangui.

Cambaj alas ucupi cashpami ninanda cushijusha.

8Ñucaca, Canhuanllami pacta puripasha.

Cambaj ali maquihuanmi shinllichihuangui.

9Ashtahuangarin, ñuca causaita tucuchingapa munajcunaca,

paicunarami alpa ucupi pambaringa.

10Paicunataca, espadahuanmi tucuchinajunga.

Paicunataca, chacal animalcunami micunga.

11Ashtahuangarin jatun mandajca, Taita Dioshuanmi cushijunga.

Paipaj shutipi juramentuj runami, alicachi tucunga.

Ashtahuangarin, llullashpa rimajcunaca tucuringami.