ISAÍAS 10 - Quichua Imbabura 2016

1Na pactachi ushanalla mandashcacunata churajcunapash,

llaquichingapa mandashcacunata churajcunapash,

¡aij imachari tucunga!

2Huajchacunata llaquichingapami chashna mandanguichi.

Shinallata, Ñuca agllashca gentecunaman, imatapash na cushpa llaquichingapami chashna ruranguichi.

Sapalla mamacunata, taita mama illaj huahuacunata shuhuangapami, chashna ruranguichi.

3Llaquichina punlla chayamujpica, ¿imashi tucunguichi?

Cangunata tucuchingapa caru llactamanda shamujpica,

¿pita cangunataca yanapanga?

Canguna imata charishcataca, ¿maipita saquigringuichi?

4Canguna, Ñucata na cazushpaca, prezu apai tucushpami, huañuchi tucunguichi.

Chashna llaquichishpapash, Dios fiñarishcataca na yalichishpami,

ashtahuan llaquichishpa catinga.

Taita Diosca, Asiria llacta runacunahuanmi llaquichinga

5“Asiria llactapi causaj gentecunalla.

Cangunaca, Ñuca ninanda fiñarishpa, llaquichina vara caspishnami canguichi.

6Ñucata na cazuj gentecunata llaquichinajuchunmi cangunataca cachagrini.

Ñucata ninanda fiñashca gentecunata llaquichijuchunmi cachagrini.

Paicunataca, macashpa, tucuita quichushpa, sarushpa tucuchinajuchunmi cachagrini.

7Asiria llacta gentecunaca, Ñuca chashna rurajujtaca, yuyaitapash na yangachu.

Ashtahuangarin, paicunaca, ashtaca llactacunata quichushpa tucuchinatallami yuyanajunga.

8Paicunaca: ‘Ñuca cati mandajcunaca, ¿nachu tucuicuna jatun mandajcuna? ninajungami.

9Ñucapaca, Calno shuti puebloca, Carquemis shuti puebloshnallatami.

Hamat shuti pueblopash, Arfad shuti puebloshnallatami.

Samaria pueblopash, Damasco puebloshnallatami.

10Ñucaca, Jerusalenbi, Samariapi tiyashca rurashcalla dioscunatapash,

yali ashtaca dioscunata jundachishca llactacunatapashmi japircani.

11Samaria pueblotaca, rurashcalla paipaj dioscunandimi tucuchircani.

¿Nachu chashnallata Jerusalendapash, rurashcalla paicunapaj dioscunandi tucuchisha?’ nijunmi” nihuarcami.

12Sion lomapi Jerusalén pueblota, imatalla ruranata Jatun Dios rurashca jipaca,

Asiria llactata jatun mandajtaca, imata cashpapash, paipaj shungupi jariyashpa rurashcamandami llaquichinga.

Shinallata, alipi ricurishcamandami llaquichinga.

13Asiria llactata jatun mandajca, cashnami nijurca:

“Ñucaca, ninan ushaihuan, ñuca ali yuyaihuan, alipacha yachajushca cashpami,

cai tucui gentecunapaj llactacunatapash, paicuna imatalla charishcatapash quichurcani.

Mandashpa tiyajuj jatun mandajcunatapash, ninan shinlli runacunatapashmi, fangalla misharcani.

14Chai gentecuna imatalla charishcacunataca, shuj tazindashnami tarircani.

Tucui chai llactacunataca, jichushpa saquishca lulungunata tazinmanda tandachijshnami aparcani.

Chashna rurajujpica, pillapash imatapash na nircachu” nijurcami.

15¿Hachaca, chijtajuj runataca, yalimi cani ni ushanllu?

¿Sierrapash, cuchuj runata yalimi cani ni ushanllu?

Shina cajpica, tauna caspipash, paita taunashpa rijuj runatarami mandanman.

Shinallata vara caspipash, paita apajujtarami mandai ushanman.

16Shinamandami, tucuita Mandaj Jatun Diosca,

alipacha shinlli runacunatapash, ushaita quichunga.

Paicunapaj ninan ushaitapash, ninahuan rupachijshnami tucuchinga.

17Israelcunataca Mandaj Diospaj michami punchayachi ushanga.

Paicunapaj jucha illaj Diosca, rupajuj ninashnami canga.

Chai ninami, na ali jihuacunata, cashacunata rupachijshna, shuj punllapilla tucuchinga.

18Paicunapaj juyailla quiru pambacunapash, ali fucuj pambacunapash, tucuillapachami tucuringa.

Jatun macanajuipi mishai tucushcashnami saquiringa.

19Chaipi huaquinlla puchushca quirucunataca,

uchilla huahuapash yupai ushangallami.

20Chai huatacunapica, Israelpuramanda puchushcacuna,

Jacobpaj huasi ucupuramanda puchushcacunaca, paicunata llaquichijcunataca,

na ashtahuan yari ushangachu.

Ashtahuangarin Israelcunata Mandaj, jucha illaj Diostallami, tucui shunguhuan yariashpa causanajunga.

21Jacobpaj miraicunamanda puchushcacunaca,

ninan ushaita charij, Taita Diospajmanmi tigraringa.

22Israel llacta gentecunalla.

Mama cucha manñapi tiyaj t'iyu alpashna cashpapash, huaquinllami tigramunguichi.

Cangunata llaquichingapa cachamushpaca,

Diosca tucuita pactachij cashcatami ricuchinga.

23Tucui cai llactapi causajcunata llaquichingapa,

tucuita Mandaj Dios yarishcataca rurangapachami.

24Tucuita Mandaj Diosca, cashnami nin:

“Sion shuti pueblopi causanajuj ñuca agllashca gentecunalla.

Asiria llacta macanajuj runacunataca, na manllanachu canguichi.

Paicunaca, Egiptopi causajcunashnallatami varahuan chugrichishpa, caspihuan macashpa llaquichinajunga.

25Ashtahuangarin, cunanmanda asha punlla jipacamanga, Ñuca fiñarishcapash tucuringami.

Chai jipaca, paicunatami tucuchisha.

26Tucuita Mandaj Dios Ñucaca, Oreb shuti jatun rumi jacapi,

madián llacta runacunata huañuchishcashnami, paicunataca huañuchisha.

Egipto llacta runacunata, Ñuca varahuan jatun yacupi pambashcashnami, paicunatapash tucuchisha.

27Chai punllacunapica, cangunapaj rigrapi apachishcashna llashachijuj llaquitaca anchuchishami.

Cangunapaj cungapi apachishca llashaj yugutapashmi anchuchisha.

Candaca, Ñuca juyashpa agllashca cajpimi, chai yuguca tucuringa” ninmi.

28Asiria llacta runacunaca, Ajat shuti pueblocaman chayamushpami,

Migrón shuti puebloman yalishpa rirca.

Micmas shuti pueblopimi, macanajuj runacunataca yupanajunga.

29Yacuta chimbashpami, Geba shuti pueblopi pacarirca.

Ramá shuti pueblopi causajcunaca ninandami manllanajurca.

Saulpaj, Gabaa shuti pueblomandapash, pacajushpami calpanajurca.

30Galim pueblopi causaj huarmicuna, Lais puebloman uyarijta ninanda caparichiyari.

Anatot pueblopi causajcunapash, ashtahuan llaquipimi canguichi.

31Madmena pueblopi causajcunapash, manllarishpami caparinajun.

Gebim pueblopi causajcunacarin, pacajungapami calpanajun.

32Nob shuti puebloman shamushpami, chaipi samanga.

Chai pueblomandami, Sion lomapi tiyaj Jerusalendaca llaquichi callaringa.

33Tucuita Mandaj Jatun Dios fiñarishpami,

jatun quiru malquicunata fitinshna tucuchinga.

Jatun quirucunata urmachijshnami, jatun tucushcacunataca, urmachishpa pingaichinga.

34Jatun quirucuna junda pambaman hachahuan yaicunshnami urmachinga.

Líbano quirucunapash, alpa cuyujtami urmanga.