1Cunanga, ñuca juyashca cumbamandami candagrini.
Ñuca juyashca cumbagu tarpushca uva chagramandami candagrini.
Paica, urcu alpapimi, uva chagrata charirca.
2Chai alpataca, muyundi jarcashpami, rumicunatapash llujchishpa, ali fucuj uvata tarpushca carca.
Chai chagra chaupipica, torretapash, uvata cutana huasitapashmi shayachirca.
Chai chagramandaca, ali uvatami pallasha yajujpica, sacha uvacunarami fucurca.
3Shinamandami, Jerusalenbi causajcunapash, Judá llactapi causajcunapash shamurca.
Paicunaca, imamanda ñucapash ñucapa uva chagrapash chashna tucushcata ricungapami shamurca.
4¿Uva chagrapica, imata ashtahuan rurana carcani?
¿Imashpata, ali uvacunata pallasha yajujpica, sacha uvacunara fucushca, canga?
5Cunanga, ñuca uva chagrata imata ruranatami villagrini:
Uva chagrataca pipash apachunmi, muyundi jarcashcatapash urmachishpa, saquigrini.
Pipash yaicushpa pallachunmi, jarcashcatapash urmachishpa, saquigrini.
6Chai pambapica, imapash illajmi saquiringa.
Chaipica, imatapash na ashtahuan tarpungachu.
Chai alpapica cashacuna, na ali jihuacunallami jundanga.
Fuyutapash, chai alpapica, ama tamiachunmi jarcagrini.
7Israel gentecunaca, tucuita Mandaj Diospaj uva chagrashnami.
Judá llactapi causajcunaca, Pai tarpushca juyailla yurashnami.
Diosca, aliguta ricushpa mandachunmi munarca. Ashtahuangarin, chaipica na alicunallami mirarca.
Shinallata, aliguta causangapa randica, llaquihuan caparinallami tiyashca.
Na ali gentecunata llaquichinamanda8Tauca huasicunata huasichijcunapash, alpacunata cangunapajlla cachun japijcunapash, ¡aij imachari tucunguichi!
¿Cangunallachu tucuilla llactapi, causangapa munanguichi?
9Tucuita Mandaj Dios rimashpami cashna nihuarca:
“Chai, juyailla jatun huasicunapica, pipash na causangachu. Chaicunaca, tucuillami shitashca saquiringa.
10Quimsa cuadra uva chagramandaca, quimsa chunga canchis litro vinollami llujshinga.
Chunga quintal chaupi muyumandaca, chaupi quintal granollami fucunga” nihuarcami.
11Machangapa tutamandata jatarijcunaca, ¡aij imachari tucunguichi!
Paicunaca, ninanda vinota ufiashpami tutacaman machashpa tiyanajun.
12Jatun micuicunata rurashpami, vinota ufiashpa arpacunahuan, salteriocunahuan, tamborcunahuan, gaitacunahuan taquishpa cushijunajun.
Mandaj Dios imatalla rurashcatapash, napacha yarishpami chashna causanajun.
13Ñuca agllashca gentecunaca, ñucata na cazushcamandami, prezu apai tucunga.
Chaipimi, paicunaca, yarjaimanda huañunga. Shinallata paicunaca, yacumandami chaquishpa huañunga.
14Shinamandami Seolpash, ninan millanayai animalshna, shimitapash pascashcalla shuyajun.
Chaimanmi, ninanda alicachi tucushca runacunapash, paicunahuan cushijuj ashtaca gentecunapash urai huashajunga.
15Chaipimi runacunaca, pingai tucushpa urai cumuringa.
Ninanda jariyashpa causajcunapash. ninandami pingai tucunga.
16Ashtahuangarin Mandaj Diosca, aliguta ricushpa mandajushcamandami, ninanda jatunyachi tucunga.
Jucha illaj Diostaca, alitalla ruraj cashcamandami, ninanda alicachinajunga.
17Llamacunataca, paicuna imashna michij cashcashnami michinajunga.
Charijcunapaj tarpushca pambacunataca, na rijsishca runacunami tucuchinga.
18Na alita ruranataca, huascahuan aisashpa apamunshna mirachijcunapash,
juchata ruranataca, carretata aisana huascahuan huatanshna mirachijcunapash, ¡aij imachari tucunga!
19Paicunaca, cashnami ninajun: “Taita Diosca, Pai imata rurasha nishcatapash, ñucanchi ricujta pactachishpachari ali canman.
Israelcunapaj jucha illaj Diosca, ñucanchi yachachun ali yuyaita cushpachari ali canman” ninajunmi.
20Na alitara alimi nishpa, alitara na alichu nishpa causajcunapash,
Punllatara, tutami nishpa, tutatara punllami nishpa purijcunapash,
Jayajtara mishquimi nishpa, mishquitara jayajmi nijcunaca ¡aij imachari tucunga!
21Paicunallata, alipacha yachajushcami canchi nijcunapash,
Shinallata, paicunapaj yuyaipilla, ali yuyaitami charinchi nijcunaca, ¡aij imachari tucunga!
22Vinota ufiangapalla alicunapash,
ashtahuan ali machangapa chapujcunapash, ¡aij imachari tucunga!
23Culquita pacalla japishpa, na alita rurajcunapash,
alitalla rurajcunata llaquichijcunapash, ¡aij imachari tucunga!
24Chaimandami paicunaca, jupata rupachijpishna, ujshata rupachijpishna tucuringa.
Shinallata, sisacuna alpapi ismushpa tucurinshna, yuracuna sapindi ismunshnami tucuringa.
Tucuita Mandaj Dios mandashcata na cazushcamanda, Israelcunapaj jucha illaj Dios rimashcata, na alicachishcamandami, chashna tucuringa.
25Shinamandami Mandaj Diosca, pai agllashca gentecunahuanga, ninanda fiñarishpa llaquichirca.
Urcucunapash ninanda cuyujtami, Paipaj ninan ushaihuan tucuchirca.
Huañushcacunaca, chaupi ñangunapimi sirinajurca.
Chashna rurashpapash, Pai ninanda fiñarishcataca, na yalichishpami. Ashtahuangarin, Paica llaquichishpa catingarami.
26Caru llactapi causaj gentecunata cayangapami, banderata shayachinga.
Cai pachapi causajcunatami, tucuillata silbashpa cayanga.
Shina cayajpimi, cai pachapi causajcunaca calpashpa chayamunga.
27Paicunaca, pipash na shaijushcachu canga.
Pipash na nitijangachu. Paicunataca puñuipash na japijpimi, maijambash na puñunga.
Paicunaca imata rurangapapash, alichirishcallami canga.
Paicunapaj chaquipi churajushpa huatarishcapash, na fitiringachu.
28Paicunaca, macanajungapa flechacunahuan, arcocunahuan alichirishcallami canga.
Caballo sillucunapash, rumishna shinllicunami canga.
Carretacunapash, alipacha calpanallami canga.
29Paicunaca, leongunashnami caparinajunga.
Huahua león huacanshna caparishpami, micunatapash quiruhuan japishpa aisanajurca.
Chashna apanajujpica, pipash na quichui ushangachu.
30Chai punllapica, mama cucha ninanda huacanshnami uyarijunga.
Chai llactata ricujpica, ninan llaquicunahuanmi tucurijunga.
Chai punllapica, indipash na punchayachingachu.
Who We AreWhat We EelieveWhat We Do
2025 by iamachristian.org,Inc All rights reserved.
