1Mandaj Diosmanga, mushujta candaichiyari.
Tucui cai pachapi causajcuna, Mandaj Diostaca candaichiyari.
2Mandaj Diostaca, candashpa, alimari Cangui nichiyari.
Pai quishpichij cajtaca, punllandi villaichiyari.
3Pai ninan ushaita charijtaca, tucui llactacunapi villaichiyari.
Pai imatalla alita rurashcataca, tucui gentecunaman villaichiyari.
4Mandaj Diosca ninan ushaitami charin.
Paitaca ninandami alicachina canguichi.
Paica, rurashca dioscunataca yalipacha, ninan ushaita charij Diosmi.
5Shuj gentecunapaj dioscunaca, rurashcalla dioscunami.
Mandaj Diosca, jahua pachata ruraj Diosmi.
6Paitaca, juyaillaguta candashpami jatunyachina canguichi.
Paipajlla huasipica, juyailla punchapamba, ninan ushaimi ricurin.
7Tucui ayllucunami, Mandaj Diostaca, jatunmi Cangui nina canguichi.
Mandaj Diostami, ninan ushaita charij, punchapambami cangui nina canguichi.
8Mandaj Diostaca, ninan ushaita charij cajpimi alicachina canguichi.
Ofrendacunata apashpa, Paipaj huasi patiocunaman shamuichiyari.
9Mandaj Diostaca, jucha illaj, ninan juyailla cashcamandami alicachina canguichi.
Paipaj ñaupajpimi, ninan manllaihuan tucuicuna alicachina canguichi.
10Tucui llactacunapimi: “Mandaj Diosca jatun mandajmi” nishpa villana canguichi.
Paimi, cai pachatapash shinllitapacha churarca.
Pipash na cuyuchi ushangachu.
Paica, tucuicunata aliguta ricushpami mandan.
11Jahua pachapipash cushijuichiyari.
Cai pachapipash ninanda cushijuichiyari.
Mama cuchapash, chaipi ima tiyajcunapash ninanda huacashpa jatarichiyari.
12Pambapash, chaipi tucui ima tiyajcunapash ninanda cushijuichiyari.
Quirucunapash, ninanda cuyurishpa cushijuichiyari.
13Cai pachaman ña shamujuj Mandaj Diospaj ñaupajpi cushijuichiyari.
Paimi, cai pachapica aliguta ricushpa mandangapa shamunga.
Paica, cai pachataca alitalla rurashpami mandanga.
Tucui llactacunatami, na llullaj Shimihuan Paica mandanga.
Who We AreWhat We EelieveWhat We Do
2025 by iamachristian.org,Inc All rights reserved.
