1Taita Dioslla,
ñuca llaquirishpa mañajujtaca uyahuayari.
Ñucata fiñajcunata ama manllangapa, yanapahuayari.
2Pacalla yarinajuj, na alita rurajcunamandaca huacaichihuayari.
Ñucata llujchingapa pacalla parlarishpa, jatarij na alita rurajcunamanda huacaichihuayari.
3Paicunapaj jalluca, espadata filuyachishcashnami,
flechata shitajshnami llaquichij shimita rimanajun.
4Alitalla ruraj runata, llaquichingapami chashna ruranajun.
Cungashcapi flechacunahuan shitajshnami llaquichinajun.
5Na alita rurana munaihuanllami causanajun.
Pandachina lazucunatami churanajun.
Shina churashpami: “¿Caitaca, pita ricungayari?” ninajun.
6Jatun na alita rurangapaca, caita chaita alipacha tapushpami yachanajun.
Tucui paicunapaj shungupi imata yarinajushcatapash, alimi yachan.
Pipash na yachai ushangachu, yanajunmi.
7Ashtahuangarin Taita Diosmi paicunataca, flechahuan chugrichinga.
Cungashcapimi, paicunataca huañuna llaquicuna japinga.
8Paicunapaj jallullatami llaquipi urmachinga.
Chaita ricushpami tucuicuna manllarinajunga.
9Shinamandami, gentecunaca manllarishpa,
Taita Dios imatalla rurashcata villanajunga.
Chaimandami, Dios imatalla rurashcataca yachanajunga.
10Alitalla ruraj runaca, Mandaj Dioshuan cushijushpami, Paita yariashpa causajunga.
Ali shunguta charij runacunami chashna cushijunajunga.
Who We AreWhat We EelieveWhat We Do
2025 by iamachristian.org,Inc All rights reserved.
