ISAÍAS 52 - Quichua Imbabura 2016

Sion pueblotaca, Taita Diosmi llaquicunamanda llujchinga

1Sion pueblolla, ninan ushaihuan jatarilla.

Diospajlla shicanyachishca Jerusalén pueblolla, juyailla churajunata churajuilla.

Circuncisionda na rurashca runapash, na ali runapash, napacha chaiman cutin yaicungachu.

2Jerusalén pueblolla, jatarishpa alpatapash chafsirilla.

Sion pueblomanda prezu apai tucushca causajcunalla,

cangunapaj cungapi huatashcataca pascarichiyari.

3Mandaj Diosca: “Cangunaca, yangamandami, apai tucurcanguichi.

Chaimandami, cangunataca culquitapash na cushpallata llujchimugrini” ninmi.

4Mandaj Jatun Diosca, cashnatapashmi nin:

“Ñuca agllashca gentecunaca, yalishca huatacunapica, Egiptopi causangapami urai rinajurca.

Shinallata, Asiria llacta gentecunapash yangamandami prezu aparca.

5Cunanga, Ñuca agllashca gentecunata yangamanda prezu apashca cajpica, ¿imatata caipica rurajuni? ninmi Mandaj Diosca.

Paicunata apashpami, ninanda llaquichishpa caparinajun.

Ñuca shutitapash, punllandimi ninanda na ali shimicunata rimashpa, yangapi churanajun, ninmi Mandaj Diosca.

6Shinamandami, Ñuca agllashca gentecunaca, chai punllapica Ñucata rijsinajunga.

Ñucallatami chaicunata pactachingapaca chaipi casha” nircami.

7¡Quishpirina ali villanata villangapa, jahua urcuta shamuj runaca, juyaillagumari!

Chai runaca, ali causaimanda, quishpirinamanda, shuj alicunatapashmi villanga.

Sion pueblopi causajcunamambash: “¡Cangunapaj Taita Diosmi mandagrin!” nishpami villanga.

8¡Uyaichiyari, torremanda ricuj runacunaca, ninanda cushijushpami, tandanajushpa caparinajunga!

Sion puebloman, Mandaj Dios cutin pushamujtaca, cangunapaj ñavihuanmi ricunguichi.

9Jichui tucushca Jerusalén pueblolla,

Diostaca tandanajushpa cushijuihuanmi alicachina canguichi.

Mandaj Diosca, Pai agllashca gentecunamanmi cushijuita carashca.

Jerusalenmanda apai tucushca gentecunatami cacharichi tucushca.

10Mandaj Diosca, tucui llactacunapi causajcunapaj ñaupajpimi, Paipaj jucha illaj ushaita ricuchirca.

Ñucanchi Taita Dios quishpichij cajtaca, tucui cai pacha llactacunapi causajcunami ricunga.

11Babilonia llactamandaca, llujshishpa richilla.

Imapash mapataca, na tacarinachu canguichi.

Chai llacta chaupimandaca llujshinami canguichi.

Mandaj Diospajlla shicanyachishcacunata apajcunapash, mapa illajmi cana canguichi.

12Chai llactamandaca, na calpashpa na pacajushpaca llujshinachu canguichi.

Mandaj Diosmi, cangunata ñaupashpa ringa.

Cangunapaj Taita Diosmi, cangunataca tandachishpa pushanga.

Mandaj Diospajta ruraj Runa, llaquicunata apana cashcamanda

13“Ñucapajta ruraj runaca, tucuipimari alicachi tucunga.

Paica, jatunyachi tucushca, alicachi tucushcami canga.

Tucuita yali ashtahuan alipimi churai tucunga.

14Canda ricushpaca, tucuicunami ninanda manllarinajurca.

Ninanda macai tucushpa, chugrishcata ricushpami, ninanda manllarinajurca.

Paica, ña na genteshnalla ricujurcachu.

15Tucui llactamanda gentecunami, ninanda manllarishpa ricunajunga.

Jatun mandajcunapash, Paipaj ñaupajpica, imata rimaitapash na ushanajungachu.

Paicunaca, pipash na villashcatami uyanajunga.

Pipash na villashcata uyashpami, ali yachaj chayanajunga”.