ISAÍAS 13 - Quichua Imbabura 2016

Babilonia llactata llaquichinata villashcamanda

1Babilonia llactata llaquichinatami, Amoz shuti runapaj churi Isaiasman ricuchishpa, cashna nishca:

2“Shuj jatun urcupimi banderata shayachina cangui.

Mandajcuna yaicuna punguta yaicuchunmi,

maquita vichai churashpa paicunata shinllita caparina canguichi.

3Ñucapaj macanajuj ninan shinlli runacunata cayashpami ña cacharcani.

Paicunaca, ñucata alicachishpami jatunyachinajun.

Paicunami, ñuca llaquichinataca pactachinga” nircami.

4Urcucunapica, ashtaca gentecuna caparinshnami uyarijunga.

Llactacunata jatun mandajcuna caparinajujmi uyaringa.

Tucuita Mandaj Diosmi, runacunataca macanajuiman cachangapa ricujunga.

5Caru llactacunamandami shamunajun.

Mandaj Diosmi ninanda fiñarishpa, tucui cai pachata tucuchingapa, Paipajta rurajcunahuan shamujun.

6Ninandapacha caparishpa huacaichi. Mandaj Dios llaquichina punllami ña chayamujun.

Tucui Ushaita Charij Diosmi, ninanda llaquichishpa tucuchingapa shamunga.

7Chaimandami tucuicuna, ushai illaj saquiringa.

Tucuicunami, ña huañugrijunshna tucunajunga.

8Ninandapachami manllarinajunga.

Paicunataca, huahuata ungugrijuj huarmitashnami, jatun nanaicuna japishpa llaquichinga.

Tucuicunami, paicunapaj cumbatallata ricushpa, manllarishpa, imata ruraitapash na ushanajunga.

9Mandaj Dios fiñarishpa, ninandapacha llaquichina punllami chayamujun.

Cai pachataca, tucuillata tucuchishpami, juchata rurajcunataca tucuchinga.

10Shinamandami jahua pachapi tiyanajuj luzerocunapash na ashtahuan punchayachinga.

Indipash llujshishcandi amsayajpimi, lunapash na ashtahuan punchayachinga.

11Mandaj Diosca cashnami nijun:

“Cai pachapi causajcunataca, Ñucata na cazushpa jatun na alita rurashcamandami llaquichisha.

Jatun tucushpa na cazuj ninan shinlli runacunatapashmi ninanda llaquichishpa tucuchisha.

12Runacunataca, ashtahuan ali curitashna, huaquindallami saquisha.

Ofir shuti llactamanda ashtahuan ali juyailla curitashnami, na tarinalla canga.

13Jahua pachatapash cuyuchishpami,

cai llacta alpatapash, pai tiyajushcamandaca, shujman churasha.

Tucuita Mandaj Dios Ñucami, ninanda fiñarishca cashpa chashna rurasha.

14Manllarishpa calpajuj tarugashna, michij illaj llamacunashnami,

paicunapaj llactapi tiyaj pueblocunaman, calpashpa tigranajunga.

15Maijandapash calpajujta ricushpaca, lanzahuanmi huañuchinga.

Maijandapash japishpaca, espadahuanmi huañuchinga.

16Paicunapaj huahuacunatapash, paicunapaj ñaupajpillatami, alpapi shitashpa huañuchinga.

Shinallata, paicunapaj huasicunatapash shuhuashpami,

paicunapaj huarmicunatapash saltianga.

17Paicunataca, Media shuti llactamanda runacunahuanmi, llaquichisha.

Paicunaca, na culquitalla, curitalla munashpa puringachu.

18Huahuacunatapash, flechahuanmi huañuchinga,

Llullu huahuacunatapash na llaquishpami huañuchinga.

Huahuacunataca, na llaquishpami huañuchinga.

19Babilonia llactaca, Caldeo runacunapajca, ninanda alicachi tucushca juyaillagupachami.

Shina cashpapash, Sodoma shuti, Gomorra shuti pueblocunata Dios llaquichishcashnami, chai llactatapash tucuchinga.

20Chai llactapica, pipash na ashtahuan causangachu.

Chashna jichushcami causaita causaicaman saquiringa.

Chaipica, Arabia llacta gentecunapash na carpacunata shayachingachu.

Michijcunapash, animalcunapaj corralta na ashtahuan chaipi charingachu.

21Ashtahuangarin chaipica, jichushca pambapi tiyaj millai animalcunami causanga.

Chaicunapica, chushijcunallami jundanga.

Avestruz shuti angacunami, chaipica causanga.

Sacha chivocunami, chaipica fahuanajunga.

22Mandajcuna tiyana huasicunapipash, hiena shuti animalcunami huacanajunga.

Jatun micuita rurana huasicunapipash, atujcunami purinajunga.

Babilonia llactata chashna llaquichina huatacunaca, ñapachami chayamujun” nircami.