1Mandaj Dioslla, tucui shunguhuanmi candaca alicachipasha.
Tucui juyaillacunata, Can rurashcacunatami villajusha.
2Canmandami ninanda cushijushpa candajusha.
Jahua pachapi causajuj Dioslla, Cambaj shutitaca ninandami alicachijusha.
3Ñucata fiñajcunaca, manllashpami tigrashpa rirca,
Cambaj ñaupajpi urmashpami tucurinajurca.
4Ñucaman ima cuna cashcatapash cushpami charihuashcangui.
Canmi, mandangapa tiyarinapi tiyarishpa, ali cashcatalla rurashpa mandajungui.
5Llactacunapi causajcunataca, shinllita rimashpami, na ali gentecunataca tucuchircangui.
Paicunapaj shutitaca, causaita causaicamanmi chingachircangui.
6Fiñajcunaca huañushpami, causaita causaicaman tucuchi tucushca.
Paicunapaj pueblocunata tucuchijpimi, paicunata yarinapash chaipillata tucurirca.
7Mandaj Diosca, causaita causaicaman causajungallami.
Pai mandangapa tiyarinapi tiyarishpa llaquichingapami causajun.
8Paimi cai pachataca, alitalla rurashpa mandajunga.
Llactacunapi causajcunataca, alipacha ricushpami mandajunga.
9Imagutapash na charij runataca, Mandaj Diosmi huacaichinga.
Paicuna llaquita apajujpipash, Paimi huacaichinga.
10Cambaj shutita rijsijcunaca, Canda yariashpami causanajunga.
Mandaj Dioslla, Canda mascajcunataca, napacha jichurcanguichu.
11Sion lomapi causajuj Mandaj Diosta candaichiyari.
Pai imatalla rurashcataca, gentecunaman villaichiyari.
12Llaquichishcamanda, randi llaquichij Diosca, na cungarcachu.
Llaquihuan cashpa caparishpa mañashcatapash, na cungarcachu.
13Mandaj Dioslla, ñucataca llaquihuayari.
Ñucata na ricunayachishpa llaquichijcunataca ricupayari.
Huañuica ña pungupishna cajpipash, canmi jarcarcangui.
14Canda alicachishpa villajuchunmi quishpichircangui.
Sion pueblo pungucunapi villajuchunmi chashna quishpichircangui.
Can quishpichishcamanda ninanda cushijuchunmi chashna rurarcangui.
15Llactacunapi causajcunaca, paicunallata rurashca utujupimi huashajunajurca.
Paicuna pacalla churashca linllipillatami, japi tucunajurca.
16Mandaj Diosca, chashna alitalla rurashpami rijsi tucushca.
Na ali runaca, paipaj maquihuan rurashca tugllapillatami japi tucurca. Higaion. Selah
17Na ali gentecunaca, Seolmanmi apai tucunga.
Taita Diosta cungaj tucui gentecunapashmi, chaimanllata apai tucunga.
18Imagutapash na charij runataca, causaita causaicamanmi yaringa.
Imagutapash na charijcuna Diospi shuyanajushcapash, napacha tucuringachu.
19Mandaj Dioslla, Can shayarishpa, na ali gentecunata tucuchipayari.
Llactacunapi causajcunaca, Cambaj ñaupajpi llaquichi tucunajuchun.
20Mandaj Dioslla, paicunapica ninan manllaita cachamupayari.
Llactacunapi causajcunaca, runacunalla cashcata yachanajuchun, yuyaita cupayari. Selah
Who We AreWhat We EelieveWhat We Do
2025 by iamachristian.org,Inc All rights reserved.
