1Ñuca juyashca huarmigulla,
canga juyaillagupachami cangui.
Cambaj ñavigupash, quilparishca ucumanda ricujushpaca, palomagushnami cangui.
Cambaj ajchagupash, Galaad lomacunapi ashtaca chivocuna ricurijujshnami.
2Cambaj quirucunaca, milmata rutushca yuraj llamacuna, armashca llujshinajujshnami.
Chai llamacuna, ishcai ishcai llujshinajujshnami.
Paicunapica, maijan llamapash na pailla rijujshnami.
3Cambaj shimiguca, pucalla puchashnami.
Cambaj rimashcagupash juyaillagumi.
Cambaj ñavigupash, quilparishca ucupica, chaupirishca granadagushnami.
4Cambaj cungaguca, macanajunacunata alichingapa David rurashca torreshnami.
Chai torrepi, ninan shinlli macanajuj runacunapaj,
huaranga jarcarina escudocunata juyailla alichishcashnami.
5Cambaj chuchucunaca, ishcai huacharishca tarugacuna,
lirio sisa chaupicunapi shayanajunshnami.
6Nara chishajpi, nara tutayajpillatami,
mirra tiyaj urcuman, incienso tiyaj lomaman vichai risha.
7Ñuca huarmigulla, canga juyaillagupachami cangui.
Cambica, ima na alipash na tiyanllu.
8Ñuca juyashca huarmigulla, Líbano urcumandaca ñucahuan urai jaculla.
Líbano urcumandaca, ñucahuan jaculla.
Amana shuti lomamanda, Senir, Hermón shuti urcu pundacunamanda,
leonguna causaj utujucunamanda, leopardocuna causaj urcucunamanda jaculla.
9Ñuca juyashca huarmigulla, ñuca shungutaca apahuarcanguimi.
Shuj ricuillami, ñuca shungutaca prezunshna apahuarcangui.
Cambaj cungapi huatarishca hualcahuan huatanshnami charijuhuangui.
10¡Ñuca juyashca huarmigulla!
¡Cambaj juyaica, tucuita yali aligumari!
¡Cambaj juyaica, vinotapash yali ashtahuan aligumari!
Canga, tucui mishquilla ashnajujtapash yali juyaillaguta churarishcami cangui.
11Ñuca juyashca huarmigulla,
cambaj shimimandaca balun mishquishnami llujshijun.
Cambaj jallu ucupica, balun mishquipash, lechepashmi tiyan.
Can churajushcapash, Líbano yuracunashnami mishquillagu ashnajun.
12Ñuca juyashca huarmigulla,
sisa tarpushca pambata muyundi jarcashcashnami cangui.
Yacu llujshijujta tapashca, pipash na tacarishcashnami cangui.
13Canga, juyailla granadacuna fucujuj huertashnami cangui.
Shinallata, alheña, nardo sisacunashnami cangui.
14Canga, nardo sisashna, azafrán sisashna,
mishquilla ashnajun virushna, canelashnami cangui.
Shinallata, incienso yuracunashna,
mirra, áloe, tucui mishquilla ashnajun jambicunashnami cangui.
15Shinallata, huertacunapi tiyaj pugyushna,
yacuta llujchingapa allashca pugyumanda,
Líbano pambata rijuj yacushnami cangui.
Huarmi candashcami16Uraman rijuj huairapash jatarilla.
Vichai shamujuj huairapash, shamuilla.
Ñuca sisa pambapi huairamushpa, mishquilla ashnajujtaca jichaichilla.
Ñuca juyashcagu, paipaj huertaman shamushpa,
chaipi juyailla fucushcata micupachunlla.
Who We AreWhat We EelieveWhat We Do
2025 by iamachristian.org,Inc All rights reserved.
