2 CORINTIOS 7 - Quichua Imbabura 2016

1Juyashca crijcuna, Taita Dios carajpi japigrina cashcamandami ñucanchi cuerpohuambash, espirituhuambash, imatapash na alita ruranamandaca anchurina canchi. Taita Diosta manllashpami, juchataca na rurashpa, Paipajlla causana canchi.

Corinto pueblopi causajcuna llaquirishpa Diospajman tigrarijpimi, Pabloca cushijushca

2Ñucanchi imata ninajujtapash uyapaichi. Ñucanchica, pitapash na llaquichishpa, pitapash na huaglichishpa, pitapash na umachishpami purircanchi.

3Cangunata llaquichingapaca na chashna nijunichu. Ñuca tucui shunguhuan juyajushcamandami, huañushpapash, causashpapash cangunahuanga pacta casha. Cashnataca pundallata ñami nijurcani

4Cangunaca, ali catinajujta ricushpami, cushijushpa, imatapash na pacashpa villajuni. Shinamandami, ninan llaquicunata apanajushpapash, ninandapacha cushijushpa, shinlli tucushpa catini.

5Macedonia llactaman chayamushpaca, tucuicuna llaquichinajujpimi, ashatallapash na samai usharcanchi. Ñucanchita na ricunayachijcunapash llaquichinajujpi, ñucanchipash ninan manllaihuan cashpami chashna carcanchi.

6Shina cajpipash, llaquilla causajcunata cushichij Taita Diosmi, Titota cachamushpa ñucanchitaca ninanda cushichirca.

7Na pai shamushcahuanlla cushijushca cashpami, ashtahuangarin paitapash canguna cushichijpi ninanda cushijushca carca. Shinamandami, canguna ñucata juyashpa llaquirishpa huacanajujta uyashpacarin, ashtahuan ninanda cushijurcani.

8Quilcashpa cachamujpi llaquirishcata yachashpami, ñucapash ashaguta llaquirircani. Shinapash, quilcashpa cachamushca cangunata ashaguta llaquichishca cajpipash, cunanga na llaquirinichu.

9Cangunapajman, quilcashpa cachamushcahuan ñuca llaquichishcamandaca, na cushijunichu. Diospajman llaquirishpa tigrashcamandami ninanda cushijuni. Cangunataca, Taita Dios munashcashnami llaquichishca. Ñucanchi, cangunaman quilcamushpaca ima na alitapash na rurashcachu canchi.

10Taita Dios munashcashna llaquirishpa, na ali causajushcata saquishpaca quishpiringami. Chaimandaca na llaquirinachu canchi. Ashtahuangarin, cai pachapi imapash llaquicunaca chingaimanmi apanga.

11Dios munashcashnallatami ima llaquitapash apashcanguichi. Ricuichi, cangunapica: Ñuca villashcacunata shujcunapaj ñaupajpi ali cashcatami ricuchircanguichi, ima na alita rurajtapash fiñashcanguichimi, manllaitapash charishcanguichimi, ninan juyaitapash charishcanguichimi, na ricunayachijcunata llaquichina yuyaitapash charishcanguichimi. Shina rurashpami, tucuipi alitalla rurashcata ricuchircanguichi.

12Shinallata, caita quilcamushpaca, llaquichijmandapash, llaquichi tucunmandapash na quilcamurcanichu. Ashtahuangarin, Taita Diospaj ñaupajpi, canguna, ñucanchita yarianajushcata ricuchingapami quilcamurcani.

13Shina rurashpami ñucanchitaca cushichircanguichi.

Shinallata Tito, paipaj shungupi cangunamanda ninanda cushijushcata yachashpami ashtahuan cushijurcanchi.

14Cangunata Titoman, ñuca alicachishpa villashcamandaca, na pingai tucushpami cushijurcani. Ashtahuangarin, imata cashpapash na llullashpami cangunaman villarcanchi. Shinallata, cangunaman Titota alicachishpa ñucanchi villashcacunaca, na llullachu carca.

15Cangunami tucui shunguhuan, aligutapacha cazushpa, manllashpa, ima nishcatapash uyangapa Titotaca chasquircanguichi. Chaita yarishpami, ashtahuan ninanda llaquishpa cushijujun.

16Imata nijpipash, aliguta crishpa cazuj cashcata yarishpami cangunamandaca ninanda cushijuni.