1 TIMOTEO 6 - Quichua Imbabura 2016

1Gañan causajcunaca, mandajcunataca tucuipi alicachishpa cazuchun ninimi. Taita Diostapash, ñucanchi imata yachachishcatapash, na yangapi churachunmi chashna cazuna canguichi.

2Crij mandajcuna cajpica, huauquillami yashpara yangapi churanguiman. Ashtahuangarin, crij cajpica, ashtahuan aligutami paiman rurashpa causana ninimi. Mandajcunaca, crij cashcamandami, canguna aliguta juyaihuan rurashcata chasquinata charin. Cai ñuca yachachishcatami, shinllitapacha rimashpa yachachina cangui ninimi.

Imata charishcallahuan cushijushpa causana cashcamanda

3Huaquingunaca, ñucanchi Apunchi Jesucristo yachachishcatapash, Diosta imashna aliguta yarichun yachachishcatapash, na chasquishpami, pandatara yachachinajun.

4Chaicunaca, imatapash na yachashpami, jariyashpalla, fiñanajuicunata jatarichishpa, imatapash caita chaita nishpa purinajun. Chashna cashpami, shujcuna charishcata munashpa, fiñanajushpa, na ali shimicunata rimashpa, shujcunatapash na alicachinajun.

5Chashnacunaca, runacuna imatapash na alita yachachishcatalla yarishpami, na llullashpa villajuj shimitapash saquishpa, fiñanajushpalla purinajun. Chashnacunaca, charijyangapalla munashpami, Diosta catinchimi nij tucunajun. Paicunahuanga ama tandanajunguichu ninimi.

6Ashtahuangarin, imaguta charishcahuanlla cushijushpami, Taita Diospajlla causajushcamandaca ninan cushijuita japina canchi.

7Cai pachapica, imagupash illajmi huacharircanchi. Shinallata, cai pachamandaca, na imatapash apashpa rinachu canchi.

8Shina cashcamanda, micunaguta, churajunaguta charishcahuanlla, ninanda cushijushpami causana canchi.

9Ashtahuangarin, charijyana munaihuanlla causanajushpami, tugllapi urmajshna juchata ruranajun. Chashna cashpami, gentecunaca, ninandapacha yangata imatapash charingapa munashpa, llaquicunata apashpa, chingaita chingagrinajun.

10Culquita juyashpa causanami, imatapash na alitalla ruranataca sapishna callarichijun. Huaquingunaca, culquita ninanda munashpami, crishpa catijushcatapash saquishpa, ninan llaquicunata apanajun.

Macanajushpa mishajshnami, can crishcataca ali catina cangui

11Ashtahuangarin canga, Taita Diospajta ruraj cashcamandami, chai na alicunamandaca anchurishpa, alitalla rurashpa, juyaihuan catishpa, ali crishpa, juyaj shunguhuan, na ñapash fiñarishpa, ali shunguhuan taita Diospajtaca rurana cangui.

12Can crishcataca, macanajushpa mishajshnami aliguta catina cangui. Causaita causagrinata japichun, Taita Dios agllashcamandami, chaitaca na saquina cangui. Canllatami ashtacacunapaj ñaupajpi, “tucui shunguhuan crinipachami” nishpa chasquircangui.

13Tucuicunaman causaita caraj Taita Diospaj ñaupajpipash, Jesucristopaj ñaupajpipashmi, cai shimicunata aliguta pactachijuchun mandani. Jesucristoca, Pai imapa shamushcatapash, Poncio Pilatopaj ñaupajpimi tucui ali villarca.

14Cai ñuca mandashcataca, ñucanchi Apunchi Jesucristo tigramungacaman, ima na alitapash na rurashpa, na juchachi tucushpa, aliguta pactachingui ninimi.

15Pai tigramuna punllacuna pactajpimi, Pai ninan ushaita charishcata, Pailla tucuita Mandaj cashcata, mandajcunatapash Jatun Mandaj cashcata, mandaj taitacunapaj Mandaj cashcataca ricuchimunga.

16Paillatami, huañuitapash na huañushpa causajushcata, pipash na chayai ushanalla michapi tiyajushcataca ricuchimunga. Paitaca, maijan runacuna ricungapa munashpapash na ricushcachu. Paillami, ninanda alicachi tucushpa, causaita causaicaman tucuita mandangapa ushaita charin. Chashna cachun.

17Cai pachapi ninan charijcunataca, chai charishcahuan ama jariyanajuchunmi, shinllita rimana cangui. Chai charishcacunaca tucurinalla cashcamandami, chaicunahuanga na cushijushpa, ashtahuangarin, ñucanchi cushijuchun tucuita caramuj, causajujlla Taita Diosta yariashpa causachun yachachina cangui.

18Imatapash aliguta rurashpa, shujcunaman ashtaca alicunata rurashpa, cushijuihuan imagutapash ninanda rurashpa causachunmi yachachina cangui.

19Shina rurashpaca, aliguta huasichingapa callarijshna, jipa punllacunapi charij cangapa alichinajushcamandami, causaita causagrinata japinga.

Quilcaita tucuchijushpami Pabloca, Timoteoman mingashca

20Juyashca Timoteo, canman ñuca mingashcataca aliguta pactachingui ninimi. Yanga, na ali parlocunata, ali yachanacunatashna llullashpa yachachingapa munajcunamandaca anchuringui ninimi.

21Huaquingunaca chashna yachachishcacunata catishpami, crishcatapash saquishpa, pandashpa causanajun. Taita Dios ninanda juyashpa, canhuan cachunmi munani. Chashna cachun.