EZEQUIEL 37 - Quichua Imbabura 2016

Chaquishca tullucuna pambapi sirishcamanda

1Mandaj Diosmi, paipaj ninan ushaihuan ñucapajman shamurca. Mandaj Diosllatami, paipaj Espirituhuanga, tullucuna chaquishca sirinajuj pambaman pushahuarca

2Chaipimi chaquishca tullucuna sirinajuj pambata pushahuarca. Chaipica, ashtacapacha ninanda chaquishca tullucuna jundami carca

3Chaipimi cashna nishpa tapuhuarca: “Huañuna aichayuj runa, ¿chai tullucunaca, cutin causarishpa purinajungachu?” nihuarcami. Shina nijpimi: “Mandaj Dioslla, Canmi yachapangui” nircani.

4Chaimandami cashna nihuarca: “Cai tullucunaman cashna nishpa villai: ‘Chaquishca tullucuna, Mandaj Dios imata nishcata uyaichi’ ningui.

5Mandaj Diosca chai tullucunataca cashnami nin: ‘Ñucami cangunamanga, causaita caraj, causana espirituta churaj cani, chaimandami causaringuichi.

6Cangunataca cutin angucunata churashpami, aichatapash churashpa, chai jahuapica carahuan quilpasha. Chai jipami, cangunapi causana samaita churasha. Shina rurajpimi, causaita charinguichi’. Chaita ricushpami Ñucataca, ‘Mandaj Dios cajta yachanguichi’ nishpa villai” nihuarcami.

7Shina nijpimi, Pai mandashcashna, tullucunaman villarcani. Chashna villajujpimi, alpa mamaca ñapash, culunlla huacashpa cuyurca. Chaipimi tullucunaca, tucuilla paipura tandanajurca.

8Chai tullucunapica, angucuna ñapash tiyarishpa, aicha quilpajta, chai jahuataca cara quilpajtami ricurcani. Chaicamanga causaita charina, samaica na tiyarircachu.

9Chaimandami cashna nihuarca: “Huañuna aichayuj runa, causana samaiman villashpa cashna ningui: Mandaj Diosca cashnami nin: ‘Causaita cuj samai, chuscu suyucunamanda shamushpa, cai huañushcacunata fucushpa causachipai. Paicunaca causaringallami’ nishpa villai” nihuarcami.

10Chashna nijpimi, Mandaj Dios nishcashna villarcani. Chaimandami, causaita cuj samai paicunapi yaicujpi causarishpa, tullucunaca shayarirca. Paicunaca, ashtaca ashtaca macanajuj runacunashnami carca.

11Mandaj Diosca cutinmi cashna nihuarca: “Huañuna aichayuj runa. Cai tullucunaca, Israel gentecunami. Paicunaca cashnami ninajun: ‘Ñucanchi tullucunaca chaquishcami carca. Cutin causaita charinataca na yashcami carcanchi’ ninajunmi” nircami.

12Cutinmi cashna nishpa villai nihuarca: Mandaj Jatun Diosca cashnami nin: “Cangunataca Ñuca agllashcacuna cashcamandami, alpa ucupi pambashca cajpipash, cutin causachishpa, Israel llactaman pushamusha.

13Ñuca agllashca gentecuna cashpami, pambashcamanda, llujchishpa pushamujpi, Mandaj Dios cashcataca yachanguichi.

14Ñuca Espirituta cangunapi churajpimi, cutin causaringuichi. Cangunataca, cangunapaj llactapillata causachun churajpimi, Ñucataca Mandaj Dios cajta yachanguichi” ninmi Mandaj Diosca.

Judá llactahuan Israel llactahuan cutin tandanajushcamanda

15Mandaj Diosca cutinmi cashna nihuarca:

16“Huañuna aichayuj runa. Cunanga, shuj caspita japishpa, chai caspipica: ‘Judá llacta gentecunamambash, paipaj cumba Israel llacta gentecunamambash quilcangui’. Chai jipaca, cutin shuj caspita japishpa, chaipica: ‘Josepaj mirai Efraín ayllu gentecunamanbash, paicunapaj cumba Israel gentecunamanbash quilcangui’.

17Chai jipaca shujlla tucuchun, ishcandi caspicunata tandachingui. Cambaj maquipica, shujllami tucunga.

18Cambaj llactapi causajcuna chaita ricushpaca: ‘Caita rurashpaca, ¿imatata yachachingapa munangui? ¿Nachu ñucanchiman chaitaca villanguiman?’ nishpami” tapunajunga.

19Chashna tapujpica cashna ningui: “Mandaj Diosca cashnami nin: ‘Ñucami Efrainbaj miraicuna mandanajuj, Josemanda miraicunapaj caspitapash, paipaj ali cumba Israelcunapaj caspitapash, Judamanda miraicunapaj caspihuan tandachishpa shujllata rurasha. Shina rurajpimi Ñuca maquipica, shujlla caspi tucunga’ ninmi” ningui.

20Can quilcashca caspicunataca, paicuna ricujta cambaj maquipi charijunguilla.

21Paicunataca cashna ningui: “Mandaj Diosca cashnami nin: ‘llactacunaman rishca Israelcunata, cutin tigrachimushpami paicunapaj llactapi churasha.

22Paicunataca, Israel lomacunapi, shujlla jatun llacta cachun churashpami, shuj Jatun Mandajta churasha. Chashna rurajpimi, ña na ishcai llacta tucunga, na ishcai mandajpash tiyangachu.

23Rurashcalla dioscunahuambash na ashtahuan mapayangachu. Na cazushpa, juchacunata rurajcunapash na ashtahuan tiyangachu. Ashtahuangarin ñucata na cazushpa juchacunata rurashcataca quishpichishami. Tucui juchacunata anchuchishpa, Ñuca agllashca gentecuna cajpimi, Paicunapa Mandaj Dios cashcata yachanga.

24Ñucapajta ruraj Davidmi, paicunata jatun mandaj canga. Tucuicunami, shujlla michijta charinga. Paicunaca, tucui Ñuca mandashcacunatami pactachishpa causanajunga

25Ñucapajta ruraj, Jacobman carashca llactapimi causanajunga. Chai llactapimi, cangunapaj ñaupa taitacunapash causanajurca. Chai llactapimi paicunapash, paicunapaj cati mirai huahuacunapash, unaita causanajunga. Ñucapajta ruraj Davidmi, paicunapaca causaita causaicaman jatun mandaj canga.

26Causaita causaicaman cushijushpa causangapami, paicunahuanga ari nirisha. Paicunata chaipi causanajuchun churashpaca, ashtacatami mirachisha. Ñucapajlla huasitapash, paicunahuan causangapami, paicunapaj chaupipi causaita causaicaman churasha.

27Ñucapajlla jatun carpatapash, paicunapaj chaupipimi churasha. Ñucami, paicunapaj Taita Dios casha. Paicunaca, Ñuca agllashcacunami canga.

28Ñucapajlla huasitapash, paicunapaj chaupipi causaita causaicaman tiyajuchunmi huasichisha. Chaita ricushpami, shuj llactapi causajcunapash, Israel gentecunataca Ñuca agllashca cashcata yachanga’ ninmi nishpa villangui” nihuarcami.