1Shinamandami Job runaca cashna nirca:
2“Ñuca ima nijujtaca ali uyanguichi.
Ñuca ima nijujta uyashpallami, cushichihuanguichi.
3Ñuca ima nijujtaca, upalla uyahuaichi.
Chai jipaca, ima nishpapash asinguichilla.
4¿Maijan runatapash juchachishpachu rimajuni?
¿Ima nishpata ñuca shungupica, na llaquirishayari?
5Ñucata ricushpami, manllarina canguichi.
Shimitapash maquihuan quilparishpami manllarina canguichi.
6Chaicunata yarishpaca, ñucallatami ninanda manllarini.
Ñucaca ninanda manllarishpami chujchurini.
7¿Imashpata Diosta na manllajcunara causanajunlla?
¿Imashpata rucuyashpapash, ashtahuan charijyanajun?
8Paipaj huahuacunaca, juyailla viñashpami aliguta causanajun.
Paimanda mirai huahuacuna huacharishpapashmi, paitaca cushichinajun.
9Paipaj huasipi causajcunaca, imatapash na manllanllu.
Paicunataca, Taita Diospash na llaquichinllu.
10Paipaj huagracunapash ninanda miranajunllami.
Paipaj huagracunapash huachashpa, juyaillami miranajun.
11Paipaj huahuacunapash, llama huahuacunashnami purinajun.
Chai huahuacunaca fahuashpami calpariyanajun.
12Chai na ali gentecunaca, uchilla tamborta, citarata taquijta uyashpami fahuanajun.
Gaitata taquijta uyashpami cushijunajun.
13Tucui punllami, cushijushpa purinajun.
Ima llaquipash illaj huañushpami, Seolman urai rinajun.
14Taita Diostaca, cashna nishpami rimanajun:
‘Ñucanchi ñaupajmanda anchurilla.
Can imata rurachun mandashcatapash na cazui usharingachu.
15Ninan Ushaita Charij Diospajta rurangapaca Paica, ¿pita canga?
¿Paita mañashpaca, imatashi tarishun?’ ninajunmi.
16Imata charishcatapash, paicunallata mirachishcatami yanajun.
Na ali gentecunapaj yuyaicunaca, ñucataca ama pandachishca cachun.
17¿Imashpata, Diosta na manllajcunara ali rucuyashpa huañunajun?
Imashpata, chai gentecunara llaquicunapash illaj causanajun?
Paicunataca, Taita Diospash na fiñarishpa llaquichinllu.
18Paicunaca, huaira apanalla jupashnami.
Acapana apajpi rinalla jupashnami.
19Taita Diosca, taitacunapaj juchamandami, huahuacunataca llaquichinga.
Juchata rurashcamanda llaquichijpimi Diostaca rijsinga.
20Paipaj ñavihuanmi, llaquitaca ricunga.
Jatun ushaita charij Diosca, ninandami llaquichinga.
21Huañushca jipa paipaj ayllucuna ima tucunataca ¿imatashi yachangapa munanga?
Causaitaca, asha quillacunatalla causajpimi quichunga.
22¿Taita Diostaca, ¿pita yachachingapa ushaita charinga?
Jatun tucushcacunataca, paimi tapuchishpa llaquichinga.
23Chai runaca, alipacha shinlli cashpapash huañungallami.
Imatapash na manllashpa cushijushca causajushcandimi huañunga.
24Paipaj aichapipash alipacha racuyashcami canga.
Paipaj tullucunapash, alipacha virahuanmi canga.
25Ashtahuangarin shuj runaca, llaquita causajushpami huañunga.
Paica, micunatapash na ali micushpami huañunga.
26Shina cashpapash, ishcandillatami ñutu alpa tigrangapa huañunga.
Ishcanditallatami, jurucuna micujpi tucuringa.
27Canguna imata yarinajujtapash yachanimi.
Ñucata fiñashpa juchachingapa, imata yarinajujtapash yachanimi.
28Cangunaca cashnami ninguichi:
‘Mandaj runapaj huasica, ¿imata tucushca?
Diosta na manllajcuna causanajushca huasicunaca, ¿maipitayari?’ ninguichimi.
29Cangunaca, ñanda yalijcunataca, ¿nachu tapushcanguichi?
Paicuna villashcataca, ¿nachu ali uyashcanguichi?
30Dios llaquichijui punllapi, na alita ruraj runacuna,
pacajushunllami ninajujtaca, ¿nachu uyashcanguichi?
Paicunaca, Dios llaquichijui punllapica, pacajui ushashunllami ninajurcami.
31Pai na alita rurashcataca, ¿pita ricuchingayari?
Pai chashna na alita rurashcamandaca, ¿pita llaquichingayari?
32Paitaca, pambangapami apanga.
Paita pambashca alpa mundun jahuapimi huacashpa pacarinajunga.
33Paita pambana alpapash, juyaillagumi canga.
Huañushcata pambangapa rinajujpica ñaupajtapash, huashatapashmi rinajunga.
Ashtaca gentecunami, paitaca ñaupashpa rishca.
34Ñucataca, ¿imashpata yanga cushichihuanguichi?
Canguna imata rimashcapash llullamari cashca” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
