ÉXODO 18 - Quichua Imbabura 2016

Taita Jetromi, Moisesta ricungapa rishca

1Moisespaj suegro taita Jetroca, Madián llactapaj sacerdotemi carca. Paica, Israelcunaman tucui imatalla Moisés, Taita Diospaj ushaihuan rurashcatami yachaj chayarca. Shinallata Mandaj Dios, Israelcunata Egiptomanda imashna llujchishcatapashmi yachaj chayarca.

2Moisés, paipaj huarmi Seforata, taita Jetropajman cachajpimi, paica aliguta chasquirca.

3Shinallata Moisesca, paipaj ishcandi churicunatapash cachajpimi, taita Jetroca aliguta chasquirca. Shuj churica: “Caru llactamanda shamushcami causajuni” nishpami, Gersón shutita shutichishca carca.

4Caishuj churica: “Ñuca taitapaj Taita Diosmi, Faraonbaj espadahuan huañuchi tucunamandami quishpichihuarca” nishpami, Eliezer shutita shutichishca carca.

5Moisespaj suegro taita Jetroca: “Mandaj Diospaj urcuman chayanapi, jichushca pambapimi Moisés carpata shayachishpa tiyajun” nijta uyashpami, paipaj ushi Seforatapash, ishcandi churicunatapash pushashpa ricungapa rirca.

6Taita Jetroca, Moisestaca: “Ñucaca, cambaj suegro Jetromi cani. Cambaj huarmindi, cambaj ishcandi churicunandimi, cambajman shamujuni” nichunmi cacharca.

7Chaita yachashpami Moisesca, paipaj suegrota chasquingapa llujshishpa tuparishpaca, urai cumurishpa, ugllashpa mucharca. Ishcandimanda, “alillachu capangui” ninajushca jipami, carpaman tigranajurca.

8Moisesca, Mandaj Dios Israelcunata juyaimanda, Faraondapash, Egiptopi causajcunatapash tucui imatalla rurashcatami, paipaj huarmipaj taitaman villajurca. Shinallata, ñanda shamunajushpa tucui llaquicunata charijpi, Mandaj Dios imashna paicunata quishpichishcatapashmi villajurca.

9Taita Jetroca, Mandaj Dios Israelcunaman tucui alicunata rurashpa, Egiptopi causajcunapaj maquimanda cacharichishcata yachashpami, ninanda cushijurca.

10Shinamandami taita Jetroca cashna nijurca:

“Egiptopi causajcunapaj maquimandapash, Faraonbaj maquimandapash cacharichij Mandaj Diosca ninanda jatunyachi tucushca cachun. Paimi, Israelcunataca, Egiptopi causajcunapaj maquimandami cacharichishca.

11Cunanga Mandaj Diostaca, rurashcalla dioscunatapash ashtahuan yali ninan ushaita charijtami yachani. Jariyashpa jatun tucushcacunapaj maquimanda llujchimushcata ricushpami, chashna yachani” nijurcami.

12Shina nishpami, Moisespaj suegro taita Jetroca, tucuillata rupachina animalcunatapash, Diosman cushpa huañuchina animalcunatapash japishpa, Taita Diosman cushpa rupachijurca. Chaimanmi Aaronbash, Israelcunata mandaj rucu taitacunapash, Moisespaj huarmipaj taitahuan, Taita Diospaj ñaupajpi micungapa shamunajurca.

Juezcunata churashcamanda(Deut. 1:9-18)

13Cayandi punllami Moisesca, Israelcuna ima llaquicunata charishcata ricushpa alichingapa tiyarirca. Israelcunaca, Moisespaj ñaupajmanmi, tutamandata callarishpa, chishicaman shamunajurca.

14Moisespaj suegroca, Israelcunahuan tucui imatalla Moisés rurajujta ricushpami cashna nirca:

“Cai gentecunahuanga, ¿canga imatata rurangui? ¿Imashpata canlla tiyaringui? ¿Imashpata tucuilla gentecunaca, tutamandata callarishpa, chishicaman cambaj ñaupajman shamunajun” nircami.

15Shina nijpimi Moisesca, paipaj huarmipaj taitataca cashna nirca:

“Gentecunaca, Taita Dios ima nishcata tapungapami ñucapajman shamun.

16Paicuna ima llaquita charishpapash, ñucapajmanmi shamun. Shina shamujpimi caishujtapash, chaishujtapash tapuchishpa, paicuna imata rurashcata ricushpa alichijuni. Chaipimi, Taita Dios mandashcatapash, mandashca shimipi nijushcatapash villajuni” nircami.

17Shina nijpimi Moisespaj suegroca cashna nijurca:

“Can chashna rurajushcacunaca napacha alichu.

18Cambash, caipi shayanajuj gentecunapash ninandami shaijunguichi. Canlla tucuita ruranaca, ninan shinlli cajpimi, canlla tucuita ruraitaca na ushana cangui.

19Cunanga, canmanmi shuj ali yuyaita cugrini, chaita can uyashpa cazujpica, Taita Diospash canhuanmi canga. Taita Diospaj ñaupajpi, cai gentecunapaj randi shayarishpami, tucui cai ruranacunataca, Taita Diospaj maquipi churana cangui.

20Taita Dios mandashca shimicunatami paicunamanga yachachina cangui. Imashna causanatapash, imata rurashpa pactachinatapashmi yachachina cangui.

21Shinallata, tucuilla Israel gentecunamanda, alitalla rurajcunata, Taita Diosta manllajcunata, na llullajcunata, charijyanatapash na munaj jaricunatami agllana cangui. Paicunataca, huarangacunata mandachun, patsajcunata mandachun, picha chungacunata mandachun, chungacunata mandachunmi churana cangui.

22Paicunami, gentecuna imata rurashcatapash, punllandi ricushpa alichinajunga. Na alichi ushanalla, ashtahuan shinlli llaquicunatallami cambajman apamunajunga. Alichi ushanalla llaquicunataca, paicunallata ricushpami alichinajunga. Chashna paicuna yanapajpimi, canga samai ushangui.

23Ñuca ima nishcata rurachun, Taita Dios yarichijpica, cambash shinlli tucushpa pactachi ushanguimi. Shinallata cai tucui gentecunapash, cushijushpami paicunapaj huasicunaman tigranajunga” nijurcami.

24Moisesca, paipaj suegro imatalla nijta uyashpami tucuita rurajurca.

25Moisesca, alitalla ruraj jaricunata, tucuilla Israelcunamanda agllashpami, mandachun churarca. Huarangacunata mandachun, patsajcunata mandachun, picha chungacunata mandachun, chungacunata mandachunmi churarca.

26Paicunami, Israelcuna ima llaquita charijpipash punllandi ricunajurca. Shinlli llaquicunataca, Moisés alichijuchunmi cachanajurca. Alichi ushanalla llaquicunataca, paicunami ricushpa alichinajurca.

27Chai punllacuna jipa Moisés, paipaj suegrota “cayacaman” nishpa cachajpimi, paipaj llactaman tigrarca.