JEREMÍAS 19 - Quichua Imbabura 2016

Alpa mangata faquishcamanda

1Mandaj Diosca, cashnami nihuarca: “Alpa mangata ruraj runapajman rishpa, shuj mangata randigri. Shinallata, Jerusalenbi mandaj ancianocunatapash, sacerdotecunata mandajcunatapash pushangui.

2Chai jipaca, indi llujshimujman tiyajuj punguman rishpa, Hinom runapaj churipaj pugru pambaman pushangui. Chaipica, Ñuca imatalla mandashcacunata villangui.

3Paicunataca cashna ningui: ‘Judá llactata jatun mandajcunapash, Jerusalenbi causajcunapash, Mandaj Dios rimashcata uyaichi’. Israelcunapaj tucuita Mandaj Diosca, cashnami nin: Ñucami cai llactaman ninan llaquita cachamugrini. Chai llaqui shamunata uyajcunaca, ninandami manllarijunga.

4Paicunaca, Ñucamanda anchurishpa, rurashcalla dioscunaman inciensota cushnichishpami, cai llactatapash huaglichishpa saquirca. Chai dioscunataca, paicunapash, paicunapaj taitacunapash, Judá llactata jatun mandajcunapash na rijsircachu. Shinallata alitalla rurashpa causaj gentecunatarami huañuchinajurca.

5Shinallata Baal diosman, paicunapaj churicunata cushpa rupachingapami altarcunata ruranajurca. Chaicunata rurachunga, na mandarcanichu, yuyaitallapash na curcanichu.

6Chaimandami Mandaj Diosca, cashna nin: Cai pushtutaca, Tofet shuti nishpa, Hinom runapaj churipaj pugru pamba nishpapash, na ashtahuan rigsingachu. Ashtahuangarin Huañuchina Pamba nishpami rigsinga.

7Judá llactapi causajcuna, Jerusalén pueblopi causajcuna, cai pambapi imata yarinajushcatapash yangapimi churasha. Paicunataca, paicunata fiñajcuna huañuchinajuchunmi saquisha. Chaicunataca, angacuna, sachapi causaj animalcunami micunga.

8Cai pueblotaca, tucuicuna manllarishpa, asishpa ricuchunmi saquisha. Maijan chaita yalijpash, cai pueblo tucurishcataca, na alicachishpa, asishpami ricunga.

9Paicunataca, paicunapaj churicunata, ushicunata micuchunmi saquisha. Paicunata fiñajcuna huañuchingapa muyundi chapanajujpimi, imatapash na rurai ushanajushpa, paicunapurallata micurinajunga” ningui nihuarcami.

10Chai jipaca, canhuan rinajuj runacuna ricujta chai mangataca faquinguilla.

11Shina rurashpaca cashna ningui: “Tucuita Mandaj Diosca, cashnami nin: ‘Caipi causajcunatapash, cai pueblotapash, chashnallatami faquigrini. Alpa mangata maijambash faquijpi, cutinga na alichita ushanatashnami saquigrini. Huañushcacunatapash maipi pambana na tiyajpimi, Tofet shuti pambapi pambanajunga.

12Mandaj Dios Ñucaca, Tofet shuti pambatashnami, cai pueblopi causajcunataca llaquichigrini.

13Jerusalenbi huasicunapash, Judá llactata jatun mandajcunapaj huasicunapashmi, Tofet shuti pambashnallata mapayashpa saquirishca. Chai huasi jahuacunapimi, luzerocunaman inciensota cushnichishpa, shinallata rurashcalla dioscunaman vinota carashpa chashna mapayanajushca’ ninmi ningui” nihuarcami.

14Tofet shuti pambapi villachun, Mandaj Dios mandashcata villashca jipami Jeremiasca tigramurca. Chai jipami, Mandaj Diospaj huasi canlla patiopi shayarishpami, tucuicunaman cashna nirca:

15“Tucuita Mandaj, Israelcunapaj Diosca cashnami nin: ‘Ñucaca, cai pueblomambash, uchilla pueblocunamambash, jatun llaquitami apamusha nishcataca, ñami pactachigrini. Paicunataca, Ñuca rimashca shimicunata napacha cazungapa munashcamandami, chashna llaquichigrini’ ninmi” nircami.