ÉXODO 35 - Quichua Imbabura 2016

Samana punllapi imatalla ruranamanda(Éx. 31:12-17)

1Moisesca, tandanajushca tucuilla Israelcunata cayashpami cashna nijurca: “Caicunatami, Mandaj Diosca rurachun mandajun:

2‘Sucta punllacamanllami imatapash rurana canga. Ashtahuangarin canchis punllapica, Mandaj Diospajlla shicanyachishca cajpimi samana canguichi. Samana punllapi, imatapash ruranajushpaca huañungapachami.

3Samana punllapica, cangunapaj huasicunapica ninatallapash na japichinachu canguichi’ ninmi” nijurcami.

Diospaj Jatun Carpata rurangapa ofrendata cuna cashcamanda(Éx. 25:1-9)

4Moisesca, tucuilla tandanajushca Israelcunamanmi cashna nijurca: “Mandaj Diosca, caitami mandarca:

5‘Mandaj Diosman ofrendata japinami canguichi. Mandaj Diosmanga tucui shunguhuanmi carangapa apamuna canguichi. Paimanga: Curita, culquita, bronceta,

6Shinallata, azulta, moradota, yana puca tinishca telacunatami carana canguichi. Ashtahuan, juyailla lino telatapash, chivo milmatapash,

7jari llama caracunata pucata tinishcatapash, tejón animalpaj caracunatapashmi apamuna canguichi. Shinallata, acacia caspitapash,

8michata japichina aceitetapash, talishpa javina aceitetapash, inciensota rurangapa mishquilla ashnajun yacutapashmi apamuna canguichi.

9Shinallata, ónice rumicunatapash, efodpi, pectoralpi churana uchilla rumicunatapashmi apamuna canguichi’ ninmi” nircami.

Diospaj Jatun Carpata ruranamanda(Éx. 39:32-43)

10Shinallata cangunapuramandaca, ali yachajuna ushaita shungupi charijcunami, Mandaj Dios mandashcataca tucuita ruranajunga.

11Paicunami, Jatun carpatapash, carpapaj telacunatapash, carpa jahuata jatashpa churana argollacunata, tablacunata, jatun caspicunata, pilarcunata, bazacunatapash ruranajunga.

12Shinallata, cajondapash, chai arcata huandushpa apana caspicunatapash, cajonbaj tapatapash, huarcushpa quilpana jatun fachatapash,

13mezatapash, mezata huanduna caspicunatapash, chaicunapi imalla tiyanacunatapash, Mandaj Diosman cuna tandacunatapashmi ruranajunga.

14Shinallata, michata japichina candelerotapash, chaipi imalla tiyanacunatapash, chaipillata churana lamparacunatapash, michata japichina aceitetapash,

15inciensota rupachina altartapash, chai altarta huandushpa apana caspicunatapash, Ñucapajlla cachun shicanyachina aceitetapash, mishquilla ashnajun inciensotapash, Jatun Carpaman yaicuna punguta jarcana cortinatapashmi ruranajunga.

16Shinallata, Ñucaman cushca animalta tucuillata rupachina altarta, bronce rejillata, chai altarta huandushpa apana caspicunata, chaipi imalla tiyanacunata, maillana pilunda, chai pilunda churana bazacunatapashmi ruranajunga.

17Shinallata, patio muyundita jarcana cortinata, pilar caspicunata, chai pilarcunata shayachina bazacunata, patioman yaicuna pungupi huarcuna cortinatapashmi ruranajunga.

18Shinallata, jatun carpata shayachingapa huatana estacacunata, patio muyundipi shayachingapa huatana estacacunata, chaicunata huatana huascacunata,

19Diospaj huasipi Diospajta rurangapa churajunacunata, sacerdote Aarón churajuna Diospajlla shicanyachishca churajunata, Aaronbaj churicuna, Diospajta ruranajushpa churajunatapashmi apamunajurca.

20Chai jipami, tandanajushca Israelcunaca, Moisespaj ñaupajmanda llujshishpa rirca.

21Shungumandapacha ofrendata cungapa apamuj gentecunami, Mandaj Diospaj ñaupajmanga apamunajurca. Dioshuan tuparina jatun carpata rurangapapash, chaipi ima tiyanacunata rurangapapash, sacerdotecunapaj churajunata rurangapapash, tucuitami apamunajurca.

22Diosman ofrendata cungapaca, jaricunapash, huarmicunapashmi shungumandapacha munaihuan shamunajurca. Paicunaca, cadenacunata, zarcillocunata, surtijacunata, brazaletecunata, tucui imaguta cashpapash curita rurashcatami apashpa shamunajurca. Curitami, Mandaj Diosmanga tucuicuna ofrendata caranajurca.

23Tucui runacunami, azulta, moradota, yana puca puchata, ashtahuan ali lino puchata, chivo milmata, jari llama caracunata pucata tinishcata, tejón animalpaj caracunata apamunajurca.

24Culquita, bronceta, ofrendata cusha nishcacunaca, tucuicunami Mandaj Diosman chai ofrendata apamunajurca. Shinallata, acacia caspita charijcunaca, chaicunahuan imatapash rurashpa, Diospajta ruranajuchunmi chashna apamunajurca.

25Shinallata, alipacha puchanata yachaj huarmicunapash, paicunapaj maquihuan puchashpami, azul, morado, yana puca puchacunata, ashtahuan ali lino puchatapash apamunajurca.

26Shungumandapacha tucui munaita charij huarmicunami, chivo milmacunata puchanajurca.

27Israelcunata mandajcunaca, efodpi, pectoralpi churangapami ónice shuti rumitapash, ashtahuan juyailla rumicunatapash apamunajurca.

28Shinallata, mishquilla ashnajun jihuacunata, michata japichina aceiteta, talishpa javina aceiteta, mishquilla ashnajun inciensota rurangapapashmi apamunajurca.

29Israelpuramandaca, carana munaita shungupi charijcunami jaricunapash, huarmicunapash, tucuita rurangapa caranajurca. Chaicunata rurachunga Mandaj Diosllatami, Moisés villachun mandashca carca. Shinamandami, Mandaj Diosman carangapaca, paicunapaj tucui munaihuan, ofrendata apamunajurca.

Bezaleel shuti, Aholiab shuti runacunata cayashcamanda(Éx. 31:1-11)

30Moisesca, Israelcunataca cashnami nijurca: “Mandaj Diosca, Bezaleel shuti runatami agllarca, paica Uri shuti runapaj churimi. Uri shuti runaca, Judá ayllupura Hur shuti runapaj churimi carca.

31Bezaleel runamanmi, alipacha yachajushca, ali yuyaita charij, ali yachajushcahuan tucui imatapash rurajuchun Taita Diosca, Paipaj Espirituta cushca.

32Shina cashpami paica, curimanda, culquimanda, broncemanda imatapash juyaillaguta rurai ushajunga.

33Shinallata, rumicunapipash, caspicunapipash, imapash juyaillagu ricurijuchun, tucui imapipash ali yachaj cachunmi agllarca.

34Shinallata, Bezaleel shuti runahuanga, Dan ayllupuramanda, Ahisamac runapaj churi Aholiab shuti runatami agllashpa churarca.

35Paicunamanmi, tucui imatalla ruranata ali yachajcuna cachun shungupi ushaita curca. Shinamandami, azul, morado, yana puca puchacunahuan, ali lino puchacunahuan, telarpipash ahuashpa, maquipipash juyaillacunata sirashpa, tucuita alitapacha ruranajuchun ushaita curca.