DEUTERONOMIO 21 - Quichua Imbabura 2016

Maijan huañuchishcata na yachashcamanda, Diosman ofrendata cunamanda

1Shinallata, canda Mandaj Taita Dios, canman carashca alpapi huañushcata tarishpa, maijan huañuchishcata na yachashpaca, cashnami rurana canguichi:

2Canda mandaj ancianocunapash, juezcunapash shamushpami, chai huañushca sirijushca pushtumanda, maijan pueblocuna quimirialla cashcata ricunajunga.

3Chai pueblopi causanajuj mandaj ancianocunami, huagracunamanda nara yapushca, nara yugushca huarmi shicuta japinga.

4Chai pueblopi mandaj ancianocunaca, chai huagrataca yacu tiyaj pugru pambamanmi apanga. Chai pambaca, nara yapushca, nara imatapash tarpushcami canga. Chai pambapimi, huarmi shicupaj cunga tulluta faquinga.

5Chai jipaca, levitapaj churi sacerdotecunami chaiman shamunajunga. Canda Mandaj Taita Diosca, paicunatami, Paipajta rurashpa causanajuchun, Mandaj Diospaj shutipi bendicianajuchun agllashca. Ima fiñanajui tiyajpipash, ima llaquicuna tiyajpipash, paicuna ricushpa mandajpimi, imata cashpapash ruranajunga.

6Huañushca sirijushcata tarishca quimirialla pueblomanda ancianocunaca, pugru pambapi cunga tulluta faquishpa huañuchishca huarmi shicupaj jahuapimi maquita maillanajunga.

7Chaipaj jipaca cashnami ninajunga:

‘Cai runapaj yahuartaca,

na ñucanchi maquihuan jichashcachu canchi.

Ñucanchi ñavihuambash na ricushcachu canchi.

8Mandaj Dioslla,

Can agllashpa, Can quishpichishca Israelcunapaj juchataca perdonapailla.

Cai runapaj yahuarmandaca, Israelcunataca ama juchachipaichu’ ninajungami.

Chashna rurajpimi, yahuarta jichashpa juchata rurashcataca perdonanga.

9Chashna rurashpami, cangunapuramanda, yahuarta jichashpa juchata rurashcamandaca anchuchingui. Mandaj Diospaj ñaupajpi, Pai nishcata pactachishpami chashna anchuchingui.

Tauca mandashcacunamanda

10Canda fiñajcunahuan macanajuiman llujshijpi, canda Mandaj Taita Dios, cambaj maquipi churajpimi, paicunapuramanda huaquingunataca prezu japinguichi.

11Chai prezu japi tucushca huarmicunamanda, maijambash juyaillagu cajta ricushpa munashpaca, cambaj huarmi cachun japinguilla.

12Shina japishpa cambaj huasiman pushajpimi, chai huarmica ajchatapash, sillutapash ruturinga.

13Shinallata, prezu cashpa churajushcata anchuchishpami, cambaj huasipi causanga. Paipaj taita mamamandaca, shuj quillacamanmi huacanga. Chai jipaca, cambash paipaj cusa cashcamanda, paipash cambaj huarmi cashcamanda, pacta causanguilla.

14Chai huarmita na munashpaca richun saquinguilla. Paita pingaichishcamanda, culquipajca na jatunachu cangui, gañandapash na ruranachu cangui.

15Shuj runa, ishcai huarmita charishpaca, shujtaca juyangami, shujtaca na ricunayachingachu. Shina cajpipash, juyashca huarmipash, na ricunayachishca huarmipashmi, churicunata paihuan charinga. Na ricunayachishca huarmihuanmi, punda churitaca charinga.

16Imatalla charishcata churicunaman chaupina punllapica, na ricunayachishca huarmihuan charishca punda churiman cunata na cushpa, juyashca huarmihuan charishca churimanlla cuitaca na ushangachu. Na ricunayachishca huarmihuan charishca churimi, paipajca punda churi.

17Na ricunayachishca huarmipaj churimanmi, paipaj punda churi cashcamanda, tucui churicunaman cunamandaca, chaupita yalishpa cuna canga. Chai churica, paipaj callaripi charishca punda churi cashcamandami, pai japina cashcata japinga.

18Maijambash, taita mama rimashca shimitapash na cazuj, shinlli shungupacha tucushca, llaquichijpipash na cazuj churitami charinga.

19Shina cajpica, paipaj taita mamami, paicuna causanajuj puebloman yaicuna pungupi tiyanajuj, mandaj ancianocunapaj ñaupajman apanga.

20Pueblota mandaj ancianocunamanmi cashna nishpa villanajunga: ‘Cai ñucanchi churica, ñucanchi rimashca shimitapash napacha uyaj, na cazuj, shinlli shungupacha tucushca churimi. Paica ninanda micushpa, machashpallami purin’ ninajungami.

21Shina villajpimi, pai causajuj pueblopi causaj gentecunaca rumicunahuan huañuchinga. Shina rurashpami, na alita rurajcunataca cangunapaj chaupimanda anchuchinguichi. Chaita uyashpaca, tucui Israelcunami ninanda manllarinajunga.

22Maijan runapash, huañuchi tucuna juchata rurashca cajpica, huañuchishca jipaca caspipimi huarcuna canguichi.

23Chai huañushca runataca, caspipi huarcushca pacarichunga na saquinachu canguichi. Caspipi huarcushca runataca, Taita Dios ninanda na alicachishcamandami, na cungashpa chai punllallata pambana canguichi. Canda Mandaj Taita Dios canman carashca llactataca, na mapayachinachu canguichi.