1Ñuca huahualla,
ñuca yachachishca shimicunataca chasquinami cangui.
Ñuca mandashca shimicunataca, cambaj shungupimi alichina cangui.
2Ali yachajunataca, aligutami uyana cangui.
Aliguta yarishpa causanatami, tucui shunguhuan munana cangui.
3Ali yachajunataca, caparishpa mañangui.
Aliguta yarishpa purinatami mañana cangui.
4Ali yachajunataca, culquita mascajshnami mascana cangui.
Ima alicunata mascajshnami mascana cangui.
5Shina rurashpami, Mandaj Diosta manllashpa causanata yachajungui.
Taita Dios imata yachachishcatapashmi yachajui ushangui.
6Mandaj Diosmi, ali yachajunataca caramujun.
Paimi ali yachajushca cachumbash, ali yuyaita charichumbash caramujun.
7Paimi, alita rurajcunamanga ali yachajunata caramujun.
Aligutalla rurashpa causajcunataca, Paimi huacaichijun.
8Alitalla rurashpa causajcunataca, Paimi ricuriashpa huacaichijun.
Paipajlla causajcunatapash, Paillatami huacaichijun.
9Shina rurajpimi, alitalla rurashpa, aliguta ricushpa,
tucuicunapaj ali cachun ruranataca ali yachajungui.
10Cai ali yachajuna cambaj shunguman yaicujpi,
ali yachajushca cana, canhuan cajpica,
11aliguta yarishpa causanatami, ali yachajungui.
Cai ali yuyaicunaca, tucui na alicunamanda huacaichingami.
12Na ali causaimandami huacaichinga.
Jatun na alita rimajcunamandapashmi huacaichinga.
13Na ali gentecunaca, Diosta cazushpa causanatami saquishca.
Yana tutapishna causangapami anchurishca.
14Paicunaca, na alita rurashpami cushijunajun.
Jatun na alicunatalla rurashpami, ninanda asinajun.
15Paicunaca, na ali ñangunatami catinajun.
Paicunapaj ñangunaca, llaquiman apaj ñangunami.
16Na ali huarmimandaca anchuchingami.
Juyailla rimashpa umachij huarmimandapash cacharichingami.
17Chai huarmica, cuitsa cashpa cazarashca cusatami jichurca.
Diospaj ñaupajpi ari nijushcatapashmi cungarca.
18Chaimandami, chai huarmica huañuiman apajun.
Paihuan rishpaca, huañuimanmi ringa.
19Chai huarmihuan pacta puñushpaca, huañungapachami.
Cutinga ña na causaita charingachu.
20Shina cashcamandami canga, alitalla rurajcunahuan purina cangui.
Alitalla rurajcunatami catina cangui.
21Alitalla rurajcunami, cai alpapica causanga.
Ima pandatapash na rurajcunallami, cai alpapica unaicaman causanga.
22Ashtahuangarin, Diosta na manllajcunaca, cai alpamanda anchuchi tucungami.
Na alita rurashpa causajcunaca, sapimanda pilashpa shitashcashnami canga.
Who We AreWhat We EelieveWhat We Do
2025 by iamachristian.org,Inc All rights reserved.
