1Aliguta yarishpa rimashca shimica, ninanda fiñarishcatapash jarcanmi.
Ashtahuangarin, fiñarishpa rimashca shimica, ashtahuanmi fiñachin.
2Ali yachajushca runacuna rimashcacunaca, ali yuyaitami ashtahuan cunga.
Ashtahuangarin, juizu illaj runacunaca, napash rimanacunata rimanllami.
3Mandaj Diosca tucuitami ricujun.
Alicunatapash, na alicunatapashmi ricujun.
4Fiñanajushcata alichijcunaca, causaita cuj yurashnami.
Ashtahuangarin, na alitalla rimajcunaca ninandami llaquichin.
5Juizu illaj churica, paipaj taita yachachishcataca yangapimi churan.
Ashtahuangarin, jarcashpa rimajta cazuj churica, aliguta yarishpami causanga.
6Alitalla ruraj runapaj huasipica, ima cashpapash ashtacapachami tiyan.
Ashtahuangarin, Diosta na manllaj runa imata charishcapash, na cushijuita cungachu.
7Alipacha yachajushcacunaca, ali yachashcahuanmi tucuita rimanga.
Ashtahuangarin, juizu illaj runacunaca, na chashna rimangachu.
8Na alita rurajcuna carashcataca, Mandaj Diosca napacha chasquinchu.
Ashtahuangarin, alita rurajcuna mañajpica, Diosca cushijunmi.
9Na ali gentecuna imashna causajtaca,
Mandaj Diosca napacha alicachinllu.
Ashtahuangarin, alitalla rurashpa causajtaca, Diosca juyanmi.
10Na alita ruraj runata, ali tucuchun rimajpica, napacha chasquinchu.
Ali tucuchun rimajpi, na uyanayachij runaca, huañungami.
11Seolpash, Abadonbash, Mandaj Diospaj ñaupajpimi.
Runacunapaj shungutacarin, ¿imashpata na yachangayari?
12Na cazushpa asij runaca, paita jarcashpa rimajtaca napacha juyanchu.
Paica, ali yachajushca runacunahuambash, na tandanajunllu.
13Cushilla shunguta charijcunaca, ñavipash cushillami ricunajun.
Ashtahuangarin, shungupi llaquilla cashpaca, llaquillami ricunajun.
14Shungupi ali yuyaita charij runami, ali yachajunataca mascan.
Ashtahuangarin, juizu illaj runacunaca, maitapash rimanllami.
15Llaquilla causajcunapajca, punllandimi llaquicunaca ricurin.
Ashtahuangarin, shungupi cushilla causaj runaca, punllandimi cushilla causan.
16Ashagutalla charishpapash, Mandaj Diosta manllashpa causanami ashtahuan ali.
Ashtacata charishpapash, llaqui causanaca napacha alichu.
17Ali racuyashca huagra aichata micunajushpapash, fiñanajushpalla causanapaj randica,
micuna jihuatalla micushpa, juyarishpa causanami ashtahuan ali.
18Ñapash fiñarijlla runaca, macanajuitami jatarichin.
Ashtahuangarin, na ñapash fiñarij runaca, fiñanajushcatapash alichinmi.
19Imata rurangapapash na munaj runaca, casha ucuta purishpa rijshnami.
Ashtahuangarin, alitalla ruraj runapaj purina ñanga, rumihuan aliguta rurashcashnami.
20Alipacha yachajushca churica, paipaj taitatami cushichin.
Juizu illaj churica, paipaj mamatami yangapi churan.
21Juizu illaj runaca, yangata purishpami cushijun.
Ashtahuangarin, ali yuyaita charij runaca, ali causanatami mascan.
22Ali yuyaita cuj pipash na tiyajpica, yuyai illajmi tucun.
Ashtahuangarin, taucacuna ali yuyaita cujpica, ali yachajushcami tucun.
23Ali yuyaicunahuan rimashpami, runaca cushijun.
Rimana cashcatalla rimashpacarin ¡alipachamari!
24Ali yuyaita charij runapaj causaica, jahua pachamanmi pushajun.
Chashna causashpami, Seolman urai rinamandaca caruyanga.
25Jatun tucushca runacunapaj huasitaca,
Mandaj Diosmi tucuilla tucuchinga.
Ashtahuangarin, sapalla mamagu charishca alpataca, Diosmi ricurianga.
26Na ali runacuna jariyashpa yarinajushcataca,
Mandaj Diosca napacha ricunayachinllu.
Ashtahuangarin, ali shunguhuan rimashcacunaca, alipachami uyarin.
27Pailla charijyangapa munaj runaca, paipaj huasi ucupuratami llaquichijun.
Ashtahuangarin, culquita pacalla cujpi na chasquij runaca, causangami.
28Alitalla ruraj runaca, imata cashpapash aliguta yarishpami tigrachin.
Ashtahuangarin, Diosta na manllajcunaca, shimi cacharishcata rimanllami.
29Mandaj Diosca, Paita na cazujcunamandaca carupimi.
Ashtahuangarin, alitalla rurajcuna mañajtaca uyanmi.
30Cushilla ñavi cajpica, shungupash cushillami.
Ali villashcata uyashpaca, ashtahuan ali causaitami charin.
31Shinlli tacurishcata uyashpa cazuj runaca,
alipacha yachajushca runacunahuanmi tandanajunga.
32Cazuchun rimashcata yangapi churaj runaca, paillatami llaquita apanga.
Ashtahuangarin, ali tucuchun rimashcata cazuj runaca, ali yuyaitami charin.
33Mandaj Diosta manllashpa causashpaca, alipacha yachajushcami causanga.
Na jariyashpa causajcunami, jatumbi churai tucunga.
Who We AreWhat We EelieveWhat We Do
2025 by iamachristian.org,Inc All rights reserved.
