EFESIOS 5 - Quichua Imbabura 2016

Michapaj huahuacunashna causaichi

1Taita Diospaj juyashca huahuacuna cashpami, Paitalla ricushpa catina canguichi.

2Cristo ñucanchita juyashcashnami, cangunapash juyarishpa causana canguichi. Paica, Paillata japi tucushpami ñucanchimanda huañurca. Taita Diosman animalta carashpa huañuchishpa rupachijpi, mishquillagu ashnajujshna cachunmi chashna huañurca.

3Cangunapurapica: “Huainayashpa, tucui mapata rurashpa, charijyanatalla munashpami causanajun” ninajuj shimicunaca, uyaritapash ama uyarichun ninimi. Diospajlla causajcuna chashna causanaca napacha alichu.

4Pinganayai shimicunata, napash rimana shimicunata, mapa parlocunataca, na parlanachu canguichi. Ashtahuangarin, Taita Diostami pashi nina canguichi.

5Huainayashpa causajpash, mapatalla rurashpa causajpash, rurashcalla dioscunata mañajshna charijyanatalla munajpash, Cristohuan, Taita Dioshuan mandajuj llactapica, imatapash na japigringachu. Chaitaca ñami yachanguichi.

6Yanga parlocunahuanra pipash umachinman. Chashnacunata rurashcamandami Taita Diosca, Paita na cazujcunataca ninanda fiñashpa llaquichinga.

7Chashnacunahuanga, na tandanajunachu canguichi.

8Pundaca, yana tutapishnami causarcanguichi. Ashtahuangarin cunanga, Apunchi Jesushuan shujlla tucushpami, michashna canguichi. Michapaj huahuacunashnami causana canguichi.

9(Diospaj Espiritumi, juyarishpa causanata, alitalla ruranata, na llullashpa causanata tucuicunaman yachachijun).

10Taita Dios munashcatallami rurashpa causana canguichi.

11Yana tutapishna causashpa, yanga na alitalla rurajcunataca na catinachu canguichi. Ashtahuangarin, paicunatapash jarcashpa rimanami canguichi.

12Paicuna pacalla imatapash rurashcata parlangapaca, pinganayaipachami ricurin.

13Ashtahuangarin, ima na alita rurashcapash michapica ricurinllami. Micha punchayachijpica tucui ricurinllami.

14Shinamandami cashna nijun:

“Puñujujshna causajushcamandaca rijchari.

Huañushcashna causajcunapaj chaupimandaca jatari.

Candaca, Cristomi punchayachinga” nijunmi.

15Cangunaca, aliguta yarishpami causana canguichi. Juizu illajcunashnaca na causashpami, ali yuyaihuambacha causana canguichi.

16Na ali punllacunapi causanajushcamandami, ima alita rurana tiyajpica, ruranapacha canguichi.

17Shina cashpami, juizu illajcunashnaca na causana canguichi. Ashtahuangarin, Taita Dios munashcata rurangapami, ali yuyaita japina canguichi.

18Vinohuan na machanachu canguichi. Machashpa purijcunaca, ninan llaquicunata apashpami chingashcashna causanajun. Ashtahuangarin, Diospaj Espíritu jundami causana canguichi.

19Cangunapurapica, salmocunatapash, himnocunatapash, Diospaj Espíritu yarichishca candanacunatapashmi candana canguichi. Shinallata, Taita Diostaca tucui shunguhuanmi alicachishpa candana canguichi.

20Tucuimandami, ñucanchi Apunchi Jesucristopaj shutipi, Taita Diostaca “pashi” ninajunalla canguichi.

Caishuj chaishuj cazurishpa causaichi

21Cristota manllashpami, caishuj chaishuj cazurishpa causana canguichi.

22Cazarashca huarmicuna, cangunapaj cusacunataca, Apunchi Jesusta cazujshna cazuichi.

23Imashnami Cristoca, tandanajuj crijcunata umashna mandajun, shinallatami, cusapash, huarmitaca umashna mandajun. Crijcunaca, Cristo quishpichishca cajpimi, Paipaj cuerposhna tucushca.

24Tandanajuj crijcuna Cristota cazunshnami, cusayuj huarmipash, Paipaj cusataca tucuipi cazushpa causana.

25Cusacunapash, cangunapaj huarmitaca juyanami canguichi. Tandanajuj crijcunata juyashpami, Cristoca japi tucushpa huañushpa,

26Diospajlla shicanyachirca. Yacuhuambash, Diospaj shimihuambash armachishpami chashna rurarca.

27Tandanajuj crijcunaca, ama mapayashca, llambu llambu, ima na alita rurashcapash illaj, Paipajlla causashpa, juyaillagu ricurichunmi chashna huañurca.

28Shinallatami cusacunapash, cangunapaj huarmitaca, cangunapaj cuerpotashna juyana canguichi. Paipaj huarmita juyashpaca, paillatami juyarijun.

29Pipash paipaj cuerpotallataca na millanayachinllu. Ashtahuangarin, aliguta micushpa alichirinatami yachan. Shinallatami, tandanajuj crijcunatapash, Cristoca juyashpa charijun.

30Shinallata crijcunaca, Cristopaj cuerpomanda cashpami, Paipaj aichamanda, tullumandapash canchi.

31“Shinamandami jarica, paipaj taita mamata saquishpa, paipaj huarmihuan causangapa tandanajunga. Shina tandanajushpaca, ishcai cashpapash, shujlla tucushpami causanga” nijunmi.

32Caitaca, pipash na yachai ushanallachu. Ashtahuangarin ñucami, cashna nini: Caica, tandanajuj crijcuna, Cristohuan imashna causanatami ricuchijun.

33Shina cajpimi, canguna juyarinshnallata, cangunapaj huarmitapash tucuicuna juyana canguichi. Shinallata, huarmicunapash, cusacunataca cazunami canguichi ninimi.